– ગત ચુંટણીમાં રાજ્યની તમામ મનપામાં સુરત મનપાનું સૌથી ઓછું 39 ટકા મતદાન નોંધાયું હતું
સુરત : સુરત મહાનગર પાલિકાની ચુંટણીને હવે ગણતરીનાં કલાકો બાકી છે ત્યારે ચુંટણી પંચ અને વહીવટી તંત્ર દ્વારા આજે ઈવીએમ મશીનોની ફાળવણી સહિતની કામગીરી હાથ ધરવામાં આવી હતી. સુરત મહાનગર પાલિકાના 30 વોર્ડમાં યોજાનાર ચુંટણી માટે વહીવટી તંત્ર સજ્જ થઈ ચુક્યું છે. 30 વોર્ડ માટે 15 રિટર્નિંગ ઓફિસરો દ્વારા આજરોજ ચુંટણીલક્ષી કામગીરીમાં સંકળાયેલા કર્મચારીઓને તાલીમ પૂર્ણ કરીને જે તે બુથ મથકની ફરજ સોંપી દેવામાં આવી છે.સુરત મહાનગર પાલિકાની ચુંટણી માટે 3185 મતદાન મથકોની વ્યવસ્થા કરવામાં આવી છે. જેમાં પ્રત્યેક મતદાન મથક દીઠ સરેરાશ 1032 મતદારો નોંધાયા છે.જો કે,આ વખતે કોરોના મહામારીને પગલે બીએલઓ સહિત ચુંટણી સ્ટાફ દ્વારા ઘરે – ઘરે મતદાન સ્લીપની ફાળવણી કરવામાં આવી નથી.બીજી તરફ રાજકીય પાર્ટીઓ પણ હજી સુધી મતદારો સુધી મતદાન સ્લીપ પહોંચાડવામાં અસક્ષમ સાબિત થઈ રહી છે.આ સ્થિતને પગલે આવતીકાલે સુરત મહાનગર પાલિકાના મતદાન પર સીધી અસર જોવા મળશે.
સને 2015માં રાજ્યભરની મહાનગર પાલિકાઓની યોજાયેલ ચુંટણીમાં સૌથી ઓછું સુરત મહાનગર પાલિકામાં મતદાન થયું હતું.સુરત મહાનગર પાલિકાની ગત ચુંટણીમાં માત્ર 39.63 ટકા મતદાન નોંધાવા પામ્યું હતું. જ્યારે જામનગર મનપામાં સૌથી વધુ 56 ટકાથી વધુ મતદાન નોંધાયું હતું.જો કે,આ વખતે કોરોના મહામારીને પગલે ચુંટણી પંચ દ્વારા બી.એલ.ઓ. દ્વારા ઘરે – ઘરે મતદાન સ્લીપના વિતરણની કામગીરી સ્થગિત કરવામાં આવી છે. જેને પગલે હજી સુધી મતદારોએ કયાં બુથ પર મતદાન કરવાનું છે તેની મુંઝવણ સતાવી રહી છે.ભાજપ – કોંગ્રેસ સહિતના રાજકીય પક્ષો દ્વારા પણ હજી સુધી મતદાતાઓને ચુંટણીની સ્લીપનું વિતરણ કરવામાં આવ્યું નથી.જેની સીધી અવસર રવિવારે યોજાનાર મતદાન પર પડી શકે તેમ છે. મહાનગર પાલિકાની ચુંટણીમાં હજી સુધી જોઈએ તેવો માહોલ જામ્યો નથી ત્યારે મતદારો સુધી મતદાન સ્લીપ પણ ન પહોંચતા આવતીકાલે સુરત મહાનગર પાલિકાની યોજાનાર ચુંટણીમાં ટકાવારી ઘટીને 30 પર પહોંચે તેવી આશંકા વ્યક્ત કરવામાં આવી છે.
2015 માં લિંબાયત – ઉધના માં થયું હતું સૌથી વધુ મતદાન
સુરત મહાનગર પાલિકાની સને 2015માં યોજાયેલ ચુંટણીમાં સરેરાશ મતદાન 39 ટકાની આસપાસ રહેવા પામ્યું હતું. જેમાં માત્ર બે વોર્ડ એવા હતા કે જ્યાં મતદાનની ટકાવારી 50 થી વધુ હતી જ્યારે મોટા ભાગના વોર્ડની ટકાવારી 30 થી 40 ની વચ્ચે રહેવા પામી હતી.ચુંટણી પંચના આંકડા અનુસાર ગત મહાનગર પાલિકાની ચુંટણીમાં સૌથી વધુ મતદાન ભારતીય જનતા પાર્ટીના ગઢ ગણાતા વોર્ડ નં. 24 લિંબાયત – ઉધના માં નોંધાયું હતું.આ વોર્ડમાં 53.24 ટકા મતદાન નોંધાયું હતું.આ સિવાય ગોડાદરા – ડિંડોલી વોર્ડ નં. 25માં 52 ટકા મતદાન નોંધાયું હતું. જ્યારે સૌથી ઓછા મતદાનની વાત કરીએ તો મહાનગર પાલિકાના વોર્ડ નં. 14 કરંજ – મગોબમાં માત્ર 25 ટકા મતદાન નોંધાયું હતું.
ઓછું મતદાન ભાજપને ફાયદો કરાવશે
ગત મહાનગર પાલિકાની ચુંટણીમાં ઓછા મતદાનનો સીધો લાભ કોંગ્રેસને થવા પામ્યો હતો.છેલ્લા 25 વર્ષમાં પહેલી વખત કોંગ્રેસ મજબુત વિરોધ પક્ષ તરીકે મહાનગર પાલિકામાં પહોંચ્યો હતો.જેમાં સૌથી વધુ લાભ પાટીદાર અનામત આંદોલનને લીધે કોંગ્રેસને થવા પામ્યો હતો.જો કે,આ વખતે સ્થિતિ બદલાઈ ચુકી છે.પાટીદાર અનામત આંદોલન સિમિત અને આમ આદમી પાર્ટી કોંગ્રેસને નુકસાન પહોંચાડી શકે છે જેનો સીધો લાભ ભારતીય જનતા પાર્ટીને મળશે તેમાં કોઈ બેમત નથી.આમ,ઓછી ટકાવારી વચ્ચે પણ ભારતીય જનતા પાર્ટીનું મોવડી મંડળ પોતાની નિશ્ચિત જીત સાથે કેટલી બેઠકો વધશે તેના પર ધ્યાન કેન્દ્રિત કરી રહ્યું છે.
આમ આદમી પાર્ટીથી કોંગ્રેસને નુકસાન
આવતીકાલે સુરત મહાનગર પાલિકાની યોજાનારી ચુંટણીમાં ચુંટણી સમીક્ષકોનું સૌથી વધુ ધ્યાન આમ આદમી પાર્ટીના પ્રદર્શન પર જોતરાયું છે.આમ આદમી પાર્ટી સુરત શહેરના અન્ય વોર્ડમાં ભલે કોઈ સીટ મેળવવામાં અસક્ષમ હોય પરંતુ પાટીદારોનું વર્ચસ્વ ધરાવતાં સરથાણાથી પુણા – પરવટ પાટીયા સુધીના વિસ્તારોમાં આ વખતે આમ આદમી પાર્ટી પોતાનું ખાતું ખોલવી શકે છે.પાટીદાર સમાજ પાસે આ ચુંટણીમાં માત્ર બે વિકલ્પને બદલે હવે આમ આદમી પાર્ટીનો ત્રીજો વિકલ્પ મળી ચુક્યો છે. જેનું સીધું નુકસાન કોંગ્રેસે ભોગવવું પડશે.
