લખનઉ : સમાજવાદી પાર્ટીના વડા મુલાયમ સિંહ યાદવની નાની વહુ અપર્ણા યાદવ આજે ભારતીય જનતા પાર્ટીમાં જોડાઈ ગઈ છે.ભાજપના પ્રદેશ અધ્યક્ષ સ્વતંત્ર દેવ સિંહે તેમને ભાજપમાં સામેલ કર્યા.આ પ્રસંગે યુપીના ડેપ્યુટી સીએમ કેશવ પ્રસાદ મૌર્ય પણ હાજર હતા.
ભાજપમાં જોડાયા બાદ અપર્ણા યાદવે પાર્ટીના રાષ્ટ્રીય અધ્યક્ષ જેપી નડ્ડા સાથે પણ મુલાકાત કરી હતી.જ્યારે ભાજપમાં જોડાયા બાદ અપર્ણા યાદવે કહ્યું કે,હું હંમેશા પીએમ મોદીથી પ્રભાવિત રહી છું.મારા માટે રાષ્ટ્ર પ્રથમ છે.હું હવે રાષ્ટ્રની આરાધના કરવા નીકળી છું,જેમાં હું દરેકનો સહયોગ ઈચ્છું છું.અપર્ણાએ પીએમ મોદીના સ્વચ્છ ભારત અભિયાન,મહિલાઓ,રોજગાર વગેરે માટેના અભિયાનોની પ્રશંસા કરી.
અપર્ણા યાદવ મુલાયમ સિંહની બીજી પત્ની સાધના ગુપ્તાના પુત્ર પ્રતીક યાદવની પત્ની છે.અપર્ણા યાદવે 2017ની વિધાનસભા ચૂંટણી લખનઉની કેન્ટ બેઠક પરથી લડી હતી.સમાજવાદી પાર્ટીની આ ઉમેદવાર ભાજપના રીટા બહુગુણા જોશી સામે હારી ગઇ હતી.જોકે, અપર્ણાએ લગભગ 63 હજાર વોટ મેળવ્યા હતા.બીજી તરફ રીટા બહુગુણા જોશીના સાંસદ બન્યા બાદ આ સીટ ખાલી પડી હતી,જેના પર 2019માં પેટાચૂંટણી યોજાઈ હતી જેમાં ભાજપનો વિજય થયો હતો અને સુરેશ ચંદ તિવારી ચોથી વખત ધારાસભ્ય બન્યા હતા.
