વોશિંગ્ટન, તા. 19 માર્ચ 2022, શનિવાર : અમેરિકી રાષ્ટ્રપતિ જો બાઈડને શુક્રવારે ચીનના રાષ્ટ્રપતિ શી જિનપિંગ સાથે વીડિયો કોલમાં વાતચીત કરી હતી.આ દરમિયાન બાઈડને જિનપિંગને કહ્યું હતું કે,જો ચીનના સમર્થન બાદ રશિયા યુક્રેનના શહેરો પર આક્રમણ કરે છે તો તેના ગંભીર પરિણામો ભોગવવા પડશે.વ્હાઈટ હાઉસ તરફથી કહેવામાં આવ્યું છે કે,બંને નેતાઓ વચ્ચે આશરે 2 કલાક સુધી ચાલેલી વાતચીત યુક્રેનમાં રશિયાના હુમલા પર કેન્દ્રીત રહી.પીટીઆઈના અહેવાલ પ્રમાણે વ્હાઈટ હાઉસ પ્રશાસને એક સીનિયર ઓફિસરને જણાવ્યું કે,બંને નેતાઓએ યુક્રેન પર રશિયા તરફથી કરવામાં આવેલા અકારણ અને અન્યાયપૂર્ણ આક્રમણની ચર્ચા કરી.આ સાથે જ અમેરિકા-ચીન સંબંધો અને આંતરરાષ્ટ્રીય સંકટ અંગે પણ વાતચીત થઈ.
જૈવિક હથિયારો અંગે જુઠાણું ફેલાવી રહ્યું છે રશિયાઃ બાઈડન
વાતચીત દરમિયાન બાઈડને એ વાત પર ભાર આપ્યો કે,રશિયા યુક્રેનમાં જૈવિક હથિયારો અંગે ખોટી જાણકારી ફેલાવી રહ્યું છે.તેમણે કહ્યું કે,યુક્રેનમાં રશિયા તરફથી ક્રૂર કાર્યવાહી કરવામાં આવી રહી છે. તેવામાં ચીન તરફથી રશિયાને સમર્થન આપવા પર ગંભીર પરિણામો ભોગવવા પડશે,જે માત્ર સંયુક્ત રાજ્ય અમેરિકાના ચીન સાથેના સંબંધો જ નહીં પરંતુ સમગ્ર વિશ્વ પર ખોટો પ્રભાવ પાડશે.
વ્હાઈટ હાઉસના અધિકારીએ જણાવ્યું કે,બાઈડને જિનપિંગ સાથે ચર્ચા કરી હતી કે,આખરે યુક્રેનમાં સ્થિતિ આ હદે કઈ રીતે પહોંચી.બાઈડને યુક્રેનની વર્તમાન સ્થિતિના આકલન અને યુક્રેન સંકટ પર સમાધાન માટે પોતાના સમર્થન અંગે જણાવ્યું.આ સાથે જ તેમણે રશિયાના રાષ્ટ્રપતિ પુતિનના ખોટા કામો અને તેમના ખોટા અનુમાનો અંગે પણ ચર્ચા કરી.સાથે જ બાઈડને અમેરિકા અને તેના સહયોગીઓની એકતા, નાટો અંગે ચર્ચા કરી.રશિયાના આક્રમણની નિંદા અને યુક્રેનનું સમર્થન કર્યું.
ચીની રાષ્ટ્રપતિએ ઉઠાવ્યો તાઈવાન મુદ્દો
વ્હાઈટ હાઉસના અધિકારીના કહેવા પ્રમાણે ચીનના રાષ્ટ્રપતિ શી જિનપિંગે વાતચીત દરમિયાન તાઈવાન મુદ્દો ઉઠાવ્યો હતો.ત્યાર બાદ અમેરિકી રાષ્ટ્રપતિ જો બાઈડને ફરી દોહરાવ્યું હતું કે,સંયુક્ત રાજ્ય અમેરિકા એક ચીન નીતિ માટે પ્રતિબદ્ધ છે તથા તાઈવાન સંબંધીત અધિનિયમ, 3 સંયુક્ત વિજ્ઞપ્તિ અને 6 આશ્વાસનો દ્વારા નિર્દેશિત છે.તેમણે તાઈવાનમાં શાંતિ અને સ્થિરતા જાળવી રાખવાના મહત્વ પર ભાર આપ્યો હતો.
