આજથી બેંક કર્મચારીઓની દેશવ્યાપી હડતાળ,ત્રણ દિવસ સુધી નહીં થાય કામ,જાણો કારણ

• સરકારના પ્રાઈવેટાઈઝેશનને લઈને ચાલી રહેલી તૈયારીઓનો વિરોધ કરવા માટે યુએફબીયુએ હડતાળ કરવાનું એલાન કર્યું છે

નવી દિલ્હી,તા.16 ડિસેમ્બર,2021,ગુરૂવાર : જો તમે કોઈ કામ માટે બેંકમાં જવાનું મન બનાવી રહ્યા છો તો આ સમાચાર તમારા માટે છે.આવતા 3 દિવસ સુધી બેંક બંધ રહેશે એટલે કે,બેંકમાં કોઈ પણ કામ નહીં થાય. હકીકતમાં દેશભરના સરકારી બેંક કર્મચારીઓએ 2 દિવસની હડતાળનું આહ્વાન કર્યું છે.અને ત્યાર બાદ રવિવારે સાપ્તાહિક રજાના કારણે બેંકો બંધ રહેશે.

• આ કારણથી હડતાળ પર રહેશે બેંક કર્મચારીઓ

યુનાઈટેડ ફોરમ ઓફ બેંક યુનિયન દ્વારા આ બાબતની માહિતી આપવામાં આવી છે.સરકારના પ્રાઈવેટાઈઝેશનને લઈને ચાલી રહેલી તૈયારીઓનો વિરોધ કરવા માટે યુએફબીયુએ હડતાળ કરવાનું એલાન કર્યું છે.નોંધનીય છે કે,યુનાઈટેડ ફોરમ ઓફ બેંક યુનિયન હેઠળ બેંકોના 9 યુનિયન આવે છે.આ હડતાળથી લોકોને ભારે હાલાકી ભોગવવી પડશે.આ અઠવાડિયાના બાકી રહેલા 4 દિવસ બેન્ક બંધ છે જેમાં શનિવારે શિલોંગ ખાતે બેંક બંધ રહેશે.રિઝર્વ બેંકના કેલેન્ડર પ્રમાણે ત્યાં 18 ડિસેમ્બર શનિવારે ઉ સોસો થામની ડેથ એનિવર્સરીના કારણે બેન્કોમાં કામ નહીં થાય જ્યારે દેશભરમાં 16,17 અને 19 ડિસેમ્બરે બેંક બંધ છે.