– રૂપિયો ગબડતાં ઝવેરી બજારમાં ઈમ્પોર્ટ કોસ્ટ વધી
મુંબઈ : દેશના ઝવેરી બજારોમાં આજે તોફાની તેજી વેગથી આગળ વધી હતી.સોનાના ભાવ ઉછળી 10 ગ્રામના રૂ.55 હજારને આંબી ગયા હતા જયારે ચાંદીના ભાવ વધી કિલોના રૂ.71 હજાર બોલાતા થયા હતા.વિશ્વ બજારમાં રશિયા-યુક્રેન વોર વકરતાં વૈશ્વિક સોનાના ભાવ ઉછળી ઔંશના 2000 ડોલરની સપાટી વટાવી જતાંં ખેલાડીઓ સ્તબ્ધ બન્યા હતા.
વિશ્વ બજાર ઉછળતાંં તથા ઘરઆંગણે કરન્સી બજારમાં ડોલર સામે રૂપિયો ગબડી નવા તળિયે ઉતરી જતાં ઘરઆંગણે કિંમતી ધાતુઓની ઈમ્પોર્ટ કોસ્ટમાં નોંધપાત્ર વૃદ્ધી થતાં ઝવેરી બજારમાં ભાવમાં સ્પ્રિંગ જેવો ઉછાળો જોવા મળ્યો હોવાનું બજારના સૂત્રોએ જણાવ્યું હતું.જોકે ઉંચા મથાળે નવી માગ પાંખી રહી હતી. વિશ્વ બજારમાં સોનાના ભાવ ઔંશના 1970થી 1971 ડોલરવાળા આજે ઉંચામાં 2002થી 2003 ડોલર થઈ 1987થી 1988 ડોલર રહ્યા હતા.ઉંચા ભાવથી બજાર ફરી નીચે ઉતરી હતી.
દરમિયાન, અમદાવાદ ઝવેરી બજારમાં આજે સોનાના ભાવ વધુ રૂ.800 ઉછળી 99.50ના રૂ.54800 તથા 99.90ના રૂ.55000 બોલાતા થયા હતા જ્યારે અમદાવાદ ચાંદીના ભાવ ઉછળી રૂ.71000ને આંબી ગયા હતા.વિશ્વ બજારમાં સોના પાછળ ચાંદીના ભાવ ઔંશના 25.70થી 25.71 ડોલરવાળા ઉંચામાં 26.14થી 26.15 ડોલર થઈ 25.75થી 25.76 ડોલર રહ્યાના નિર્દેશો હતા.ઘરઆંગણે ઝવેરી બજારમાં હવે હોળાષ્ટકના પગલે પણ નવી માગ રૂંધાવાની ભીતિ બજારમાં બતાવાઈ રહી હતી.
વિશ્વ બજારમાં સોના-ચાંદી ઉપરાંત આજે અન્ય કિંમતી ધાતુઓ પણ ઉછળી હતી.પ્લેટીનમના ભાવ ઔંશના 1128થી 1129 ડોલરવાળા 1159થી 1160 થઈ 1145થી 1146 ડોલર રહ્યા હતા સજ્યારે પેલેડીયમના ભાવ 3011થી 3012 ડોલરવાળા ઉંચામાં 3442થી 3443 થઈ 3297થી 3298 ડોલર રહ્યાના નિર્દેશો હતા.
ડોલરના ભાવ ઘરઆંગણે વધી મોડી સાંજે ખાનગીમાં રૂ.77.10થી 77.15 બોલાઈ રહ્યા હતા. મુંબઈ ઝવેરી બજારમાં આજે સોનાના ભાવ જીએસટી વગર 99.50ના રૂ.52290 વાળા રૂ.53380 જ્યારે 99.90ના રૂ.52490 વાળા રૂ.53595 રહ્યા હતા જ્યારે જીએસટી સાથેના ભાવ આ ભાવથી 3 ટકા ઉંચા રહ્યા હતા.
મુંબઈ ચાંદીના ભાવ આજે જીએસટી વગર રૂ.69100 વાળા રૂ.70580 રહ્યા હતા જ્યારે જીએસટી સાથેના ભાવ 3 ટકા ઉંચા રહ્યા હતા. ઝવેરી બજારમાં આ પૂર્વે આવી તેજી નોટબંધી વખતે તથા ત્યારબાદ કોરોના જ્યારે ચરમસીમાએ હતો એ વખતે જોવા મળી હતી અને હવે વોર ફીવર વચ્ચે આવી તેજી બજારમાં ફરી જોવા મળી હોવાનું બજારના પીઢ ઝવેરીઓએ જણાવ્યું હતું.
