નવી દિલ્હી, તા.19 માર્ચ 2020, ગુરૂવાર
કોરોનાની અસર શેરબજારની સાથે સાથે રૂપિયા પર પણ પડી છે.
રુપિયામાં આજે ભારે નબળાઈ જોવા મળી હતી અને પહેલી વખત ડોલરની સામે રૂપિયો 75ની સપાટી પર પહોંચી ગયો હતો. કોરોનાની અર્થતંત્ર પર પડનારી સંભવિત અસરના કારણે શેરબજારમાં રોકાણકારોની વેચવાળીની અસર રૂપિયા પર પણ જોવા મળી હતી.
આજે ઈન્ટરનેશનલ મોનેટરી માર્કેટમાં રુપિયો સવારે 70 પૈસા પડ્યો હતો અને 74.96ના સ્તર પર ખુલ્યો હતો. બુધવારે ડોલર સામે રુપિયો 74.26 પર બંધ થયો હતો.કેટલાક જાણકારોનુ માનવુ છે કે, રૂપિયામાં હજી પણ ધોવાણ થઈ શકે છે. કારણકે વિદેશી રોકાણકારો શેરબજારમાંથી પોતાના પૈસા પાછા ખેંચી રહ્યા છે.
રૂપિયો નબળો પડવાના કારણે ભારત માટે ક્રુડ ઓઈલ મોંઘુ બની શકે છે. વિદેશ યાત્રાઓ પર જનારાને પણ વધારે પૈસા ચુકવવાનો વારો આવી શકે છે અને બહારથી આવનારી પ્રોડક્ટસ મોંઘી થઈ શકે છે.
