– કોસંબાના મોટા બોરસરા ખાતે આવેલ ઇન્ડસ્ટ્રીયલ પ્લોટ અને મશીનરી મોર્ગેજ તરીકે મૂકી હતી બેન્કની જાણ બહાર મશીનરી સ્થળ પરથી ખસેડી લેતા બેન્ક દ્વારા છેતરપિંડી વિશ્વાસઘાતની ફરિયાદ
કોસંબા : સુરત જિલ્લા ભાજપના મોટું માથું ગણાતા એક નેતાના પુત્રી અને જમાઈએ સુરત ડિસ્ટ્રિક્ટ કો-ઓપરેટિવ બેન્કમાંથી અલગ અલગ ફર્મ હેઠળ 8 લોન અને 4 કેશક્રેડિટ પેટે કુલ રૂ. 9.92 કરોડ રૂપિયાનું ધિરાણ લીધું હતું.દરમ્યાન આ દંપતીએ ધિરાણના અવેજમાં મોર્ગેજ કરેલી મશીનરી બેન્કને જાણ કર્યા વિના બારોબાર ખસેડી લેતા સુરત ડિસ્ટ્રિક્ટ બેન્કના લોન વિભાગના મેનેજરે કોસંબા પોલીસ મથકમાં દંપતી અને બે જમીનદાર વિરુદ્ધ ફરિયાદ કરતાં પોલીસે છેતરપિંડી વિશ્વાસઘાતનો ગુનો નોંધી આગળની તપાસ હાથ ધરી છે.આ ફરિયાદ બાદ જિલ્લા ભાજપમાં પણ ગણગણાટ શરૂ થઈ ગયો છે.
સુરત જિલ્લા પંચાયત અને સુરત જિલ્લા ભાજપના માજી પ્રમુખ તેમજ સુરત ડિસ્ટ્રિક્ટ કો-ઓપરેટિવ બેન્કના માજી ડિરેક્ટર રહી ચૂકેલા એક કદાવર નેતાના જમાઈ વિલિશ રમેશચંદ્ર પટેલ અને પુત્રી ખ્યાતિ વિલીસ પટેલ (બંને રહે 502, ટાવર –એ, મેપલ લીફ, વાસ્તુ લક્ઝરીયાની પાછળ, પિપલોદ – ડુમસ રોડ સુરત તથા 607, છઠ્ઠો માલ, એસએનએસ બિઝનેશ પાર્ક, યુનિવર્સિટી રોડ, વેસુ, સુરત તેમજ ફ્લેટ નંબર 202 અને 503, ગોવિંદજી પેલેસ, સરગમ શોપિંગ સેન્ટર પાસે, પાર્લે પોઈન્ટ, સુરત) અને લોનમાં જામીન રહેનાર બે જામીનદારો સામે કોસંબા પોલીસ મથકમાં ગુનો નોંધાયો છે.વિલીસ અને તેની પત્ની ખ્યાતિએ વર્ષ 2016માં અલગ અલગ ફર્મ હેઠળ ધી સુરત ડિસ્ટ્રિક્ટ કો-ઓપરેટિવ બેન્કમાં લોન માટે અરજી કરી હતી.વિલિસે જયશીતી એન્ટરપ્રાઇઝના પ્રોપરાઇટર તરીકે 1.88 કરોડ,મધુરમ ટ્રેડર્સના પ્રોપરાઇટર તરીકે 1.88 કરોડ, તુષિત એન્ટરપ્રાઇઝના પ્રોપરાઈટર તરીકે 1.88 કરોડ તેમજ ખ્યાતિએ ઓમસાઈ એન્ટરપ્રાઇઝના પ્રોપરાઇટર તરીકે 1.88 કરોડ અરજી કરતાં કુલ 7.52 કરોડ રૂપિયાનું ધિરાણ બેન્ક દ્વારા આપવામાં આવ્યું હતું અને આઠ જેના બદલામાં બેન્ક દ્વારા કોસંબા પોલીસ સ્ટેશન વિસ્તારમાં આવેલા માંગરોળ તાલુકાનાં મોટા બોરસરા ગામની સીમમાં આવેલી રેવન્યુ સર્વે નંબર 270+271/2(નવો બ્લોક નંબર 211/અ), સર્વે નંબર 190 બ્લોક નંબર 148 વાળી ઇન્ડસ્ટ્રીયલ હેતુ માટેના પ્લોટ પૈકીનો પ્લોટ નંબર 6 પૈકી સબ પ્લોટ નંબર 6/અ, પ્લોટ 6/બી વાળી જમીન મોર્ગેજમાં આપેલ અને મશીનરીઓ હાઇપોથીકેશનમાં આપી હતી. લોન મંજૂર થતાં જામીનદાર તરીકે સુરતના રાંદેર રોડ ખાતે સંગના સોસાયટીમાં રહેતા નીરવ ભરતભાઇ વશી અને રાંદેર મોરાભાગળ ખાતે આવેલ આનંદ નગર સોસાયટીમાં રહેતા કેજલ ભાવેશ પટેલે સહી કરી હતી.આ લોન તેઓ વ્યાજ સહિત નિયમિત ભરતા હતા પરંતુ ત્યારબાદ 2018માં ફરી વખત ચારેય ફર્મ પર સુરત ડિસ્ટ્રિક્ટ બેન્કમાં અરજી કરતાં બેન્કે જયશીતી એન્ટરપ્રાઇઝ માટે 46.26 લાખ,મધુરમ ટ્રેડર્સ માટે 15.31 લાખ, તુષિત એન્ટરપ્રાઇઝ માટે 32.76 લાખ અને ઓમસાઈ એન્ટરપ્રાઇઝના નામે 46.26 લાખ રૂપિયાની લોન એક્ઝિક્યુટિવ કમિટી દ્વારા મંજૂર કરવામાં આવી હતી.એ જ વર્ષે ફરી વખત ચારેય ફર્મ પર દંપતીએ 25 – 25 લાખ રૂપિયાની કેશક્રેડિટ તરીકે ધિરાણ મેળવ્યું હતું. આમ તમામ રકમ મળી કુલ 9 કરોડ 92 લાખ 59 હજાર રૂપિયાનું ધિરાણ મેળવી દંપત્તિએ તે સમયસર ભરપાઈ નહીં કરતાં તેમજ બેન્કે ધિરાણના અવેજમાં મોર્ગેજ કરેલ મશીનરી બેન્કને જાણ કર્યા વગર ફેક્ટરી પરથી ખસેડી લઈ બેન્ક સાથે છેતરપિંડી અને વિશ્વાસઘાત કર્યો હતો.
