– ઉત્તર પ્રદેશમાં વિધાનસભાની ચૂંટણીનો પાંચમો તબક્કો પૂર્ણ
– કુંડામાં સપાના ઉમેદવારના કાફલા પર હુમલો,ગોંડામાં મહિલા પર હુમલા બદલ સપાના ઉમેદવાર,સમર્થકો સામે ફરિયાદ
યુક્રેનમાં ફસાયેલા ભારતીયોને પરત લાવવાના દરેક પ્રયાસો થઇ રહ્યા છે,બધા સુરક્ષિત છે : મોદીનો દાવો
ઉત્તર પ્રદેશની જનતા બાબા યોગી આદિત્યનાથને મઠમાં પરત મોકલવા ઉત્સૂક : અખિલેશનો ટોણો
ગોરખપુર : ઉત્તર પ્રદેશમાં વિધાનસભાની ચૂંટણીના પાંચમા તબક્કાનું મતદાન પૂર્ણ થયું હતું.આ તબક્કામાં અયોધ્યા સહિત 12 જિલ્લાઓમાં શાંતિપૂર્ણ રીતે મતદાન થયું હતું.જોકે પ્રતાપગઢના કુંડામાં સમાજવાદી પાર્ટીના ઉમેદવાર ગુલશન યાદવના કાફલા પર કેટલાક લોકોએ પથૃથરમારો કર્યો હતો.
જ્યારે ગોંડામાં સમાજવાદી પાર્ટીના ઉમેદવાર અને તેમના સમર્થકોની સામે મહિલાની સાથે મારપીટનો કેસ દાખલ કરાયો હતો.દરમિયાન પાંચમા તબક્કામાં સાંજે પાંચ વાગ્યા સુધીમાં શાંતિપૂર્ણ રીતે 54 ટકા મતદાન યોજાયું હતું.આ તબક્કામાં આશરે 2.24 કરોડ મતદારો મતદાન કરવાને યોગ્ય હતા.
પાંચ વાગ્યા સુધીમાં ચર્ચાસ્પદ અયોધ્યામાં 58 ટકા મતદાન થયું હતું જ્યારે અમેઠીમાં પણ 52 ટકાથી વધુ મતદાન થઇ ગયું હતું.આ તબક્કામાં આશરે 692 ઉમેદવારો ચૂંટણીના મેદાનમાં છે.બીજી તરફ વડાપ્રધાન નરેન્દ્ર મોદી ચૂંટણી પ્રચાર રેલીઓને સંબોધી રહ્યા છે.તેઓએ યુક્રેનમાં ફસાયેલા ભારતીયોને પરત લાવવા માટે સરકાર પ્રયાસ કરી રહી હોવાનું જણાવ્યું હતું.
જ્યારે સમાજવાદી પાર્ટીના વડા અખિલેશ યાદવે યોગી આદિત્યનાથનું નામ લીધા વગર કહ્યું હતું કે જનતાએ બાબાજી યોગી આદિત્યનાથને તેમના મઠ સુધી પરત પહોંચાડવાનું નક્કી કરી લીધુ છે.
એટલે કે જનતા યોગી આદિત્યનાથને ફરી સત્તા નહી સોપે તેવો દાવો અખિલેશ યાદવે કર્યો હતો.ગોરખપુરમાં ચીલ્લુપુર બેઠક પર સમાજવાદી પાર્ટીના ઉમેદવાર માટે પ્રચાર કરતી વેળાએ અખિલેશ યાદવે યોગી પર આ પ્રહારો કર્યા હતા.
