વેરાવળ : દેશને મોટું હુંડિયામણ કમાવી દેતા મત્યોદ્યોગને અનેક સમસ્યાઓનો સામનો કરવો પડી રહ્યો છે. એક બાજુ ડીઝલના ભાવમાં એક લિટરે રૂ.૨૫નો ડામ આવ્યો એની સાથોસાથ વેરાવળ પોરબંદરથી ચાઈના મોકલાવેલા માછલીના 200 કન્ટેઈનરોને ચીને રિજેકટ કરતા એક કન્ટેનરદીઠ રૂ. 10થી 15 લાખની નુકસાની મુજબ પરત થયેલા કન્ટેનરોને અને આ ઉદ્યોગને રૂ. 30 કરોડનું નુકસાન થઈ ચૂક્યુ છે.
ઓલ ઈન્ડિયા એકસપોર્ટ એસો.ના પ્રમુખના જણાવ્યા મુજબ વેરાવળથી મોટા પ્રમાણમાં ચીન અને અન્ય દેશોમાં માછલીની મોટા પ્રમાણમાં નિકાસ થાય છે. અને હજારો ડોલરની કમાણી થાય છે સાથોસાથ દેશને હુંડિયામણનો મોટો લાભ થાય છે.આ વર્ષે ચાઈનામાં મોટા પ્રમાણમાં માછલીના કન્ટેઈનરો મોકલવામાં આવ્યા હતા.આવી જ રીતે પોરબંદરથી પણ માછલીઓ મોકલવામાં આવી હતી. આ પૈકી આશરે 200 કન્ટેઈનોને ચાઈનાએ રીજેકટ કરી દેતા મોટી નુકસાની વેઠવાનો વારો આવ્યો છે.ચાઈના આ કન્ટેઈનરો માટે જુદા જુદા બહાનાઓ આપે છે.હવે આ માલ ફેંકી જ દેવાનો રહે છે.જેથી નિકાસકારો સહિત દરિયાકાંઠા વિસ્તારના નાના મોટા તમામને આની અસર પડે છે.સાગરપુત્ર ખારવા સમાજના પ્રમુખે જણાવ્યુ હતુ કે છેલ્લા એક માસથી માછીમારોને ડીઝલના ભાવમાં લિટરે રૂ.૨૫નો કમ્મરતોડ ભાવ વધારો સહન કરવો પડે છે.આ માટે અમોએ અનેકવાર રજુઆતો કરી છે છતાં કોઈજ ઉકેલ આવ્યો નથી. હવે ડીઝલના વધેલા ભાવની સાપેક્ષમાં દરિયાની ટ્રિપો ખુબજ ખર્ચાળ બની ગઈ છે.અને માછીમારોને માછીમારી કરવી પોષાય એમ નથી. આથી મોટા ભાગની બોટ દરિયાકાંઠે પરત આવી ગઈ છે.
