દિવાળી પૂર્વે ગુજરાતમાં ફરી ઇન્કમટેક્ષનું દરોડા ઓપરેશન

રાજકોટ, તા. પ : કોરોનાના ગભરાટમાંથી બહાર નીકળીને વેપાર ઉદ્યોગની ગાડી માંડ પાડે ચડી રહી છે અને દિવાળીમાં સારા વેપાર ધંધાની આશા છે.તેવા સમયે તહેવારો ટાણે જ આવકવેરા ખાતાએ ફરી એક વખત દરોડા ઓપરેશન હાથ ધર્યુ છે.ગોધરા,વડોદરા તથા ડાકોરમાં રીયલ એસ્ટેટ ગ્રુપ પર મોટાપાયે દરોડા કાર્યવાહી શરૂ કરવામાં આવી છે.
આવકવેરા ખાતાના માહિતગાર સુત્રોએ જણાવ્યું છે કે ગોધરામાં સોની બ્રધર્સ તરીકે મોટું નામ ધરાવતા બિલ્ડર ગ્રુપ ઉપર આજે દરોડા કાર્યવાહી હાથ ધરવામાં આવી છે.શહેરમાં એક ડઝનથી વધુ સ્થળોએ દરોડા પાડવામાં આવ્યા છે.બિલ્ડરના નિવાસસ્થાન તથા ઓફિસો અને તેમની સાથે સંકળાયેલા લોકોની ઓફિસોને ઝપટે લેવામાં આવી છે.આ સિવાય વડોદરા તથા ડાકોરમાં પણ બિલ્ડર જુથ પર દરોડા ઓપરેશન હાથ ધરવામાં આવ્યું છે.દિવાળીના તહેવારો ટાણે જ આવકવેરાના દરોડા ઓપરેશનથી બિલ્ડર લોબીમાં ફફડાટ ઉભો થયો છે.એવી ચર્ચા છે કે દરોડાના નિશાન બનેલા બિલ્ડર જુથો રાજકીય કનેકશન ધરાવે છે જેને પગલે સમગ્ર વેપાર ઉદ્યોગમાં ચર્ચાએ જોર પકડયું છે.ગોધરા,વડોદરા તથા ડાકોરમાં હાથ ધરાયેલી દરોડા કાર્યવાહીમાં રાજકોટથી અધિકારીઓની ટીમ તેડાવવામાં આવી છે.રાજકોટના એક ડઝનથી વધુ સહિત 100થી વધારેનો અધિકારીઓનો કાફલો દરોડા ઓપરેશનમાં સામેલ થયો છે.છેલ્લા બે મહિનાથી રીયલ એસ્ટેટ ક્ષેત્રમાં વેપાર વધવા લાગ્યા છે.તેવા સમયે આ દરોડા કામગીરી દરમ્યાન મોટી રકમની કરચોરી તથા બેનામી વ્યવહારોનો પર્દાફાશ થવાની આશંકા વ્યકત કરવામાં આવી રહી છે.