શું કોર્ટને પણ સાચું બોલવાની સજા મળવા લાગી છે: સામના

એજન્સી, મુંબઈ

દિલ્હી હિંસાને લઈને ભડકાઉ નિવેદનબાજી કરનારા નેતાઓની વિરુદ્ધ એફઆઈઆર દાખલ કરવાના આદેશના કેટલાક ક્લાક બાદ જ દિલ્હી હાઈકોર્ટના જજ જસ્ટિસ મુરલીધરની ટ્રાન્સફર કરવામાં આવી હતી. જસ્ટિસ મુરલીધરના ટ્રાન્સફર અને દિલ્હી હિંસાને લઈને શિવસેનાએ ભાજપ પર નિશાન તાક્યું છે. શિવસેનાએ તેના મુખપત્ર સામનામાં લખ્યું છે કે, કોર્ટને પણ સત્ય બોલવાની સજા મળવા લાગી છે કે શું?

સામનામાં લખવામાં આવ્યું છે કે, દિલ્હીની કાયદા-વ્યવસ્થા સ્પષ્ટ રીતે ધારાશાયી થઈ ગઈ છે. 1984ના તોફાનોની જેમ ભયંકર સ્થિતિનું નિર્માણ થઈ રહ્યું છે એવી ટિપ્પણી જસ્ટિસ મુરલીધરે કરી હતી. જસ્ટિસ મુરલીધરે પ્રજાના મનના આક્રોશને એક અવાજ આપી. તમામ નાગરિકોને ઝેડ સુરક્ષા આપવાનો સમય આવી ગયો છે. એવી ટિપ્પણી જસ્ટિસ મુરલીધરે કરી અને આગામી 24 ક્લાકમાં જ મુરલીધરની ટ્રાન્સફરના આદેશ રાષ્ટ્રપતિ ભવનમાંથી આવ્યા. કેન્દ્ર અને રાજ્ય સરકારે કોર્ટની આલોચના કરી તેના જ આ પરિણામ છે. સરકારે કોર્ટ દ્વારા વ્યક્ત કરવામાં આવેલા સત્યને મારી નાંખ્યું. કોર્ટને પણ સત્ય બોલવાની સજા મળવા લાગી છે કે શું?

શિવસેનાએ દિલ્હી હિંસા દરમિયાન અમિત શાહની ભૂમિકા પર સવાલ ઉભા કરતા જણાવ્યું કે, દિલ્હી જ્યારે સળગી રહ્યું હતું, લોકો જ્યારે આક્રોશ વ્યક્ત કરી રહ્યા હતા ત્યારે ગૃહમંત્રી અમિત શાહ ક્યાં હતા? શું કરી રહ્યા હતા? જો કેન્દ્રમાં કોઇ અન્ય પાર્ટીની સરકાર હોત તો અત્યાર સુધી મોર્ચાનું આયોજન કરવામાં આવ્યું હોત. ગૃહમંત્રીને નિષ્ફળ ગણાવીને તેમના રાજીનામાની માગણી કરવામાં આવી હોત.