લોકસભામાં વિપક્ષના નેતા રાહુલ ગાંધીના વિદેશ પ્રવાસને લઈને ભાજપે ફરી રાજકીય હુમલો તેજ કર્યો છે.ભાજપના રાષ્ટ્રીય પ્રવક્તા પ્રદીપ ભંડારીએ સોશિયલ મીડિયા પર પોસ્ટ અને પોસ્ટર શેર કરીને રાહુલ ગાંધી પર કટાક્ષ કર્યો છે.તેમણે આરોપ લગાવ્યો છે કે નવરાત્રિ દરમિયાન રાહુલ ગાંધી વિદેશ પ્રવાસે જઈને રજાઓ માણી રહ્યા છે.પ્રદીપ ભંડારીએ સોશિયલ મીડિયા પ્લેટફોર્મ ‘એક્સ’ પર કરેલી પોસ્ટમાં રાહુલ ગાંધીની કાર્યશૈલીને નિશાન બનાવી હતી.તેમણે લખ્યું કે રાહુલ ગાંધી એ જ કરી રહ્યા છે, જેમાં તેઓ સૌથી વધુ સમય વિતાવે છે,વિરામ લેવો અને રજાઓ માણવી. ભંડારીએ સવાલ ઉઠાવ્યો હતો કે નવરાત્રિ જેવા તહેવાર દરમિયાન રાહુલ ગાંધી ભારતમાં હાજર રહેવાને બદલે વિદેશમાં શું કરી રહ્યા છે.
ભાજપના પ્રવક્તાએ પોતાની પોસ્ટમાં રાહુલ ગાંધીના પ્રવાસને લઈને રાજકીય ટિપ્પણી કરતાં પૂછ્યું કે તેઓ વિદેશમાં રજાઓ માણી રહ્યા છે કે પછી પોતાના ‘અરાજકતાના સાથીદારો’ને મળવા ગયા છે.તેમણે રાહુલ ગાંધી પર કામ કરતાં મોજમસ્તીને વધુ મહત્ત્વ આપવાનો આરોપ લગાવ્યો હતો.સાથે જ ‘વોટ ચોરી’ના મુદ્દે કોંગ્રેસ દ્વારા કરવામાં આવતા વિરોધને પણ આકરા કટાક્ષ સાથે જોડ્યો હતો.ભંડારીએ શેર કરેલા પોસ્ટરમાં રાહુલ ગાંધીને પ્રવાસી અંદાજમાં દર્શાવવામાં આવ્યા છે.તેમાં તેઓ સનગ્લાસ,રંગીન ઉષ્ણકટિબંધીય શર્ટ અને શોર્ટ્સ પહેરીને હાથમાં સુટકેસ સાથે જોવા મળે છે.પોસ્ટરની પાછળ વિમાનનું ચિત્ર મૂકવામાં આવ્યું છે, જે તેમના વિદેશ પ્રવાસ તરફ સંકેત કરે છે.
પોસ્ટરમાં મોટા અક્ષરોમાં ‘રાહુલ ગાંધી ફરી રજા પર!’ લખવામાં આવ્યું છે. તેની સાથે ‘દેશમાં સવાલોની ગરમી વધી, તો રાહુલજી વિદેશની હવા ખાવા નીકળી પડ્યા!’ અને ‘હોલિડે મોડ: ચાલુ’ જેવા વાક્યો મૂકીને ભાજપે તેમના પર વ્યંગ કર્યો છે.આ પોસ્ટર દ્વારા પક્ષે રાહુલ ગાંધીની રાજકીય સક્રિયતા અને જવાબદારી અંગે સવાલો ઊભા કરવાનો પ્રયાસ કર્યો છે.રાહુલ ગાંધીના વિદેશ પ્રવાસનો મુદ્દો ભાજપ અને કોંગ્રેસ વચ્ચેના રાજકીય ટકરાવમાં વારંવાર ચર્ચામાં આવે છે.ભાજપ તેમના પ્રવાસને લઈને નેતૃત્વ અને જનતા પ્રત્યેની જવાબદારી પર સવાલ ઉઠાવે છે, જ્યારે કોંગ્રેસ કેન્દ્ર સરકારની નીતિઓ, ચૂંટણી પ્રક્રિયા અને લોકશાહી સંસ્થાઓને લગતા મુદ્દાઓ પર સતત આક્રમક વલણ અપનાવે છે.આ વખતે પણ નવરાત્રિના સમયગાળાને ધ્યાનમાં રાખીને ભાજપે રાહુલ ગાંધીના પ્રવાસને રાજકીય મુદ્દો બનાવ્યો છે.પ્રદીપ ભંડારીની પોસ્ટ અને પોસ્ટરે સોશિયલ મીડિયા પર રાજકીય ચર્ચાને વેગ આપ્યો છે.ભાજપે આ માધ્યમથી રાહુલ ગાંધીને નિશાન બનાવ્યા છે અને કોંગ્રેસના નેતૃત્વ અંગે પોતાની ટીકા ફરી રજૂ કરી છે.
