મુંબઈ : અભિનેત્રી રવીના ટંડનના ભાઈ રાજીવ ટંડનના જુહુ સ્થિત નિવાસસ્થાનમાંથી આશરે ₹25 લાખના દાગીના અને કિંમતી ઘડિયાળોની ચોરીના કેસમાં પોલીસે એક મહિલાની ધરપકડ કરી છે.આરોપી છેલ્લા કેટલાક સમયથી પરિવારની વૃદ્ધ સભ્યની સંભાળ રાખવા માટે કેરટેકર તરીકે કામ કરતી હતી.
પોલીસના જણાવ્યા અનુસાર 47 વર્ષીય રાશિ છાબરિયા ખાર વિસ્તારની રહેવાસી છે.તે રાજીવ ટંડનના ઘરે તેમની માતાની દેખભાળ માટે નિયમિત આવતી હતી.આ દરમિયાન તેણે પરિવારનો વિશ્વાસ સંપાદિત કર્યો હતો,જેના કારણે તેને ઘરના વિવિધ ભાગોમાં અવરજવર કરવાની છૂટ મળી હતી.તપાસ દરમિયાન જાણવા મળ્યું કે ઘરના બીજા માળે આવેલી તિજોરીમાંથી સોના-ચાંદીના દાગીના,હીરાના આભૂષણો અને મોંઘી ઘડિયાળો ગાયબ થઈ હતી.પરિવારને ચોરીની જાણ ગયા વર્ષે ઓક્ટોબરમાં તિજોરીની તપાસ દરમિયાન થઈ હતી.તિજોરીનું તાળું તૂટેલું હોવાનું પણ સામે આવ્યું હતું.
પોલીસની પૂછપરછ દરમિયાન આરોપીએ શરૂઆતમાં કોઈ સંડોવણી નકારી હતી.જોકે બાદમાં તેણે ચોરીની કબૂલાત કરી હોવાનું પોલીસનું કહેવું છે.તપાસ દરમિયાન બે મોંઘી ઘડિયાળો જપ્ત કરવામાં આવી છે,જ્યારે બાકીના દાગીના અન્ય વ્યક્તિને આપ્યા હોવાનું આરોપીએ જણાવ્યું છે.ફરિયાદ મુજબ આરોપીએ બાદમાં પરિવારને ધમકી પણ આપી હતી.દાગીના પરત ન મળતાં આખરે રાજીવ ટંડને પોલીસમાં ફરિયાદ નોંધાવી હતી.જુહુ પોલીસે 21 મેના રોજ આરોપીની ધરપકડ કરી હતી અને કોર્ટમાંથી રિમાન્ડ મેળવી વધુ તપાસ હાથ ધરી છે.પોલીસ હવે ગુમ થયેલા દાગીના અને અન્ય કિંમતી વસ્તુઓની શોધખોળ સાથે આ કેસમાં અન્ય કોઈ વ્યક્તિ સંડોવાયેલી છે કે નહીં તેની તપાસ કરી રહી છે
