બેઈજિંગ, તા. 4 મે 2020, સોમવાર
ચીનના વુહાન શહેરમાંથી ફેલાયેલી કોરોના મહામારીના કારણે આખી દુનિયા મુશ્કેલીમાં મુકાઈ છે અને લગભગ તમામ દેશો લોકડાઉનમાં કેદ છે.દિવસે ને દિવસે કોરોનાના કારણે મરનારા લોકોનો વૈશ્વિક આંકડો વધી રહ્યો છે અને તેનું સંક્રમણ ખૂબ જ ઝડપથી ફેલાઈ રહ્યું છે.ત્યારે ચીન જ્યાંથી પાંચ મહીના પહેલા આ વાયરસના ફેલાવાની શરૂઆત થઈ હતી ત્યાં સ્થિતિ હવે ફરીથી રાબેતા મુજબ થઈ રહી છે.ચીનમાં લોકડાઉન હટાવી લેવામાં આવ્યું તેની સાથે જ ફેક્ટરીઓ અને પરિવહન પણ ખોલી દેવાયા છે.
પર્યટનમાં ઝડપથી વધારો
ચીનમાં પર્યટન ક્ષેત્રે પણ ખૂબ જ ઝડપી વધારો નોંધાયો છે.એક અહેવાલ પ્રમાણે મે મહીનાની શરૂઆતના બે દિવસમાં આશરે 10 લાખ લોકો શાંઘાઈમાં ફરવા પહોંચ્યા હતા.ચીની સરકારે મે દિવસના અવસર પર કેટલાક પર્યટન સ્થળો ખોલવા આદેશ આપ્યો હતો જેથી પહેલી મેના રોજ 4,56,000 અને બીજી મેના રોજ 6,33,000 લોકો ફરવા પહોંચ્યા હતા.
પાંચ દિવસની રજાઓના પહેલા બે દિવસમાં ચીનમાં 50 લાખથી વધારે લોકોએ મુસાફરી કરી હતી અને મંગળવારે રજાઓના અંત સુધીમાં આશરે 90 લાખ લોકો યાત્રા પૂરી કરે તેવી આશા છે.સંસ્કૃતિ અને પર્યટન મંત્રાલયના અહેવાલ પ્રમાણે ઘરેલુ પર્યટન રેવન્યુ 9.7 અબજ યુઆન (આશરે 1.38 અબજ ડોલર)થી વધારે થવાની સાથે રજાઓના પહેલા દિવસ શુક્રવાર સુધીમાં 23 લાખ ઘરેલુ પર્યટન યાત્રાઓ થઈ.
ઘરેલુ પર્યટનમાં વૃદ્ધિ બાદ ચીને પોતાની મહામારી સંબંધી ઈમરજન્સી પ્રતિક્રિયાને બીજી કે નીચેની શ્રેણીઓમાં સૌથી ગંભીર કરતા ઉતરતા ક્રમે રાખી દીધી હતી.શુક્રવારે દેશભરના કુલ 8,498 એ-સ્તરીય પર્યટક આકર્ષણોને જનતા માટે ખોલી દેવામાં આવ્યા હતા જે કુલ 70 ટકાને કવર કરે છે.
