– 2016માં 11 વોર્ડમાં 44 બેઠકો પર યોજાયેલી ચૂંટણીમાં ભાજપને બહુમતી મળી હતી પરંતુ પ્રોજેકટો પૂર્ણ કરવામાં અસફળતા
વાપી : વાપી પાલિકાની વર્તમાન બોડીના ચાર વર્ષ પૂર્ણ થયા છે.પરંતુ આ ચાર વર્ષમાં શહેરના અનેક પ્રોજેકટો અધુરા છે.જેમાં શહેરના મહત્વનો રિંગરોડનો પ્રોજેકટ હજુ સુધી પૂર્ણ થઇ શકયો નથી.જયારે વાપી જુના ફાટક પાસે સબ વે,સિટી બસ સેવા,ડમ્પિંગ સાઇટને વિકસાવાવની કામગીરી સહિતના પ્રોજેકટો અધુરા છે અથવા હજુ કામગીરી થઇ શકી નથી.જેથી આગામી એક વર્ષમાં અધુરા પ્રોજેકટોને પૂર્ણ કરવાનો સૌથી મોટો પડકાર શાસકોને રહેશે.
વાપી પાલિકાની ચૂંટણી વર્ષ 2016ના નવેમ્બરના અંતમાં યેજાઇ હતી. જેમાં 11 વોર્ડની કુલ 44 માંથી 41 બેઠકો પર ભાજપ અને 3 બેઠકો કોંગ્રેસને મળી હતી. ડિસેમ્બર 2016માં સમિતિની રચના સાથે ભાજપના શાસનનો પ્રારંભ થયો હતો.ડિસેમ્બર 2020માં વર્તમાન પાલિકાના શાસકોના ચાર વર્ષ પૂર્ણ થાય છે.આમ છતાં જાહેરાત કરેલા અનેક પ્રોજેકટો અધુરા છે.
રિંગ રોડ: 5 કરોડનો પ્રોજેકટ
નવા રેલવે અંડરબ્રિજથી રોફેલ કોલેજ તરફના રીંગરોડની મોટા ભાગની કામગીરી પૂર્ણ થઇ છે,એક જમીનના અભાવે પ્રોજેકટ હજુ પણ અધુરો છે.વાપી જુના રેલવે ફાટક પાસે સબ વે બનાવવા મંજુરી રેલવે આપી છે,પરંતુ સ્થળ પર હજુ કોઇ કામગીરી શરૂ થઇ શકી નથી.સિટી બસ સેવાની વહીવટી પ્રક્રિયા તથા મંજુરીની પ્રક્રિયા પૂર્ણ થઇ છે,પરંતુ હજુ સુધી સિટી બસનો પ્રારંભ થયો નથી.જયારે પાલિકાની ચંડોર ખાતે ડમ્પિંગ સાઇટને હાલ વિકસાવવાની કામગીરી ચાલી રહી છે.આ પ્રોજેકટને પૂર્ણ થતાં હજુ ઘણો સમય લાગી શકે તેમ છે.આમ પાલિકાના વર્તમાન શાસકોના 4 વર્ષ પૂર્ણ થયા છે.છતાં પણ અનેક પ્રોજેકટ અધુરા છે.
વર્ષો પછી ભુગર્ભ ગટર યોજનાની કામગીરી બાકી
છેલ્લા 5થી વધુ વર્ષથી ભુગર્ભ ગટર યોજનાની કામગીરી વાપી શહેરમાં ચાલી રહી છે.અમુક વિસ્તાર બાકી રહી જતાં ફરી વખત સરકારે નાણાંની જોગવાઇ કરી હતી,આમ છતાં હજુ પણ 100 ટકા ભુગર્ભ ગટર યોજનાનો પ્રોજેકટ પૂર્ણ થઇ શકયો નથી.ફ્રીશ માર્કેટનો પ્રોજેકટ પણ વિંલબમાં છે.ખાસ કરીને પાલિકાના શાસકોએ ભુગર્ભ ગટર યોજનાની કામગીરી 100 ટકા પૂર્ણ થાય તે દિશંમાં જીયુડીસી સાથે સંકલન કરી પ્રશ્ન ઉકેલવો જોઇએ.
