ચેન્નાઈ સુપર કિંગ્સે બેંગ્લોરને ૨૩ રનથી હરાવીને પોઈન્ટ ટેબલમાં ખાતું ખોલાવ્યું

નવી મુંબઈ, તા.૧૨:
ચેન્નાઈ સુપર કિંગ્સે આઇપીએલની ૧૫મી સિઝનમાં પાંચમી મેચમાં પહેલી જીત હાંસલ કરતાં પોઈન્ટ ટેબલમાં ખાતું ખોલાવ્યું હતુ. દુબેના અણનમ ૯૫ અને ઉથપ્પાના ૮૮ રનની મદદથી ચેન્નાઈએ ચાર વિકેટે ૨૧૬ રન કર્યા હતા. જવાબમાં બેંગ્લોર ૯ વિકેટે ૧૯૩ રન સુધી પહોંચી શક્યું હતુ અને ચેન્નાઈ ૨૩ રનથી જીત્યું હતુ. જીતવા માટેના ૨૧૭ના ટાર્ગેટનો પીછો કરતા બેંગ્લોરે માત્ર ૫૦ રન સુધી પહોંચતા ડુ પ્લેસીસ (૮), કોહલી (૧), રાવત (૧૨) અને મેક્સવેલ (૨૬)ની વિકેટ ગુમાવી હતી. શાહબાઝ (૨૭ બોલમાં ૪૧) અને પ્રભુદેસાઈ (૧૮ બોલમાં ૩૪)ની જોડીએ ૬૦ રન જોડયા હતા. જે પછી દિનેશ કાર્તિકે ૧૪ બોલમાં બે ચોગ્ગા અને ત્રણ છગ્ગા સાથે ૩૪ રન કર્યા હતા. જોકે ત્યાર બાદ તેઓએ તબક્કાવાર વિકેટ ગુમાવી હતી. થિક્શાનાએ ચાર અને જાડેજાએ ત્રણ વિકેટ ઝડપી હતી. અગાઉ ચેન્નાઈ સુપર કિંગ્સે ધમાકેદાર બેટિંગને સહારે બેંગ્લોર રોયલ ચેલેન્જર્સને જીતવા માટે ૨૧૭ રનનો વિશાળ પડકાર આપ્યો હતો. શિવમ દુબે અને રોબિન ઉથપ્પાએ માત્ર ૭૪ બોલમાં ૧૬૫ રનની રેકોર્ડ ભાગીદારી નોંધાવી સનસનાટી મચાવી હતી. ચેન્નાઈના બોલરો દુબે-ઉથપ્પાની આક્રમક બેટીંગની સામે સાવ લાચાર જોવા મળ્યા હતા. બેંગ્લોર તરફથી હસારંગાએ ૩ ઓવરમાં ૩૫ રન આપીને બે વિકેટ ઝડપી હતી. જ્યારે આકાશદીપે ૪ ઓવરમાં ૫૮ રન આપ્યા હતા. બેંગ્લોરના કેપ્ટન ડુ પ્લેસીસે ટોસ જીતીને ચેન્નાઈ સુપર કિંગ્સને બેટીંગમાં ઉતાર્યું હતુ. ગાયકવાડનું કંગાળ ફોર્મ જારી રહ્યું હતુ અને તે ૧૭ રને હેઝલવૂડની બોલિંગમાં આઉટ થયો હતો. મોઈન પણ ૩ રને રનઆઉટ થતાં ચેન્નાઈએ ૩૬ રનમાં બે વિકેટ ગુમાવી હતી. જોકે ઉથપ્પા અને શિવમ દુબેની જોડીએ માત્ર ૭૪ બોલમાં ૧૬૫ રનની ભાગીદારી કરતાં આઇપીએલની આ સિઝનની હાઈએસ્ટ ભાગીદારી નોંધાવી હતી. દુબેએ ૮ છગ્ગા અને પાંચ ચોગ્ગા સાથે ૪૬ બોલમાં અણનમ ૯૫ રન ફટકાર્યા હતા. જ્યારે ઉથપ્પાએ ૫૦ બોલમાં ૯ છગ્ગા અને ચાર ચોગ્ગા સાથે ૮૮ રન નોંધાવ્યા હતા.