આ રીતે કંપનીએ એજીઆર ડ્યૂ પેટે મુદ્દલ રકમ સંપૂર્ણપણે ચૂકવી દીધી છે
એજન્સી > નવી દિલ્હી
ટેલિકોમ સેક્ટરની અગ્રણી કંપની વોડાફોન આઈડિયાએ સોમવારે કહ્યું હતું કે તેણે એડજસ્ટે ગ્રોસ રેવન્યૂ(AGR) પેટે ટેલિકોમ વિભાગને ચૂકવવાપાત્ર રકમ પૈકી વધુ ~3354 કરોડ ચૂકવ્યા છે. તેણે કહ્યું હતું કે આ સાથે તેણે સેલ્ફ-એસેસમેન્ટને આધારે કરેલી ગણતરી મુજબ મુદ્દલ રકમ સંપૂર્ણપણે ચૂકવી દીધી છે. વોડાફોન આઈડિયાએ આ વધુ રકમ સાથે કુલ AGR પેટે ~6854 કરોડ ચૂકવ્યા છે. કંપનીએ બોમ્બે સ્ટોક એક્સચેન્જને જાણ કરતા કહ્યું હતું કે તેણે સોમવારે વધુ ~3354 કરોડની ચૂકવણી કરી દીધી છે, જે મુદ્દલ રકમ પેટે બાકી છેલ્લી રકમ હતી. આ રીતે કંપનીએ એજીઆર ડ્યૂ પેટે મુદ્દલ રકમ સંપૂર્ણપણે ચૂકવી દીધી છે. જોકે ટેલિકોમ વિભાગે કરેલી ગણતરી મુજબ વોડાફોન આઈડિયાએ AGR પેટે ~53,000 કરોડ ચૂકવવાના થાય છે, જેમાં વ્યાજની રકમ, પેનલ્ટી અને પેમેન્ટમાં વિલંબ પર લાગતા વ્યાજનો સમાવેશ છે. કંપનીએ કહ્યું હતું કે ટેલિકોમ વિભાગે તેને સેલ્ફ-એસેસમેન્ટને આધારે પેમેન્ટ કરવા કહ્યું હતું, જે મુજબ વર્ષ 2006-07થી 2018-19 સુધીના ગાળામાં તેણે AGR પેટે ~6854 કરોડની મુદ્દલ રકમ આપવાની થતી હતી.
