– ગુજરાત અર્બન ડેવલપમેન્ટ કંપની લિમિટેડે રાજ્ય વતી હિસ્સો ખરીદ્યો
મુંબઈ : દેવા હેઠળ ફસાયેલા IL&FSએ સોમવારે કહ્યું હતું કે તેણે ગુજરાત ઈન્ટરનેશનલ ફાઈનાન્સ ટેક-સિટી(ગિફ્ટ સિટી)માં 50 ટકા હિસ્સો ગુજરાત સરકારને વેચી દેવાની પ્રક્રિયા પૂરી કરી લીધી છે અને તેની ઈક્વિટી વેલ્યૂ પેટે ~32 કરોડ ઊભા કર્યા છે અને તેનું કુલ દેવું ~1200 કરોડ ઓછું કર્યું છે.
ગુજરાત સરકાર વતી ગિફ્ટ સિટીમાં IL&FSનો હિસ્સો ગુજરાત અર્બન ડેવલપમેન્ટ કંપની લિમિટેડ (GUDCL)એ ખરીદ્યો હતો. IL&FSને આ હિસ્સો વેચવા પેટે ~32.71 કરોડ મળ્યા હોવાનું ગ્રુપે કહ્યું હતું.નેશનલ કંપની લો ટ્રિબ્યુનલ (NCLT)એ ગયા મહિને આ હિસ્સો વેચવા માટે તેને મંજૂરી આપી હતી.
IL&FSએ વધુમાં કહ્યું હતું કે આ હિસ્સો વેચીને તેણે અત્યાર સુધીમાં કુલ તેનું દેવું ~1230 કરોડ ઓછું કર્યું છે.ગ્રુપનું કુલ દેવું ~94,000 કરોડ છે. GUDCL ગિફ્ટ સિટીમાં બાકીનો 50 ટકા હિસ્સો ધરાવે છે.તેણે તેમાં IL&FSનો હિસ્સો ખરીદવા માટે ઓફર કરી હતી.સંયુક્ત સાહસ કરાર હેઠળ હિસ્સો વેચવા અંગે તેને સૌપ્રથમ અધિકાર હતો.કમિટી ઓફ ક્રેડિટર્સ સમક્ષ GUDCLની ઓફર મૂકવામાં આવી હતી અને તેને મંજૂરી આપવામાં આવી હતી.કમિટીના 80.09 ટકા સભ્યોએ દરખાસ્તની તરફેણમાં મતદાન કર્યું હતું.
ગિફ્ટ સિટી રિયલ એસ્ટેટ ડેવલપમેન્ટના બિઝનેસમાં સક્રિય છે અને તે અમદાવાદ-ગાંધીનગર રિજનમાં ઈન્ટરનેશનલ ફાઈનાન્શિયલ સર્વિસીઝ ડેવલપ કરી રહી છે, જેમાં ડિઝાઈન,મેઈન્ટેનન્સ,ફાઈનાન્સિંગ,ઓપરેશન અને મેઈન્ટેનન્સનો સમાવેશ થાય છે.
