મોસ્કો/કીવ, તા. 27 : યુક્રેન પર રશિયાના આક્રમણનો રવિવારે ચોથો દિવસ હતો.અમેરિકા,યુરોપ સહિતના દેશોના આર્થિક પ્રતિબંધોથી અકળાયેલા રશિયન પ્રમુખ વ્લાદિમિર પુતિને રશિયન ન્યુક્લિયર ડિફેન્સ ફોર્સને એલર્ટ પર મૂકી દીધી છે.
ન્યૂક્લિયર ફોર્સને એલર્ટ પર રહેવાના પુતિનના આદેશનો અર્થ છે કે રશિયા પરમાણુ શસ્ત્રોના હુમલા માટે કોઈપણ સમયે તૈયાર છે.પુતિને નાટો સભ્યોના રશિયા વિરુદ્ધ કથિત ઉશ્કેરણીજનક નિવેદનો અને પશ્ચિમી દેશોના આર્થિક પ્રતિબંધોના પગલે આ આદેશ આપ્યા છે.
રશિયાના મેડિકલ ઈમર્જન્સીના એક લીક થયેલા દસ્તાવેજમાં દાવો કરાયો છે કે વ્લાદિમિર પુતિને રશિયાના ૫૦,૦૦૦ સૈનિકોના મોતની તૈયારી સાથે યુક્રેન સામે યુદ્ધ છેડયું છે.રશિયાએ તેના સૈનિકોની મોટાપાયે જાનહાનીની સંભાવનાને ધ્યાનમાં રાખીને દેશના ડોક્ટરો,નર્સ,હેલ્થ કર્મચારીઓને મેડિકલ ઈમર્જન્સી માટે તૈયાર રહેવા આદેશ આપ્યો છે.
રશિયન મીડિયાએ યુક્રેન પર રાસાયણીક હથિયારોનો ઉપયોગ કરવાનો આક્ષેપ કર્યો છે.આ યુદ્ધમાં રશિયાએ અપેક્ષા કરતાં ભારે જાનહાની અને આકરા પ્રતિકારનો સામનો કરવો પડયો છે.
યુક્રેન પર આક્રમણ બદલ વિશ્વની સાથે ખેલ જગતમાંથી પણ પુતિને આકરા વિરોધનો સામનો કરવો પડી રહ્યો છે. રશિયા પાસેથી ચેમ્પ્યિન્સ લીગનું યજમાનપદ છીનવાઈ ગયું છે.ખ્યાતનામ જુડો ખેલાડી અને બ્લેકબેલ્ટ ધરાવતા રશિયન પ્રમુખ પુતિન આંતરરાષ્ટ્રીય જૂડો ફેડરેશનના અધ્યક્ષ અને ફેડરેશનના બ્રાન્ડ એમ્બેસેડર હતા.જોકે,ફેડરેશને બંને પદો પરથી પુતિનની હકાલપટ્ટી કરી છે.
રશિયન પરિવારો યુક્રેનમાં માર્યા ગયેલા અથવા પકડાયેલા તેમના આત્પજનો એવા સૈનિકોની માહિતી મેળવી શકે તે માટે યુક્રેને રવિવારે એક વેબસાઈટ લોન્ચ કરી છે. યુક્રેનના ગૃહમંત્રી વિક્ટર એન્ડ્રુસિવે જણાવ્યું કે,અમને ખબર છે કે અનેક રશિયન પરિવારો યુક્રેનમાં યુદ્ધમાં ધકેલાયેલા તેમના સંતાનો,પતિઓ અને પીતાઓની વિગતો મેળવવા માગે છે.આથી અમે ૨૦૦આરએફ.કોમ વેબસાઈટ શરૂ કરી છે,જેના પર યુક્રેનમાં માર્યા ગયેલા અથવા પકડાયેલા રશિયન સૈનિકોના દસ્તાવેજો, ફોટો અને વીડિયો પોસ્ટ કરવામાં આવ્યા છે.
રશિયન સૈન્ય પર બર્બરતાનો આરોપ મૂકતાં યુક્રેને દાવો કર્યો હતો કે રશિયા રહેણાંક વિસ્તારોને પણ નથી છોડી રહ્યું.એટલું જ નહીં રશિયન સૈનિકો એમ્બ્યુલન્સ પર પણ હુમલા કરી રહ્યા છે.તેઓ ભારે વિનાશ વેરતા આગળ વધી રહ્યા છે.દેશમાં એક પણ વસ્તુ એવી નથી જેને હુમલાખોરોએ ટાર્ગેટ નથી કરી.
રશિયન સૈનિકો યુક્રેનના શહેરોમાં ઘૂસ્યા છે ત્યારે હુમલાખોરોને ગેરમાર્ગે દોરવા માટે માર્ગો બનાવતી અને તેની જાળવણી કરતી કંપનીએ શહેરમાંથી બધા જ રોડ સાઈન બોર્ડ ઉતારી લીધા છે.સરકારી કંપનીએ શહેરમાં વિવિધ જગ્યાની દિશાઓ દર્શાવતા સાઈન બોર્ડમાં વિવિધ દિશાના નિર્દેશો સાથે ‘તમારી જાતે જાવ’, ‘ફરી તમારી જાતે જાવ’, ‘તમે રશિયા પાછા જતા રહો’ જેવા સંદેશા લખ્યા હતા.
રશિયા વિરુદ્ધ આકરા પ્રતિબંધો લાદવા માટે વિશ્વના દેશો પર સતત દબાણ કરતા યુક્રેનના પ્રમુખ વોલોદિમિર ઝેલેન્સ્કીએ રવિવારે સંયુક્ત રાષ્ટ્રની સુરક્ષા પરિષદમાંથી રશિયાની હકાલપટ્ટી કરવાની માગણી કરી હતી.
