21 દિવસના લોકડાઉનમાં જરૂરિયાત મંદ અને ગરીબને બિસ્કિટ પહોંચાડશે
એજન્સી, મુંબઈ
બિસ્કિટ બનાવતી દિગ્ગજ કંપની પારલે પ્રોડક્શને બુધવારના રોજ જાહેરાત કરી છે કે તે ત્રણ અઠવાડિયાના લોકડાઉનના સમયગાળા દરમિયાન ત્રણ કરોડ બિસ્કિટના પેકેટની મફતમાં વહેંચણી કરશે. કંપનીએ કહ્યું કે કોરોના વાયરસની મહામારી સામે લડવા માટે તેઓ પણ ગરીબો અને જરૂરિયાતમંદ લોકો સુધી મફતમાં બિસ્કિટ પહોંચાડીને સરકારની મદદ કરશે. કંપનીએ જણાવ્યું કે આ કાર્ય સરકારી એજન્સીઓના માધ્યમથી કરવામાં આવશે.
કંપનીનું કહેવું છે કે કોરોના વાયરસના સંક્રમણને ફેલાતો રોકવા માટે સરકારી આદેશ અનુસાર તેમના ઉત્પાદન એકમોમાં 50 ટકા કર્મચારીઓ કામ કરી રહ્યા છે. તેઓ તે વાતનું ખાસ ધ્યાન રાખશે કે બજારમાં તેમના બિસ્કિટનો પૂરતો જથ્થો મળી રહે.
પારલે પ્રોડક્ટ્સના સીનિયર કેટેગરી હેડ મયંક શાહે કહ્યું કે અમે સરકાર સાથે મળીને કામ કરવાનો નિર્ણય લીધો છે. સરકારી એજન્સીઓના માધ્યમથી અમે ત્રણ કરોડ બિસ્કિટના પેકેટ્સ જરૂરિયાતમંદ લોકોને મફ્તમાં વહેચવાના છે. આગામી ત્રણ અઠવાડિયા સુધી પ્રત્યેક અઠવાડિયામાં એક કરોડ બિસ્કિટ વહેચવામાં આવશે. બિસ્કિટની શેલ્ફ લાઈફ સારી હોય છે તેથી તે ઘણા સમય સુધી બગડતા નથી. તેથી આવા સમયમાં લોકો સુધી બિસ્કિટ પહોંચાડવાનો વિચાર સારો રહેશે.
