। સુરત ।
કોરોના વાઈરસના હાઉ વચ્ચે શહેરમાં દિનપ્રતિદિન શંકાસ્પદ કેસ સામે આવી રહ્યાં છે. પખવાડિયા અગાઉ મહારાષ્ટ્ર, નાગપુર ખાતે કોરોના વાઈરસમાં સપડાયેલા સંબંધીને મળીને આવેલા પાલના યુવકમાં શંકાસ્પદ લક્ષણો દેખાયા હતા, જેને પગલે તેને સિવિલમાં દાખલ કરી સેમ્પલ લઈ તપાસ માટે મોકલવા સાથે સારવાર શરૂ કરાઈ છે. કોરોના વાઈરસના વધુ એક શંકાસ્પદ કેસ સાથે દર્દીઓની સંખ્યા ૧૧ થઈ છે. જે પૈકી ત્રણના રિપોર્ટ પેન્ડિંગ છે.
લંડનથી પરત ફરેલી યુવતીનો રિપોર્ટ ત્રીજા દિવસે પણ પેન્ડિંગ
લંડનથી પરત ફરેલી પારલે પોઈન્ટની યુવતીને શરદી-કફ, તાવની તકલીફ સાથે સિવિલમાં ખસેડાઈ હતી. શંકાસ્પદ કોરોના વાઇરસના લક્ષણોને લીધે તેણીના સેમ્પલ લઈ તપાસ માટે અમદાવાદ મોકલી સારવાર શરૂ કરાઈ છે. જોકે, ત્રણ દિવસ પછી પણ રિપોર્ટ નહીં આવતા તબીબો પણ મુંઝવણમાં મુકાયા છે. સૂત્રોના કહેવા મુજબ આ યુવતીના સેમ્પલ રિ-રન કરાયા છે. કોઈ ટેકનિકલ ત્રુટી રહી જવાને કારણે સેમ્પલ રિ-રન કરાયું હોવાની શક્યતા છે. મંગળવારે દાખલ કરાયેલા દર્દીનો પણ રિપોર્ટ પેન્ડિંગ છે. હાલ, સુરત શહેરના ત્રણ દર્દીના રિપોર્ટ પેન્ડિંગ છે, જે ગુરુવારે આવી જવાની શક્યતા છે.
અજમેર ઈન્ટરસિટી, ભગતકી કોઠી ૩૧મી સુધી રજ, તેજસ એક્સપ્રેસ અનિશ્ચિત મુદત માટે રદ
કોરોના વાઈરસના કારણે દેશની અનેક ટ્રેનો રદ કરવામાં આવી રહી છે. અમદાવાદથી અજમેર જતી અજમેર ઈન્ટરસીટીને પણ આગામી ૩૧મી માર્ચ સુધી રદ કરવામાં આવી છે. ટ્રેન રદ કરવા પાછળનુ કારણ જણાવતા રેલવેના અધિકારીએ કહે છે કે, હાલમાં ટ્રેનના પ્રવાસીઓ મોટી સંખ્યામાં ઘટી ગયા છે. જેથી ટ્રેનો રદ કરવામાં આવી રહી છે, જેમાં અજમેર ઈન્ટરસીટ ટ્રેન પણ રદ કરવાનો નિર્ણય લેવાયો છે. જોકે આ ટ્રેન ૨૪મી માર્ચે અમદાવાદથી અને ૨૫મી માર્ચે અજમેરથી ચાલશે. આ સિવાયના દિવસોમાં રદ રહશે. આ સિવાય સાબરમતી-ભગતકી કોઠી ટ્રેન પણ ૩૧મી સુધી રદ કરાઈ છે. અમદાવાદથી મુંબઈ માટે શરૂ કરેલી તેજસ એક્સપ્રેસ પણ અનિશ્ચિત મૂદત માટે રદ કરવામાં આવી છે.
સચિવાલયમાં પત્રાચાર ઓછો, ઈ-મેલનો વ્યવહાર કરોઃ GAD
GADએ સચિવાલયમાં અધિકારીઓ- કર્મચારીઓને કોરોના વાઈરસથી બચવા પત્રચારને બદલે ઈ- મેલથી વ્યવહાર કરવા પરિપત્ર જાહેર કર્યો છે ! GADએ દરેક વિભાગોની શાખાઓને ટપાલનો સ્વિકાર તેમજ પહોંચ રજિસ્ટ્રીના એન્ટ્રી પોઈન્ટ અને દરેક બ્લોકના એન્ટ્રી પોઈન્ટ ઉપર ખાસ સેનિટાઈઝર મુકવા આદેશો કર્યા છે. એટલુ જ નહી, સરકારી અધિકારીઓને રૂબરૂ મુલાકાતો ટાળીને વિડિયો કોન્ફરન્સનુ આયોજન કરવા તેમજ ફ્લૂ જેવા લક્ષણો હોય તો સેલ્ફ ક્વોરન્ટાઈન રહેવા રજા ઉપર ઉતરી જવા પણ કહેવામાં આવ્યુ છે.
