બારડોલી : ગ્રામ પંચાયતની ચૂંટણીમાં ફોર્મ ભરવાના આખરી દિવસે ઉમેદવારોનો રાફડો ફાટયો હતો.બારડોલી તાલુકાની કુલ 69 ગ્રામ પંચાયતોની જાહેર થયેલી ચૂંટણીમાં ઉમેદવારી નોંધવાના આખરી દિને સરપંચ પદ માટે 153 અને સભ્ય પદ માટે 1040 મળી કુલ 1193 ઉમેદવારોએ પોતાની ઉમેદવારી નોંધાવી હતી.
ગ્રામપંચાયતની ચૂંટણીને મિનિ વિધાનસભાની ચૂંટણી તરીકે જોવાઈ રહી છે. ગ્રામ્ય વિસ્તારોમાં પણ પક્ષોનું પ્રભુત્વ વધી રહ્યું હોય ઘણા ગામોમાં પક્ષો પણ પોતાના ઉમેદવારોને મેદાનમાં ઉતાર્યા છે. 19મીએ યોજનારી ચૂંટણીને લઈ સમગ્ર તાલુકામાં ગ્રામ્ય કક્ષાના રાજકારણમાં પણ ગરમાટો જોવા મળી રહ્યો છે. 29મી નવેમ્બરથી ઉમેદવારી ફોર્મ ભરવાની શરૂઆત થઈ હતી. જેમાં 69 સરપંચ બેઠક માટે 153 ઉમેદવારોએ તેમજ સભ્ય પદ માટે 1040 ઉમેદવારોએ પોતાની ઉમેદવારી નોંધાવી હતી.
ઉમેદવારી પત્ર ભરવાના છેલ્લા દિવસે ઉમેદવારો તેમજ તેમના સમર્થકોની બારડોલી તાલુકા સેવા સદન તેમજ તાલુકા પંચાયત કચેરી ખાતે ભીડ જામી હતી. મોટી સંખ્યામાં ઉમેદવારો પોતાના ટેકેદારોએ સાથે કચેરીએ પહોંચ્યા હતા.લોકોની ભારે ભીડને કારણે ત્રણ વાગ્યા સુધીમાં કચેરીએ પહોંચેલા ઉમેદવારોને ટોકન આપી મોડી સાંજ સુધી ફોર્મ સ્વીકારવાની પ્રક્રિયા ચાલી હતી.હવે 6ઠ્ઠી ડિસેમ્બરના રોજ ઉમેદવારી પત્રોની ચકાસણી કરવામાં આવશે,જ્યારે 7મી ડિસેમ્બરના રોજ ઉમેદવારી પત્રો પરત ખેંચ્યા બાદ જ ચૂંટણી માટેનું ચિત્ર સ્પષ્ટ થશે. 19મીએ મતદાન બાદ 21મીના રોજ મતગણતરી કરવામાં આવશે.અત્રે ઉલ્લેખનીય છે કે ગ્રામ પંચાયતમાં રાજકીય આગેવાનો જ પોતાના માણસો ઉભા રાખવાના અભરખાને કારણે અગાઉ સમરસ બનેલા કેટલાક ગામોમાં છેલ્લી ઘડીએ ચૂંટણી થાય તેવા સંજોગો સર્જાયા છે.
