બારડોલી : સુરત જિલ્લાનો મોસ્ટ વોન્ટેડ બુટલેગર સન્ની ઉર્ફે સોહન પટેલને કડોદરા પોલીસે ચલથાણ ખાતે આવેલ તેના મકાનમાંથી ઝડપી પાડ્યો છે.વિદેશી દારૂના 16 જેટલા કેસમાં સન્ની વોન્ટેડ હતો.તેના વિરુદ્ધ 28 ગુના નોંધાયા છે.પોલીસને બાતમી મળતા જ તેના ઘરે પહોંચી હતી અને ભારે જહેમત બાદ તેને દબોચી લીધો હતો.
પ્રાપ્ત માહિતી અનુસાર સુરત જિલ્લાનો મોસ્ટ વોંટેડ બુટલેગર સન્ની ઉર્ફે સોહન પટેલ વિરુદ્ધ સુરત તેમજ નવસારી જિલ્લામાં વિદેશી દારૂના 28 જેટલા ગુના નોંધાય ચૂક્યા છે. અને છેલ્લા બે વર્ષથી સુરત જિલ્લામાં વિદેશી દારૂના 16 જેટલા ગુનામાં તે વોંટેડ હતો.તે દરમ્યાન કડોદરા જી.આઈ.ડી,સી પોલીસ સ્ટેશનના પી.આઈ એચ.બી.પટેલ ને બાતમી મળતા તેઓ ટીમ સાથે સન્ની ઉર્ફે સોહન કિશોરભાઇ પટેલના ચલથાણ ખાતે આવેલ આદર્શ બંગ્લોઝ મકાન નંબર-45 ખાતે પહોંચ્યા હતા.અને ઘરમાં તેની શોધખોળ કરી હતી તેમ છતાં તે મળી આવ્યો ન હતો ઘરમાં મહિલા હાજર હોવાથી પોલીસે મહિલા પોલીસને બોલાવ્યા બાદ શોધખોળ કરતાં ભારે જહેમત બાદ આખરે તેને દબોચી લીધો હતો.અને તેણે ઉપરોક્ત ગુનાની કબૂલાત કરી હતી.આ લિસ્ટેડ બુટલેગર સુરત જિલ્લાના કડોદરા,પલસાણા,કામરેજ તેમજ બારડોલી પોલીસ સ્ટેશનના 16 જેટલા વિદેશી દારૂના ગુનામાં વોંટેડ હતો.પોલીસે તેની ધરપકડ કરી આગળની વધુ કાર્યવાહી હાથ ધરી છે.
લિસ્ટેડ બુટલેગર અભરાઇ ઉપર ગાદલાં અને વાસણની આડમાં છુપાયો હતો
પી.આઈને બાતમી મળતા તેઓ ટીમ સાથે લિસ્ટેડ બુટલેગરના ઘરે તો પહોંચ્યા પરંતુ ઘરમાં મહિલા હાજર હોવાથી પી.આઈ એ મહિલા પોલીસને બોલાવ્યા બાદ ટીમ સાથે શોધખોળ શરૂ કરી હતી. પરંતુ ઘરમાં હાજર મહિલાએ જણાવ્યુ હતું કે શન્ની ઘરમાં નથી ત્યારબાદ ફરી એકવાર પોલીસે ઘરમાં શોધખોળ કરતાં શન્ની ઘરમાં આવેલ કબાટની અભરાઇ ઉપર દોઢ થી બે ફૂટ જેટલી જગ્યામાં સંતાયો હતો.પોલીસે અભરાઇ ઉપરથી ગાદલાં અને વાસણ ખસેડતા તે ત્યાંથી મળી આવ્યો હતો.
