- બુલેટપ્રુફ સ્કોર્પિયોનો ઉપયોગ કરતા હતા મોદીના વાહન અંગેનો નિર્ણય સ્પેશ્યલ પ્રોટેક્શન ગુ્રપ કરે છે
નવી દિલ્હી : વડાપ્રધાન નરેન્દ્ર મોદી હવે મર્સીડીઝ મેબેક-650 બખ્તરબંધ વાહનોના સજ્જ કાફલાથી ચાલતા જોવા મળશે.વડાપ્રધાન મોદીને તાજેતરમાં જ નવી મેબેક 650માં પહેલી વખત હૈદરાબાદ હાઉસમાં જોવા મળ્યા હતા.તે સમયે તેઓ રશિયાના રાષ્ટ્રપતિ પુટિનને મળવા પહોંચ્યા હતા.આ વાહન તાજેતરમાં જ વડાપ્રધાનના કાફલામાં ફરીથી જોવા મળ્યું છે.
મર્સીડીઝ મેબેક એસ650 ગાર્ડ વીઆર10 લેવલ પ્રોટેક્શન સાથે અત્યાધુનિક મોડેલ છે.આ કારમાં અત્યાર સુધીમાં વિશ્વની કોઈપણ કારમાં આપવામાં ન આવ્યું હોય તેટલું પ્રોટેક્શન આપવામાં આવ્યું છે.અહેવાલ મુજબ મર્સીડીઝ મેબેકે ગયા વર્ષે ભારતમાં એસ600 ગાર્ડને 10.5 કરોડમાં લોન્ચ કરી હતી.એસ650ની કિંમત 12 કરોડથી વધારે હોઈ શકે છે.
ભારતના વડાપ્રધાનની સલામતી માટે જવાબદાર સ્પેશ્યલ પ્રોટેક્શન ગ્રુપ (એસપીજી) સલામતીની જરૂરિયાતોની ચકાસણી કરે છે.તે નક્કી કરે છે જે વ્યક્તિની તેઓ રક્ષા કરી રહ્યા છે તેને એક નવા વાહનની જરૂરિયાત છે કે નહીં.
મર્સીડીઝ મેબેક એસ650 ગાર્ડ 6.0 લિટર ટ્વીન ટર્બો વી12 એન્જિન દ્વારા સંચાલિત છે.તે 516 બીએચપી અને 900 એનએમનો ટોર્ક પેદા કરે છે.તેની મહત્તમ ઝડપ પ્રતિ કલાક 190 કિમી.છે.આ ઝડપ ઇલેક્ટ્રોનિકલી રિસ્ટ્રિક્ટેડ છે. ટાયરને કોઈપણ પ્રકારનું નુકસાન થાય કે પંચર પડે તેવી સ્થિતિમાં પણ તે ૩૦ કિ.મી. જઈ શકે છે.
આ ગાડીની ખાસિયત એ છે કે તેની બોડી અને બારી ગમે તેવી ગોળીઓનો સામનો કરી શકે છે.તેને બોમ્બ પ્રુફ (ઇઆરવી) વાહનનું રેટિંગ પણ મળ્યું છે.આ કારમાં સવાર લોકો બે મીટર દૂરથી થતાં 15 કિલો ટીએનટી વિસ્ફોટથી પણ સલામત છે.બારીના ઇન્ટીરિયર પર પોલીકાર્બોનેટ ચઢાવવામાં આવ્યું છે.કારનો નીચેનો ભાગ પણ કોઈપણ પ્રકારના વિસ્ફોટથી બચવા બખ્તરબંધ છે.ગેસ હુમલાની સ્થિતિમાં પણ કેબિનમાં અલગ પ્રકારનો વાયુ પૂરો પાડવામાં આવે છે.
મેબેકના ફ્યુઅલ ટેન્કને એક ખાસ પ્રકારનું કોટિંગ કરવામાં આવ્યું છે. આ કોટિંગ ગરમીના લીધે થતા છિદ્રોને પોતાની મેળે સીલ કરી દે છે.આ તે સામગ્રીથી બન્યું છે જેનો ઉપયોગ બોઇંગ અને એએચ-૬૪ અપાચે ટેન્ક એટેક હેલિકોપ્ટરો કરે છે.આ કાર મુખ્યત્વે ફ્લેટ ટાયરો પર ચાલે છે,જે નુકસાન થવાની સ્થિતિમાં ટાયરોને સપાટ કરી દે છે.
ગુજરાતના મુખ્યપ્રધાન તરીકે મોદીએ બુલેટપ્રુફ સ્કોર્પિયોમાં સવારી કરી હતી.2014માં વડાપ્રધાન પદનો કાર્યભાર સંભાળ્યા પછી તેમણે બીએમડબલ્યુ સેવન સિરીઝ હાઇ-સિક્યોરિટી એડિશન,લેન્ડ રોવર રેન્જ રોવર અને ટોયોટા લેન્ડ ક્રુઝરનો ઉપયોગ કર્યો હતો.
