– કોરોના સંક્રમણના ભય વિના જ બુટલેગરનું ફોલ્ડરિયા દ્વારા સ્વાગત
મહેસાણા : મહેસાણા જિલ્લામાં વિદેશી દારૂના અસામાજિક વ્યવસાય સાથે સંકળાયેલ નામાંકિત બુટલેગરોને હવે પોલીસનો કોઈ ભય રહ્યો ન હોય તેવો માહોલ જોવા મળી રહ્યો છે.કેટલાક સમય અગાઉ મહેસાણા ખાતે આવેલ જિલ્લા જેલમાં દારૂના કેસમાં જામીન પર છુટેલ એક બુટલેગરનું તેના મળતિયાઓએ જેલ પરિસરમાં જ હારતોળા કરી ભવ્ય ઉજવણી કરવાનો ક્રેઝ વધ્યો છે.મહેસાણાની જેલના મુખ્ય પ્રવેશદ્વાર બહાર જ બુટલેગરનું જેલ મુક્તિનો આનંદ વ્યક્ત કરવા કોરોના સંક્રમણ દરમિયાન મળતીયા એકઠાં થયા હતા.આ ઉજવણીની ઘટના પોલીસની છબી પર લપડાક સમાન સાબીત થઈ રહી છે.
મહેસાણા ખાતે આવેલ જિલ્લા જેલમાં વિદેશી દારૂના ગુનામાં ઝડપાયેલ નામાંકિત બુટલેગર કેટલાક સમય અગાઉ જામીન પર મુક્ત થયો હતો. આ બુટલેગરની જેલ મુક્તિની ઉજવણી કરવામાં આવી હતી.કોરોના મહામારી દરમિયાન પ્રતિબંધિત જેલ કંપાઉન્ડમાં સરકારે જાહેર કરેલ સોશિયલ ડિસ્ટન્સ સહિતની ગાઈડલાઈનનું ચૂસ્ત પાલન કરવાનું હતું.ત્યારે જ પ્રોહિબીશનના નામાંકિત બુટલેગર જેલ મુક્ત થતાં હારતોળા તેમજ ચાઈનીઝ ફટાકડા ફોડી તેના મળતિયાઓએ ઉજવણી કરી હતી.આ ઉજવણીનો વિડિયો બુટલેગરના ફોલ્ડરોએ સોશિયલ મિડિયા પર મુકી પોલીસને લપડાક આપી હતી.
ઉલ્લેખનીય છે કે, સુરત જિલ્લામાં પણ તાજેતરમાં બુટલેગરની જેલ મુક્તિ થતાં ફટાકડા ફોડી જશ્ન મનાવવાની ઘટના પ્રકાશમાં આવી હતી.પરંતુ, મહેસાણા ખાતે જિલ્લા જેલ કંપાઉન્ડમાં જ બુટલેગરની જેલ મુક્તિની ઉજવણી સોશિયલ મિડિયા પર ચમકતાં પોલીસની કામગીરી સામે અનેક સવાલો ઉભા થઈ રહ્યા છે.આ ઉજવણીની ઘટના પોલીસ વડાની કામગીરી પર પાણી ફેરવી રહ્યું તેમ લાગી રહ્યું છે.મહેસાણામાં જેલ મુક્તિની ઉજવણીની પ્રથમ ઘટના મામલે જેલ સત્તાવાળા કે પોલીસ તરફથી કોઈ કાર્યવાહી કરવામાં ન આવતાં બુટલેગરો માટે જેલ સંકુલમાં ઉજવણી કરવાનું સામાન્ય બની ગયું છે.જિલ્લામાં આવી ઘટનાઓથી સામાન્ય પ્રજાના માનસ પર પોલીસ કરતાં બુટલેગરોનું કદ વધ્યું હોય તેવી છાપ પડી રહી છે.
હથિયારો સાથે ફોટા વાયરલ કરી ફેલાવાતો ભય
મહેસાણા જિલ્લામાં કેટલાક બુટલેગરો કે તેમના મળતિયાઓ સોશિયલ મિડીયા પર ચાકુ,તલવાર જેવા ઘાતક હથિયાર તેમજ સંબંધીત લખાણ અને ભયજનક લોગો કે ચિત્રો મુકી લોકોમાં ભય ઉભો કરવામાં આવી રહ્યો છે.આવા તત્વોને ટેકનીકલ સર્વેલન્સની મદદથી શોધી કાઢી પોલીસ તરફથી કાર્યવાહી કરવામાં આવે તેવી જરૂરિયાત ઉભી થવા પામી છે.સોશિયલ મિડીયા થકી બેફામ બની જાહેરમાં ભય ફેલાવનાર શખ્સો સામે જિલ્લા પોલીસ વડા લાલ આંખ કરે તેવી માંગ ઉઠવા પામી છે.
