– ભૂલથી પાકિસ્તાન ઉપર ફેંકાયેલી મિસાઈલ બાબતે નિષ્ણાતોનું તારણ સુપરસોનિક મિસાઈલ તીવ્ર ઝડપે નિશાન ભેદવા આગળ વધતી હોવાથી દુશ્મન દેશો માટે તેને તોડી પાડવાનું કામ ખૂબ જ કપરું
પાકિસ્તાન ઉપર ભૂલથી ફેંકાયેલી ભારતની મિસાઈલ બાબતે નિષ્ણાતો દાવો કરી રહ્યા છે તે પ્રમાણે પાકિસ્તાન વાયુસેના ભારતની મિસાઈલની સ્પીડ જોઈને દંગ રહી ગઈ હતી.ભારતની સુપરસોનિક મિસાઈલની સ્પીડ જ એટલી હતી કે પાક.વાયુસેના માટે તેને તોડી પાડવાનું કામ ખૂબ જ વિકટ હતું.
ભારતની એક સુપરસોનિક મિસાઈલ ટેસ્ટિંગ અને મેન્ટેનન્સ દરમિયાન ભૂલથી પાકિસ્તાન તરફ ફેંકાઈ ગઈ હતી.પાકિસ્તાન જઈ પહોંચેલી મિસાઈલ બાબતે ભારતે દિલગીરી વ્યક્ત કરી હતી અને ભૂલથી મિસાઈલ છૂટી ગઈ હોવાની સ્પષ્ટતા પણ કરી હતી.પાકિસ્તાને દાવો કર્યો હતો કે આ મિસાઈલના કારણે મિયા ચન્નુ વિસ્તારમાં ઘણી ઈમારતોને નુકસાન થયું છે.પાકિસ્તાનની વાયુસેનાએ દાવો કર્યો હતો કે ભારતની મિસાઈલ ઉપર તેની નજર હતી,પરંતુ પાકિસ્તાને વળતી કોઈ કાર્યવાહી કરી નહીં.
પાકિસ્તાની વાયુસેનાની ભારતીય સુપરસોનિક મિસાઈલ ઉપર નજર હતી એ દાવા પછી ભારતના નિષ્ણાતોએ તારણ રજૂ કર્યું હતું કે સુપરસોનિક મિસાઈલની અભૂતપૂર્વ ઝડપને પકડવાનું કામ ખૂબ જ મુશ્કેલ છે.ભારતના સેન્ટર ફોર એર પાવર સ્ટડીઝ થિંક ટેન્કના પ્રમુખ નિવૃત્ત એરમાર્શલ અનિલ ચોપડાને ટાંકીને રજૂ થયેલા અહેવાલો પ્રમાણે આ નિષ્ણાત અધિકારીએ કહ્યું હતું કે પાકિસ્તાની વાયુસેના માટે કોઈ પણ નિર્ણય લેવા માટે બહુ જ ઓછો સમય હતો.પાક.વાયુસેના ભારતની મિસાઈલની સ્પીડ જોઈને દંગ રહી ગઈ હોવી જોઈએ.એ કંઈ સમજે,વિચારે એ પહેલાં મિસાઈલ પાકિસ્તાનની હવાઈ સીમામાં પ્રવેશી ચૂકી હતી અને તે પછી તુરંત તૂટી પડી હતી.
નિષ્ણાતોના દાવા પ્રમાણે પાકિસ્તાન એટલા માટે એ મિસાઈલને તોડી શકી નહીં,કારણ કે તેની સ્પીડ ખૂબ જ વધારે હતી.પાકિસ્તાને ધાર્યું હોત તો પણ ભારતની મિસાઈલને તોડી પાડવાનું શક્ય બન્યું ન હોત. ભારતની સુપરસોનિક મિસાઈલની ઝડપનો અંદાજ એ વાત પરથી આવી શકે છે કે પાકિસ્તાન એરફોર્સના ધ્યાનમાં આવી હોવા છતાં એને તોડી પાડવાનું અશક્ય હતું.
ઉલ્લેખનીય છે કે ભારતે પાકિસ્તાનને સત્તાવાર રીતે દિલગીરી વ્યક્ત કરી છે.જોકે,ભારતે કઈ મિસાઈલ પાકિસ્તાનમાં પહોંચી તે બાબતે કોઈ જ જાહેરાત કરી ન હતી.પાકિસ્તાને આ મુદ્દે સંયુક્ત તપાસની માગણી કરી છે.
