– એશિયન અર્થવ્યવસ્થામાંથી વિદેશી રોકાણકારોએ 26 અબજ ડોલર પરત ખેંચ્યા
વોંશિગ્ટન : કોરોના વાયરસરૂપી મહામારીના કારણે બે માસથી વધુ સમયના લોકડાઉનના કારણે વૈશ્વિક આર્થિક મંદીના વધુ ઘટાટોપ બનતાં જઈ રહ્યા છે.ત્યારે વિદેશી રોકાણકારોએ એશિયન અર્થકારણમાંથી અંદાજે 26 અબજ અમેરિકી ડોલર અને ભારતમાંથી 16 અબજ અમેરિકી ડોલરનો પરત ઉપાડ કરી લીધો છે. અમેરિકી કોંગ્રેસના એક અહેવાલમાં આ વાત રજૂ કરાઈ છે.
અમેરિકી કોંગ્રેસની એક સ્વતંત્ર સંશોધન કેન્દ્ર દ્વારા કોવિડ-19 વાયરસના વૈશ્વિક આર્થિક પ્રભાવોનું મૂલ્યાંકન કરવામાં આવ્યું હતું.ત્યારબાદ તાજેતરમાં એક અહેવાલ જારી કરાયો છે.જેમાં જણાવ્યું છે કે વિદેશી રોકાણકારોએ વિકાસશીલ એશિયન અર્થકારણમાંથી અંદાજે 26 અબજ ડોલર અને ભારતમાંથી 16 અબજ ડોલરથી વધુ રકમ પરત ખેંચી લીધી છે.આ અહેવાલમાં એમ પણ જણાવાયું છે કે યૂરોપમાં જર્મની,ફ્રાન્સ,બ્રિટન,સ્પેન અને ઈટાલીમાં ત્રણ કરોડથી વધુ લોકોએ સરકારી સહાય માટે દાવેદારી કરી છે.વર્ષ 2020ની પ્રથમ ત્રિમાસિકના આંકડા પરથી સંકેત મળે છે કે યૂરો ક્ષેત્રની અર્થવ્યવસ્થામાં 3.8 ટકાની ઓટ આવી છે.વર્ષ 1995 પછીનો આ સૌથી મોટો કડાકો છે. રિપોર્ટ મુજબ અમેરિકામાં વર્ષ 2020ની પ્રથમ ત્રિમાસિક જીડીપીમાં 4.8 ટકાનો ઘટાડો નોંધાયો છે.જે વર્ષ 2008ના વૈશ્વિક નાણાંકીય સંકટ પછીનો સૌથી મોટો ઉલટફેર છે.
સંશોધન કેન્દ્રના રિપોર્ટ મુજબ વિશ્વમાં મોખરાનું સ્થાન ધરાવતી મોટાભાગની અગ્રણી અર્થવ્યવસ્થાઓને કોરોના વાયરસના પ્રકોપથી ભારે ભરખમ નુકસાન વેઠવાનો વારો આવ્યો છે.તેમ છતાં માત્ર ત્રણ દેશમાં ચીન, ભારત અને ઈન્ડોનેશિયામાં વિકાસ દર વર્ષ 2020માં હકારાત્મક રહેવાનો અંદાજ છે. વિકાસશીલ અને વિકસિત દેશો વચ્ચે આર્થિક નીતિઓને કારણે ચાલી રહેલો તનાવ અને તેને પગલે સંબંધોમાં તંગદિલી પણ આર્થિક પ્રવાહો માટે જવાબદાર બનવાનાં છે, તેમ રિપોર્ટમાં જણાવાયું છે. કોરોના વાયરસને કારણે દુનિયામાં મોટાભાગનાં અર્થતંત્રો સંકોચાઈ રહ્યાં છે ત્યારે ચીન, ઈન્ડોનેશિયા અને ભારતીય અર્થતંત્રમાં નાના પણ મકક્મ પાયા પર આર્થિક પ્રગતિ બની રહેશે તેમ રિપોર્ટમાં કહ્યું છે.ઉલ્લેખનીય છે કે તાજેતરમાં આઈએમએફએ તેના રિપોર્ટમાં કહ્યં હતું કે,આવનારાં સમયમાં વૈશ્વિક આર્થિક રિકવરી નબળી રહેશે કેમકે, કોરોનાને કારણે લોકોનો વિશ્વાસ તૂટ્યો છે. બિઝનેસ બંધ થયા છે અને ઘરગથ્થુ બચતોમાં ભંગાણ પડ્યું છે.કોરોના વાયરસની બીમારીને કારણે દુનિયાભરમાં એરપોર્ટ બંધ થઈ ગયાં છે.ફ્લાઈટ સેવાઓ બંધ છે.કોઈપણ પ્રકારની ઉદ્યોગ પ્રવૃત્તિ બંથ થઈ ગઈ છે.સ્કૂલો બંધ થતાં દોઢ અબજ બાળકો ભણી શકતાં નથી.
