નવસારી : નવસારીના મામલતદાર,નાયબ મામલતદાર,સહિત ચાર વ્યક્તિ તંત્રમાં મળેલા પોતાના પાવર્સનો ખોટો ઉપયોગ કરીને દમદાટી આપી એક વ્યક્તિને પોતાના ટ્રક્સ છોડાવવા માટે રૂ.1,10,000ની લાંચ માગતા હતા.જોકે આ લાંચ લેતી વખતે એસીબીના છટકામાં તેઓ ભરાઈ પડ્યા હતા અને એસીબીએ તેમને રંગે હાથ પકડી લીધા હતા.
ફરીયાદી માટી ખનન અંગેની પરમીટ મેળવી છુટક માટી વેચાણ કરવાનો ધંઘો કરતા હોવાથી અને માટીના ટ્રક્સ રોયલ્ટી પાસ હોવા છતા જમા કરેલા હતા તે ટ્રકો છોડાવા માટે ફરિયાદીએ આ કામના આરોપી નવસારી મામલતદાર યશપાલ પ્રકાશદાન ગઢવી (રહે. મામલતદાર ક્વાર્ટર, નવસારી) ને મળતા તેઓએ આરોપી સર્કલ ઓફિસર શૈલેષ એ. રબારી (રહે. સુરભી કોમ્પલેક્ષ નવસારી)ને મળી વ્યવહારની લેવડદેવડ કરી લેવા જણાવતા ફરિયાદી શૈલેષને મળતા તેઓએ આ કામના રૂ.૧,૧૦,૦૦૦/- ની લાંચની માંગણી કરી હતી અને જે-તે વખતે આ જ શૈલેષના કહેવાથી આરોપી નાયબ મામલતદાર સંજય ઈશ્વર દેસાઈ (રહે. સુરભી કોમ્પલેક્ષ, નવસારી)ને ફરિયાદીએ રૂ.૨૦,૦૦૦/- લાંચ પેટે આપેલા અને બાકીના રૂ. ૯૦,૦૦૦/- આપવાના બાકી હતા અને આરોપી યશપાલ,શૈલેષ અને સંજયએ એકબીજાની મેળાપીપણામાં રૂ. ૯૦,૦૦૦/- લાંચ પેટે માંગણી કરતા હતા.
જે લાંચની રકમ ફરિયાદી આપવા માંગતા ન હતા જેથી ફરિયાદીએ નવસારી એ.સી.બી.નો સંપર્ક કરી ફરિયાદ આપતા આજે લાંચનું છટકું ગોઠવાયું હતું.છટકા દરમ્યાન આ કેસમાં મામલતદાર ફરિયાદીને લાંચની રકમ આરોપી શૈલેષને આપવા જણાવ્યું હતું.જેથી ફરિયાદી શૈલેષને મળતા શૈલેષેએ ફરિયાદી સાથે રૂબરૂ વાતચીત કરી લાંચની રકમની માંગણી કરી અને તે લાંચની રકમ રૂ. ૯૦,૦૦૦/- સંજયને આપવા જણાવ્યું હતું.સંજયએ લાંચની રકમ સ્વીકારી આ લાંચની રકમ આરોપી ક્લાર્ક કપિલ રસિક જેઠવા (રહે. મહાવીર રો હાઉસ, નવસારી)ને આપી એકબીજાની મદદગારી કરી પકડાઈ ગયા હતા.
