કીવ, તા. 05 માર્ચ, 2022, શનિવાર : રશિયન સેનાના યુક્રેન પરના હુમલાને 9 દિવસ પૂરા થઈ ગયા છે પરંતુ હજુ સુધી રાષ્ટ્રપતિ વ્લાદિમીર પુતિનની ફોજ યુક્રેનના મોટા શહેરો પર કબજો જમાવવામાં નિષ્ફળ રહી છે.વિશાળકાય રશિયન સેનાની આ નિષ્ફળતાની પરતો પણ ખુલવા લાગી છે.સૈન્ય નિષ્ણાંતોએ રશિયન સેનાની રણનીતિની નબળાઈઓ ઉજાગર કરી છે જેના કારણે તેઓ હજુ પણ યુક્રેન પર કબજો નથી કરી શક્યા.
એક અહેવાલ પ્રમાણે તેનું સૌથી મોટું કારણ યુક્રેનનું રેલવે નેટવર્ક છે જેણે રશિયન સેનાના હુમલા બાદ પાડોશી દેશ પર નિયંત્રણના પ્લાનને વીજ ઝડપે પાટા પરથી નીચે ઉતારી દીધો છે.રશિયન રાષ્ટ્રપતિ વ્લાદિમીર પુતિને ટીવી સંબોધન દરમિયાન જણાવ્યું કે,યુક્રેનમાં વિશેષ સૈન્ય અભિયાન પોતાના નિર્ધારિત સમય પ્રમાણે આગળ વધી રહ્યું હતું.રશિયન સેનાને યુક્રેનમાં તેલ અને અન્ય રાશનની આપૂર્તિ માટે લાંબું અંતર કાપવું પડે છે.રશિયન સેનાના સશસ્ત્ર વાહનો ઈંધણની ઉણપના કારણે રસ્તાના કિનારે અટક્યા છે.જ્યારે રશિયન સૈનિકો ભોજનની તલાશમાં રાશનની દુકાનોની રાખ ચાળી રહ્યા છે. રશિયન સેનાની ટ્રકોનો લાંબો કાફલો કીવની બહાર ટ્રાફિક જામનું સ્વરૂપ ધારણ કરી ચુક્યો છે.
રશિયન હુમલામાં નિષ્ફળતાના કારણે રશિયન રાષ્ટ્રપતિની અજેય રહેવાની સંભાવનાઓ પર સવાલ ઉઠવા લાગ્યા છે.રશિયન સેના પૂર્વ સોવિયેત સંઘની માફક ગોળા-બારૂદ અને અને સાજ-સામાનની આપૂર્તિ માટે રેલવે નેટવર્ક પર નિર્ભર છે.અગ્રીમ મોર્ચે તૈનાત સેનાને તેલ-પાણી વગેરેની આપૂર્તિ માટે તેણે અસ્થાયી પાઈપલાઈન બનાવવી પડી છે.તેમ છતાં તેણે યુક્રેનમાં સડક માર્ગે જ આગળ વધવું પડ્યું છે. રશિયન ફોજ પાસે ટ્રકોની પણ ભારે તંગી છે.જ્યારે સામાન્ય રીતે તેમને આની ચિંતા નથી રહેતી.પરંતુ યુક્રેનની સશસ્ત્ર સેનાએ કીવ પર પૂરઝડપે હુમલો કરવાની અને સરકારને હટાવવાની રશિયાની યોજના નિષ્ફળ બનાવવા ઘણું કર્યું છે.લોજિસ્ટિક્સ અને રેલવે ટ્રાન્સપોર્ટની કમી રશિયન સેનાના ઈરાદાઓ પર ભારે પડી રહી છે.
