સુરત : સુરતના કામરેજ તાલુકાના ખોલવડ તથા નવાગામ ખાતે કરોડો રૂપિયાની આદિવાસીની માલિકીની જમીના ખોટા દસ્તાવેજો બનાવીને ગેરકાયદે કબજો કરી તેના પર એક ફાર્મ હાઉસ અને સ્કુલ બનાવનારા ડાહ્યા પટેલને કામરેજ પ્રાંત દ્વારા જમીન મહેસુલ કાયદાની કલમ 73 એએ ની જોગવાઈઓના ભંગ બદલ રૂ. 24.29 કરોડનો દંડ ફટકારતો હુકમ કર્યો હતો.આ સિવાય વિવાદીત જમીનનો કબ્જો સરકાર હસ્તક લેવાનો પણ નિર્દેશ કરવામાં આવ્યો છે.
કામરેજ તાલુકામાં ખોલવડ ગામે જુના બ્લોક નં.419 નંબરથી 6600 સમચોરસ મીટર જમીન અને નવાગામ ખાતે જુના બ્લોક નં.57થી નોંધાયેલ 13557 સમચોરસ મીટરવાળી 73એએની જમીનના મુળ માલિક મકનભાઈ હાટીભાઈ પાસેથી ડાહ્યાભાઈ પટેલ અને તેઓના મળતિયાઓ દ્વારા 25-04-2000ના રોજ વસીયતનામું બનાવ્યું હતું.ત્યારબાદ ડાહ્યા પટેલ દ્વારા અન્ય બોગસ ડોક્યુમેન્ટ્સ ઉભા કરીને 2003માં જમીન માલિક મકનભાઈ હાટીભાઈના નિધન બાદ વારસદારો સાથે કોર્ટમાં સમાધાન પણ કરીને બન્ને જમીનો પર કબ્જો મેળવી લીધો હતો.ગેરકાયદેસર કબ્જેદાર ડાહ્યાભાઈ પટેલ દ્વારા બન્ને જમીનો પૈકી નવાગામ ખાતે આવેલ જમીન પર ઈશ્વર ફાર્મ અને ખોલવડ ખાતે આવેલ જમીન પર સ્કુલ બાંધી દેવામાં આવી હતી.છેલ્લા 21 વર્ષ સુધી આ બન્ને જમીનો પર ડાહ્યા પટેલનો કબ્જો રહેવા પામ્યો હતો.બીજી તરફ સમગ્ર પ્રકરણમાં મુળ માલિક મકનભાઈ હાટીભાઈના વારસદારો દ્વારા ડાહ્યા પટેલ વિરૂદ્ધ 73એએની જમીનો પર ગેરકાયદેસર કબ્જા સંદર્ભે કલેકટર સહિતની કચેરીઓમાં રજુઆત કરવામાં આવી હતી.જે સંદર્ભે કામરેજ મામલતદારને તપાસનો આદેશ આપવામાં આવ્યો હતો.
આ જમીન વિવાદની તપાસ દરમ્યાન અંતે જમીન મહેસુલ કાયદાની કલમ 73એએની જોગવાઈના ભંગ સાથે ડાહ્યા પટેલ દ્વારા જમીનનો ગેરકાયદેસર કબ્જો કરવામાં આવ્યો હોવાનું પુરવાર થયું હતું.આ સિવાય જમીન મહેસુલ કાયદાની કલમ 73એએની પેટા કલમ 4 મુજબ જમીન સરકાર હસ્તક લેવાનો પણ આદેશ કરવામાં આવ્યો છે.વધુમાં,પેટા કલમ 7 મુજબ બિનપરવાનગી સાથે કબ્જો અને જમીન તબ્દીલ કરવા બદલ જમીનની હાલની જંત્રી મુજબની કિંમતનો ત્રણ ગણો દંડ પણ ફટકારવામાં આવ્યો છે.જે મુજબ ખોલવડ ગામમાં આવેલ જમીનની હાલની કિંમત 1.99 કરોડના હિસાબે 5.99 કરોડ અને નવાગામની જમીનની હાલની કિંમત 6.10 કરોડની સામે 18.30 કરોડ મળીને કુલ્લે 24.29 કરોડ રૂપિયાનો દંડ ફટકારવામાં આવ્યો છે.નાયબ કલેકટર કામરેજ પ્રાંત કે.જી.વાઘેલા દ્વારા સમગ્ર તપાસને અંતે જમીનનો કબ્જો પણ સરકાર હસ્તક લઈને સંબંધિત તલાટી કમ મંત્રીને જાળવણી અર્થે સુપરત કરવાનો પણ હુકમ કરવામાં આવ્યો છે.
કોર્ટ દાવો ઉભો કરીને પોતાના નામે સમાધાનનો ખેલ ઉંધો પડ્યો : ગરીબ અને અભણ આદિવાસી જમીન માલિક મકનભાઈ હાટીભાઈ પાસેથી ડાહ્યા કેશુભાઈ પટેલ અને તેઓના મળતિયા કાંતિ કેશવભાઈ પટેલ અને કૃષ્ણકાંત ભીખાભાઈ પટેલ દ્વારા સને 2000માં વસીયતનામું બનાવી લેવામાં આવ્યું હતું અને ત્યારબાદ 2003માં મુળ જમીન માલિકનું મોત નિપજ્યું હતું.જેને પગલે ડાહ્યા પટેલ આણીમંડળી દ્વારા જમીન સંબંધિત અન્ય ખોટા કાગળો ઉભા કરીને 2011માં કઠોર કોર્ટમાં દિવાની દાવો કરવામાં આવ્યો હતો.જેમાં કૌભાંડીઓ પોતાની તરફેણમાં ચુકાદો મેળવવામાં પણ સફળ રહ્યા હતા.આ સંદર્ભે ડાહ્યા પટેલ દ્વારા સમાધાન મુજબ અરજદારોને 24 લાખ અગાઉ ચુકવી આપ્યા હતા અને સમાધાન પેટે નક્કી થયેલ 69 લાખ પૈકી 35 લાખ પણ બાદમાં ચુકવેલ હતા.બાકી રહેતા 34 લાખ રૂપિયા જમીનના ટાઈટલ ક્લીયર થયેથી ચુકવવાનું નક્કી કરવામાં આવ્યું હતું.
નવાગામમાં ફાર્મ હાઉસ અને ખોલવડમાં શાળા ઉભી કરી દીધી હતી : છેલ્લા 21 વર્ષથી 73એએથી નોંધાયેલ ખોલવડની 6600 ચોરસ મીટર અને નવાગામની 13557 ચોરસ મીટર જમીન ઉપર કબ્જો જમાવીને બેઠેલા ગેરકાયદેસર ક્બ્જેદાર એવા ડાહ્યા પટેલ દ્વારા આ બન્ને જમીનો પર બાંધકામ પણ કરી દેવામાં આવ્યું હોવાનું જાણવા મળ્યું હતું.જે પૈકી કૌભાંડીઓ દ્વારા નવાગામ ખાતે ઈશ્વર ફાર્મના નામે જમીનનો ઉપયોગ લગ્ન પ્રસંગો માટે કરવામાં આવી રહ્યો હતો.આ સિવાય ખોલવડની બ્લોક નં.3131થી નોંધાયેલ જમીન પર પાકા બાંધકામ સાથે પતરાના શેડ ઉભા કરીને શાળા ધમધમતી કરવામાં આવી હોવાનું પણ ફરિયાદીઓ દ્વારા જણાવાયું હતું.
જમીનનો કબ્જો સરકાર હસ્તક લેવા કામરેજ પ્રાંતને હુકમ : જમીનના મુળ માલિકના વારસદારો દ્વારા કૌભાંડીઓ વિરૂદ્ધ કરવામાં આવેલી ફરિયાદને અંતે તપાસ દરમ્યાન કામરેજ પ્રાંત કે.જી.વાઘેલા દ્વારા ઐતિહાસિક ચુકાદાની સાથે સાથે જમીનનો કબ્જો પણ સરકાર હસ્તક લઈને તલાટીને જાળવણી અર્થે સુપરત કરવાનો હુકમ કરવામાં આવ્યો છે.તપાસ દરમ્યાન ડાહ્યા પટેલ સહિતનાઓ દ્વારા આદિવાસીઓની જમીન પર કબ્જો કરવાના આરોપસર ફટકારવામાં આવેલ 24.29 કરોડ રૂપિયાના દંડની રકમ પણ કામરેજ મામલતદારને વસુલ કરવા માટે જણાવાયું છે.
