– બોગસ કંપનીઓના રજિસ્ટ્રેશન કરાવી કોઈપણ પ્રકારની વસ્તુના ખરીદ-વેચાણ કર્યા
અમદાવાદ : GST અધિકારીઓએ ગત ડિસેમ્બર મહિનામાં ~ 555 કરોડના બોગસ બિલિંગ કૌભાંડનો પર્દાફાશ કર્યો છે.ડિપાર્ટમેન્ટ લાંબા સમયથી શંકાસ્પદ કંપનીઓ-વ્યક્તિઓના વ્યવહારો પર વોચ રાખીને દરોડા પાડવાની કામગીરી કરી હતી.ઊંઝા અને સુરતમાંથી જ ~ 555 કરોડના બોગસ બિલકૌભાંડનો પર્દાફાશ કરવાની સાથે છ કૌભાંડીને ઝડપી લેવાયા છે.તટસ્થ તપાસ કરવામાં આવે તો ચોક્કસ મોટામાથાઓની સંડોવણી છતી થાય તેવી પ્રબળ સંભાવના છે.
બિલ વગર ધંધો કરતાં વેપારીઓ કોઈપણ કર ચૂકવતા હોતા નથી.આવા વેપારીઓ બિલથી ધંધો કરે અને સરકારને નફા પર કર ચૂકવે તે માટે GST અમલી થયો છે.GST અમલને ત્રણ વર્ષ થઇ ગયા છે. GST હેઠળ સંખ્યાબંધ વેપારીના GST રજિસ્ટ્રેશન થયા છે અને સરકારની આવકમાં વધારો પણ થયો છે.
બીજી બાજુ,દેશમાં એવા વેપારીઓ પણ છે કે જેમણે GSTનો અમલ શરૂ થયો ત્યારથી બિલ વગર જ ખરીદ વેચાણ કરવાનું શરૂ કરી દીધું છે.કેટલાક કૌભાંડીઓએ આ કાયદાનો ગેરલાભ ઊઠાવવા માટે માત્રને માત્ર બોગસ કંપનીઓના રજિસ્ટ્રેશન કરાવી કોઈપણ પ્રકારની વસ્તુના ખરીદ-વેચાણ કર્યા વગર બોગસ બિલો જનરેટ કરી સરકાર પાસેથી ખોટી રીતે ઇનપુટ ટેક્સ ક્રેડિટ પડાવવાનો ધંધો શરૂ કરી દીધો છે.આ પરિસ્થિતિમાં ગુજરાતમાં તો જાણે બોગસ બિલ જનરેટ કરવાનો જ નવો ધંધો ફૂલીફાલી રહ્યો હોય તેવો ઘાટ છે.
સુરતના ઉમંગ પટેલે બિલ્ડિંગ મટિરિયલની 21 બોગસ કંપનીઓ બનાવી 219 કરોડના બોગસ બિલ જનરેટ કર્યા
GST અધિકારીઓ રિટર્નની તપાસ કરતા હતા ત્યારે સુરતના ઉમંગ જોગેશભાઈ પટેલ દ્વારા ઓપરેટ કરતી 21 કંપનીના વ્યવહાર શંકાસ્પદ લાગતા તેની તપાસ શરૂ કરાઈ.જેમાં એવું સ્પષ્ટ થયું કે ઉમંગે કોઈપણ પ્રકારના બિલ્ડિંગ મટિરિયલની ખરીદ વેચાણ કર્યા વગર માત્ર પોતાની જ કંપનીઓમાં બોગસ ખરીદ-વેચાણના બિલ જનરેટ કરી સરકાર પાસેથી ખોટી રીતે 40 કરોડની ઇનપુટ ટેક્સ ક્રેડિટ ઘર ભેગી કરી હતી.અધિકારીઓએ તેને ઝડપી લે તે પહેલાં જ તે વિદેશ ભાગી ગયો હતો. તપાસ ઢીલી પડતા સુરત પાછા આવેલા ઉમંગને ઝડપી લેવામાં અધિકારીઓને સફળતા મળી છે.
સુરતના સંજય દૂધવાળાએ ઓઇલ અને કેમિકલના 83 કરોડના બોગસ બિલ જનરેટ કર્યા
ઓઇલ અને કેમિકલની લે-વેચ કરતી કંપનીઓ દ્વારા કરોડોના ઇનવોઇસની વિગતો અધિકારીઓના ધ્યાને આવતા તેની તપાસ શરૂ કરવામાં આવી ત્યારે સ્પષ્ટ થયું હતું કે ચોક્કસ પાંચ કંપનીઓ જ એકબીજા પાસેથી ખરીદ વેચાણ કરી રહી છે.તપાસમાં સ્પષ્ટ થયું કે સુરતના માસ્ટર માઈન્ડ સંજય ઇશ્વરભાઇ દૂધવાળાએ પાંચ કંપનીઓ રજિસ્ટર કરાવી તેમાં જ બોગસ ખરીદ-વેચાણના 83 કરોડના બિલ જનરેટ કરી સરકારને 12 કરોડનો ચૂનો લગાવ્યો હતો. આ પ્રકરણમાં સંજયની ધરપકડ કરી તપાસ કરવામાં આવી રહી છે.
ઊંઝાના સુપ્રીમ પટેલે 144 કરોડના બોગસ ઈ-વે-બિલ જનરેટ કર્યા
ઊંઝા બોગસ બિલિંગ કૌભાંડમાં ગુજરાતમાં અવ્વલ છે. GST અધિકારીઓએ ઊંઝામાં સર્ચ ઓપરેશન હાથ ધર્યું ત્યારે ટ્રાન્સપોર્ટ કોર્પોરેશનના સુપ્રીમ જિતેન્દ્ર પટેલની ઓફિસમાં અને ઘરમાંથી કોઈ જ વિગતો મળી નહોતી.સુપ્રીમ પટેલનો મોબાઇલ ફોન ચેક કરતા જાણે કે અધિકારીઓને લોટરી લાગી હતી.તેના મોબાઈલ ફોનમાં તમામ બોગસ કંપનીઓના GST નંબરની વિગતો હતી અને એક્સેલ ફાઇલમાં તમામ બોગસ બિલોની પણ વિગતો હતી.અધિકારીઓને તેના લોગઇન આઈડી અને પાસવર્ડ પણ મળી ગયા હતા. તેથી તપાસ કરતા
~ 144 કરોડના બોગસ ઈ-વે-બિલ જનરેટ થયા હોવાની વિગતો ખુલી હતી.સુપ્રીમ પટેલ સાથે અમદાવાદ,મહેસાણા,વડનગર,ઊંઝા,સિદ્ધપુર,હિંમતનગરના પણ કેટલાક વેપારીઓ સંડોવાયેલા હોવાની વિગતો મળી હતી. તપાસ કરતા ઘણા મોટામાથાંની સંડોવણી સામે આવી રહી છે. સુપ્રીમ પટેલની તપાસના આધારે ઊંઝામાંથી જ વધુ એક બોગસ બિલિંગ કૌભાંડ સામે આવ્યું હતું.
અમિત ઉર્ફે ટોમી,સંજય માધા અને હિરેન પટેલે 109 કરોડના બોગસ બિલ જનરેટ કર્યા
GST અધિકારીઓ ઊંઝામાં રેડ પાડે અને બોગસ બિલિંગ કૌભાંડમાં સ્થાનિક માસ્ટર માઇન્ડ સંજય પ્રહલાદભાઈ પટેલ ઉર્ફે સંજય માધાની સંડોવણી આવે નહીં તે અશક્ય છે. અધિકારીઓએ ઊંઝાની 40 પેઢી પર દરોડા પાડી તપાસ શરૂ કરતાં પ્રાથમિક તપાસમાં જ ~ 109 કરોડના બોગસ બિલિંગ કૌભાંડની વિગતો સામે આવી હતી. જેના મુખ્ય સૂત્રધાર અમિત રમેશભાઈ પટેલ ઉર્ફે ટોમી, સંજય પ્રહલાદભાઈ પટેલ ઉર્ફે સંજય માધા તથા હિરેન મોહનભાઈ પટેલ હોવાનું છતું થયું હતું. ટોમી અને સંજય માધાને ઝડપી લેવામાં અધિકારીઓ સફળ થયા હતા પરંતુ હિરેન અધિકારીઓને અંબાજીથી આબુ, આબુથી ઉદયપુર અને ઉદયપુરથી અંબાજી દોડાવ્યા બાદ હાથ લાગ્યો હતો.હિરેન પાસેથી પેનડ્રાઈવ,ઘણા દસ્તાવેજો,ભાડા કરાર,મોબાઈલ અને અન્ય ઘણા વાંધાજનક દસ્તાવેજો મળ્યા હતા. ત્રણેની ધરપકડ કરી અધિકારીઓ પૂછપરછ કરી રહ્યા છે.
આરોપી પરેશ ચૌહાણની સારવાર GST અધિકારીઓએ કરાવવી પડી હતી
સૌથી મોટું કૌભાંડ કરનાર પરેશ ચૌહાણને GST અધિકારીઓએ ઝડપી લીધા બાદ પૂછપરછ દરમિયાન તેની તબિયત લથડતા તેને હોસ્પિટલમાં દાખલ કરવો પડ્યો હતો.અધિકારીઓએ ડિપાર્ટમેન્ટના ખર્ચે તેની સારવાર કરાવી સ્ટેન્ટ મૂકવા પડ્યા હતા.અધિકારીઓને હોસ્પિટલમાં તેની સેવા ચાકરી માટે ખડે પગે હાજર પણ રહેવું
પડ્યું હતું.
લાખો કંપનીના રજિસ્ટ્રેશન રદ કરાયા છતાં રોજેરોજ સંખ્યાબંધ નવી બોગસ કંપનીઓ નોંધાઇ રહી છે
બોગસ બિલિંગ કૌભાંડની મોડેસ ઓપરેન્ડી છતી થતાં સરકારે આવી કંપનીઓના રજિસ્ટ્રેશન રદ કરવાની કવાયત હાથ ધરી હતી.આ કવાયત દરમિયાન દેશભરમાં લાખો કંપનીઓના રજિસ્ટ્રેશન રદ્દ કરવામાં આવ્યા છે અને તે પ્રક્રિયા હજુ અવિરત ચાલી રહી છે.રોજેરોજ સંખ્યાબંધ નવી બોગસ કંપનીઓના રજિસ્ટ્રેશન થઈ રહ્યા છે.આવી બોગસ કંપની નોંધણી થતી અટકે તે માટે અધિકારીઓ યોગ્ય ઉપાય શોધી રહ્યા છે.
