ભરૂચના ટંકારીયાની મુસ્લિમ યુવતી સાથે પ્રેમ લગ્ન કરનાર શહેરના તરસાલી વિસ્તારના એન્જિનિયર યુવકને તેના પરિવારના સભ્યોને મારી નાંખવાની ટેલિફોન ઉપર ધમકીઓ આપીને લગ્ન નોંઘણી માટે સરકારી ઓફીસમાં આપેલી અરજી યુવક પાસે રદ કરાવી દીધી છે.મુસ્લિમ યુવતીના પિતા તથા સાગરીત તરફથી અપાયેલી ધમકીના પગલે ફફડી ઉઠેલાં હિન્દુ યુવકે મકરપુરા પોલીસ સ્ટેશનમાં ફરીયાદ આપી છે.પોલીસે એફઆઈઆર નોંધીને તપાસનો દોર ભરૂચ ટંકારીયા સુધી લંબાવ્યો છે.
શહેરના તરસાલી હાઈવે પર દ્વારકેશ હાઈવ્યૂમાં રહેતા ધ્રવેશ પંચાલ સાંકરદાની ખાનગી કંપનીમાં ડિઝાઈનર એન્જિનિયર તરીકે નોકરી કરે છે.ગત 2016માં ધ્રવેશની દાદી સરલાબેનના આંખોના મોતીયાનું ઓપરેશન કરવાનું હતું જેથી તેમને કરજણ ખાતે વલણ હોસ્પિટલમાં દાખલ કર્યા હતા.ધ્રુવેશ દાદીની સેવા કરવા હોસ્પિટલમાં રોકાયો હતો.હોસ્પિટલમાં નોકરી કરતી ભરૂચ ટંકારીયાની નર્સ આસ્મા સાથે આંખો મળી હતી અને પ્રેમ પાંગર્યો હતો.આ દરમિયાનમાં આસ્મા હોસ્પિટલમાંથી નોકરી છોડીને દુબઈ ગઈ હતી અને ત્યાં આસી. ટીચર તરીકે નોકરી કરતી હતી.ગત ઓક્ટોબર માસમાં તે લગ્ન કરવા માટે સ્પેશિયલ વડોદરા આવી હતી અને બન્ને જણાંએ રજિસ્ટર મેરેજ કર્યા હતા.જેની નોંધણી કરવા માટે કુબેર ભવન ખાતેની સરકારી કચેરીમાં લગ્ન નોંધણી અંગેની અરજી કરી હતી.
ભરૂચ ટંકારીયા ખાતે રહેતાં આસ્માના પિતાને જાણ થતાં તેમણે ધ્રુવેશના મોબાઈલ ઉપર અનેક વખત ફોન કર્યા હતા અને 24 કલાકમાં લગ્ન નોંધણી અંગેની અરજીનો પ્રોસીજર રદ નહીં કરે તો તને અને મારા પરીવારના સભ્યોને જાનથી મારી નાંખીશ તેવી ધમકી આપી હતી.ફોન ઉપર મળેલી ધમકીઓથી ભયભીત થયેલા ધ્રુવેશ પંચાલે તા.16મી ઓક્ટોબરે સરકારી કચેરીમાં જઈને પ્રોસીજર રદ કર્યો હતો.આ સમયગાળા દરમિયાન દુબઈમાં આસ્મા સાથે ફોન ઉપર વાત થતાં તે ભરૂચ ખાતે દોડી આવી હતી.તેના ઘરમાંથી બહાર નીકળવા ઉપર પણ નિયંત્રણો લાદ્યા હતા.હવે આસ્મા સાથે સંબંધ રાખ્યા છે તો તને અને આસ્માને પણ જાનથી મારી નાંખીશું તેવી ધમકી આપતાં ધ્રવેશે મકરપુરા પોલીસ સ્ટેશનમાં ફરીયાદ આપી હતી.પોલીસે આરોપી તરીકે ઈકબાલ કોઢીયા (રહે, ટંકારીયા ભરૂચ) અને આબીદ પટેલ (રહે, વલણ, કરજણ) સામે આઈ.પી.સી 507 અને 114 હેઠળ એફ.આઈ.આર નોંધીને ધરપકડના ચક્રો ગતિમાન કર્યા છે.
3જી જાન્યુઆરીએ આસ્માનો મેસેજ આવ્યો તું આવીને મને લઈ જા…!
મકરપુરા પોલીસ સ્ટેશનમાં નોધાયેલી ફરિયાદમાં એવો પણ આક્ષેપ થયો છે કે,આસ્માના પિતા ઈકબાલે ધમકી આપી હતી કે, હજુ પણ તું મારી છોકરી સાથે વાત કરે છે હવે કરીશ તો તું જીવતો નહીં રહે,તે દિવસે જ આસ્માનો ફોન આવ્યો હતો. તેણીએ કહ્યું હતું કે,મારા પપ્પાએ મને પણ મારી છે.આ ફોન પછી બન્ને જણાં વચ્ચે વાતચીત ઓછી થઈ ગઈ હતી. તા. 25મી ઓક્ટોબરે આસ્માનો ફોન આવ્યો હતો અને જણાવ્યું કે મારા પપ્પાએ મારો ફોન નંબર બદલી નાંખ્યો છે અને હવેથી આપણે વાતચીત કરવાનું બંધ કરી દઈશું,મને દુબઈ જવાની પણ ના પાડી દીધી છે.તાજેતરમાં તા.3જી જાન્યુઆરીએ આસ્માનો વોટ્સએપ મેસેજ આવ્યો હતો કે મને લઈ જા તું આવીને,શું થયું તેવો વળતો મેસેજ કરતા કોઈ રીપ્લાય આવ્યો નહતો.એક કલાક પછી ધ્રુવેશે ફોન કરતા આબીદ પટેલ નામના વ્યક્તિએ ફોન રીસીવ કર્યો હતો અને જાનથી મારી નાંખવાની ધમકી આપી હતી.
