• આરોપીઓ સામે ગંભીર ગુનો છે,જામીન ન આપી શકાયઃ કોર્ટ

 અમદાવાદ : ગૌણ સેવા પસંદગી મંડળ દ્વારા લેવાનારી એકાઉન્ટ-સબ ઓડિટરની પરીક્ષાના પેપર ફોડવાના કેસમાં બે આરોપીએ કરેલી આગોતરા જામીન અરજી ધોળકાના એડિશનલ સેશન્સ જજ એસ.પી.શંકરે ફગાવી દીધી છે.કોર્ટે ચુકાદામાં એવી નોંધ મૂકી હતી કે,આરોપીઓ સામે ગંભીર પ્રકારનો ગુનો છે,હાલ આ મામલે તપાસ નાજુક તબક્કે ચાલી રહી છે ત્યારે આવા કેસમાં આરોપીઓને જામીન પર મુક્ત કરી શકાય નહીં.

ગુજરાત ગૌણ સેવા પસંદગી મંડળ દ્વારા આયોજિત સબ એકાઉન્ટ-સબ ઓડિટરની પરીક્ષાના પેપર ફોડવાના કેસમાં આરોપી રવિ ઉર્ફે કૃણાલ મધુસુદન પંડ્યા અને રવિ રત્નાભાઇ રાઘવાણીએ ધરપકડથી બચવા માટે આગોતરા જામીન અરજી કરી હતી.જેમાં તેમણે એવી રજૂઆત કરી હતી કે,અમારો કોઇ રોલ નથી,ખોટી રીતે સંડોવી દેવામાં આવ્યા છે, તપાસમાં સહકાર આપવા તૈયાર છીએ,કોર્ટ જામીન આપે તો તમામ શરતોનું પાલન કરવા તૈયાર છીએ તેથી કોર્ટે જામીન આપવા જોઇએ.

અરજીનો વિરોધ કરતા સરકારી વકીલ રવિનાથ પી.ઠાકરે એવી દલીલ કરી હતી કે,આરોપીએ પેપર ફોડી આવવાની લાલચ આપી લોકો પાસેથી લાખો રૂપિયા પડાવ્યા હતા,આરોપી સામે પ્રથમદર્શી કેસ છે,આરોપીઓ સમગ્ર ગુનામાં સામેલ છે,આરોપીઓની ભૂમિકા મામલે તપાસ કરવા આરોપીઓનું કસ્ટોડિયલ ઇન્ટ્રોગેશન જરૂરી છે,આ મામલે તપાસ ચાલી રહી છે ત્યારે આરોપીઓને જામીન આપવામાં આવે તો તપાસ પર અસર કરવામાં આવે અથવા સાક્ષી ફોડે તેવી શક્યતા છે ત્યારે આરોપીઓને જામીન ન આપવા જોઇએ.

ચાર લાખ નક્કી કર્યા લોકો પાસેથી 1-1 લાખ એડવાન્સ પડાવ્યા

આરોપીઓએ સબ એકાઉન્ટ-સબ ઓડિટરની પરીક્ષાના પેપર ફોડી આપવા માટે ઉમેદવારો પાસે ચાર લાખ રૂપિયા માગ્યા હતા.તે પૈકી સંખ્યાબંધ ઉમેદવારો પાસેથી એક એક લાખ એડવાન્સ લઇ લીધા હતા.જ્યારે પેપર આવ્યા બાદ બીજા ત્રણ ત્રણ લાખ લેવાનું નક્કી કર્યું હતું.જો કે,આખુંય કૌભાંડ બહાર આવતા આ મામલે 10 લોકો સામે ધોળકા પોલીસ મથકમાં ફરિયાદ નોંધવામાં આવી હતી.