– એપ્રિલ 2016થી અત્યાર સુધીમાં સાત લાખ નવી કંપની શરૂ થઈ હોવાની સરકારે લોકસભામાં માહિતી આપી
નવી દિલ્હી : છેલ્લા છ વર્ષમાં પાંચ લાખથી વધુ કંપનીએ બિઝનેસ બંધ કર્યો છે.જોકે, તેની સામે સાત લાખ નવી કંપની શરૂ થઈ છે.ડેટા સૂચવે છે કે, ૧ એપ્રિલ, ૨૦૧૬થી કુલ ૫,૦૦,૫૦૬ કંપનીએ બિઝનેસ બંધ કર્યો છે,પણ આ જ ગાળામાં કંપનીઝ એક્ટ, ૨૦૧૩ હેઠળ ૭,૧૭,૦૪૯ નવી કંપનીની નોંધણી થઈ છે.લોકસભાને સોમવારે લેખિત જવાબમાં કંપની બાબતોના રાજ્ય મંત્રી રાવ ઇન્દ્રજિત સિંઘે જણાવ્યું હતું કે, મંત્રાલય ઘટના આધારિત ડેટા રાખતું નથી.લોકસભામાં પ્રશ્ન પુછાયો હતો કે, નોટબંધી,જીએસટી અને કોવિડ મહામારીના ગાળામાં કેટલી કંપનીઓ બંધ થઈ? તેના જવાબમાં મંત્રીએ આ ટિપ્પણી કરી હતી.
૧ એપ્રિલ, ૨૦૨૧થી શરૂ થયેલા ચાલુ નાણાકીય વર્ષમાં કુલ ૨૨,૫૫૭ કંપનીઓની નોંધણી રદ થઈ છે.તેની સામે નવી ૧,૦૯,૦૯૮ કંપની શરૂ કરવામાં આવી છે. છેલ્લા છ વર્ષમાં સૌથી વધુ કંપનીઓ ૨૦૧૭-’૧૮માં બંધ થઈ હતી અને તેનો આંકડો ૨,૩૬,૨૬૨ હતો. ૨૦૧૮-’૧૯માં ૧,૪૩,૨૩૩ કંપનીએ બિઝનેસ બંધ કર્યો હતો.સત્તાવાર માહિતી અનુસાર ૨૦૧૬-’૧૭માં ૧૨,૮૦૮ કંપની, ૨૦૧૯-’૨૦માં ૭૦,૯૭૨ કંપની અને ગયા નાણાકીય વર્ષમાં ૧૪,૬૭૪ કંપની બંધ થઈ હતી.
ડેટામાં જણાવ્યા અનુસાર ગયા નાણાકીય વર્ષમાં ૧,૫૫,૩૭૭ અને ૨૦૧૯-’૨૦માં ૧,૨૨,૭૨૧ કંપનીની નોંધણી થઈ હતી. ૨૦૧૬-’૧૭માં આવી કંપનીઓની સંખ્યા ૯૭,૮૪૦ અને ૨૦૧૭-’૧૮માં ૧,૦૮,૦૭૫ હતી. ૨૦૧૮-’૧૯માં નોંધાયેલી નવી કંપનીઓની કુલ સંખ્યા ૧,૨૩,૯૩૮ હતી. સિંઘના જણાવ્યા અનુસાર કાયદા હેઠળ ‘બંધ કંપની’ની વ્યાખ્યા કરાઈ નથી.કાયદાની ચોક્કસ જોગવાઈ હેઠળ નિર્ધારિત પ્રક્રિયા પછી કંપનીની નોંધણી રદ કરાય છે.મંત્રીને એવો પણ પ્રશ્ન પુછાયો હતો કે, ભારતની બહાર કરાતી પ્રવૃત્તિઓને કોર્પોરેટ સોશિયલ રિસ્પોન્સિબિલિટી (CSR) પ્રોજેક્ટ તરીકે મંજૂરી આપી શકાય? મંત્રીએ તેનો ઇનકાર કર્યો હતો.
વર્ષ બંધ થયેલી કંપની
2021-22 22,557
2020-21 14,674
2019-20 70,972
2018-19 1,43,233
2017-18 2,34,262
2016-17 12,808
