MS Dhoni IPL 2022: એમ એસ ધોનીએ IPLમાં આ ખાસ રેકોર્ડ બનાવ્યો

નવી દિલ્હી, તા. 22 એપ્રિલ 2022 શુક્રવાર : IPL 2022ની 33મી મેચમાં એમએસ ધોનીનો જલવો જોવા મળ્યો.ચેન્નઈ સુપર કિંગ્સના આ પૂર્વ કેપ્ટને માત્ર 13 બોલમાં 28 રનની ઈનિંગ રમી.જેમાં ત્રણ ચોગ્ગા અને એક છગ્ગાનો સમાવેશ રહ્યો.તેમની આ ઈનિંગના કારણે સીએસકેએ પાંચ વખતની ચેમ્પિયન મુંબઈ ઈન્ડિયન્સને ત્રણ વિકેટથી માત આપી.પોતાની આ મેચની વિજયી ઈનિંગ દરમિયાન એમએસ ધોનીએ એક ખાસ રેકોર્ડ બનાવ્યો છે.ધોની આઈપીએલના ઈતિહાસમાં કોઈ એક બોલર સામે સૌથી ઝડપી 100 રન પૂરા કરનારા બેટ્સમેન બની ગયા છે.ધોનીએ જયદેવ ઉનડકટ સામે 42 બોલમાં 100 રન બનાવ્યા છે.અગાઉ આ રેકોર્ડ સંયુક્ત રીતે સુરેશ રૈના, એબી ડિવિલિયર્સ અને કીરોન પોલાર્ડના નામે હતો.સીએસકેના દિગ્ગજ ખેલાડી રહી ચૂકેલા રૈનાએ સંદીપ શર્મા સામે 47 બોલમાં 100 રન પૂરા કરી લીધા હતા.ગયા વર્ષે આઈપીએલની સમાપ્તિ બાદ સંન્યાસ લેનાર એબી ડિવિલિયર્સએ પણ સંદીપ શર્મા સામે 47 બોલમાં 100 રન બનાવ્યા હતા જ્યારે કીરોન પોલાર્ડની વાત કરીએ તો તેમણે ચેન્નઈ સુપર કિંગ્સના કેપ્ટન રવીન્દ્ર જાડેજા સામે આ સિદ્ધિ મેળવી હતી.ટોસ હારીને પહેલા બેટિંગ કરતા મુંબઈએ સાત વિકેટ પર 155 રન બનાવ્યા.તિલક વર્માએ 51 અને સૂર્યકુમાર યાદવે 32 રનનુ યોગદાન આપ્યુ.ચેન્નઈ તરફથી મુકેશ ચૌધરીએ ત્રણ અને ડ્વેન બ્રાવોએ બે વિકેટ લીધી.જવાબમાં ચેન્નઈએ છેલ્લા બોલ પર મેચ જીતી લીધી.સીએસકે તરફથી અંબતિ રાયડૂએ 40 અને રોબિન ઉથપ્પાએ 30 રનની ઈનિંગ રમી.મુંબઈ તરફથી ડેનિયલ સેમ્સએ સૌથી વધારે ચાર અને જયદેવ ઉનડકટે બે ખેલાડીઓને આઉટ કર્યા હતા.