સુરત, તા. 21 માર્ચ 2020 શનિવાર
કોરોના વાઈરસને લઈને કામકાજમાં ઘટાડો આવ્યો છે અને દેશભરના શોરૂમમાં સાડીઓના વેચાણમાં ઘટાડો આવ્યો હોવાને કારણે જરીની માંગ પણ ઘટી હોવાથી સ્થાનિક જરી મેન્યુફેક્ચરર્સને ઉત્પાદનમાં કાપ મૂકવાની અપીલ એસોસિએશન દ્વારા કરવામાં આવી છે.
જરી મેન્યુફેક્ચરિંગ સાથે સંકળાયેલા શહેરના પાંચ જેટલા એસોસિએશને એક મિટિંગ કરીને ઉત્પાદનકાપ માટે અપીલ કરવાનું નક્કી કર્યું હતું. જરી મેન્યુફેક્ચરિંગ સવારના નવથી સાંજના ચાર વાગ્યા દરમિયાન કરવામાં આવે એવું ઠરાવવામાં આવ્યું હતું.
સુરતની જરીમાંથી સાડી બનાવતા દેશના જુદા જુદા વેચાણ કેન્દ્રો અને દુકાનોમાંથી જરીની અત્યારે કોઈ માંગ નહીં હોવાને કારણે ઉત્પાદન કાપ મૂકવાની જરૂર હોવાનું જણાવાયું છે.
કોરોના મહામારીની હાલની સ્થિતિમાં વેચાણ કામકાજ ખૂબ જ ઘટ્યા છે અને દેશના જુદા-જુદા શહેરોમાંથી જરીની ખપત ખૂબ જ ઘટી ગઈ હોવાની ચર્ચા મિટિંગમાં કરવામાં આવી હતી.
