ન્યૂયોર્ક, તા. ૨૯ : ૨૦૧૫ પછી પ્રથમ વખત એમેઝોનને કોઇ ક્વાર્ટરમાં નુકસાન થયું છે.કોરોના મહામારી દરમિયાન ઓનલાઇન શોપિંગમાં મંદી અને ઇલેક્ટ્રિક વાહનોના સ્ટાર્ટઅપમાં મોટા પાયે રોકાણ કરવાથી એમેઝોનને નુકસાન થયું છે.એમેઝોનને થયેલા આ નુકસાનને કારણે સિએટલ સ્થિત આ દિગ્ગજ ઇ કોમર્સ કંપનીન શેરમાં ગઇકાલે ૯ ટકાનો ઘટાડો થયો હતો.જાન્યુઆરી થી માર્ચ, ૨૦૨૨ સુધીના સમયગાળામા એમેઝોનને ૩.૮૪ અબજ ડોલરનું નુકસાન થયું છે એટલે કે પ્રતિ શેર ૭.૫૬ ડોલરનું નુકસાન થયું છે.ગયા વર્ષના સમાન ગાળામાં કંપનીને ૮.૧ અબજ ડોલરનો નફો થયો હતો એટલે કે પ્રતિ શેર ૧૫.૭૯ ડોલરનો ફાયદો થયો હતો.ફેક્ટશીટના જણાવ્યા અનુસાર વોલ સ્ટ્રીટના નિષ્ણાતોને અંદાજ હતો કે એમેઝોનને પ્રતિ શેર ૮.૩૫ ડોલરનો ફાયદો થશે.એમેઝોનને ઉત્તર અમેરિકામાં ઇ-કોમર્સ બિઝનેસમાં ૧.૫૭ અબજ ડોલરનું નુકસાન થયું છે જ્યારે આંતરરાષ્ટ્રીય ક્ષેત્રે ઇ-કોમર્સ બિઝનેસમાં ૧.૨૮ અબજ ડોલરનું નુકસાન થયું છે.એમેઝોને ઇલેક્ટ્રિક વાહનોના સ્ટાર્ટ અપ રિવિઅન ઓટોમેટિવમાં મોટા પાયે રોકાણ કર્યુ છે.૨૦૨૧માં આ કંપનીનું લિસ્ટિંગ થયું હતું.એક સમયે તેના શેરનો ભાવ ૧૮૦ ડોલર હતો જે ઘટીને ૩૨ ડોલર થઇ ગયો છે.બીજી તરફ એમેઝોનના કલાઉડ કોમ્પ્યુટિંગ બિઝનેસમાં ૩૭ ટકાનો વધારો થયો છે.તેના એડવર્ટાઇઝિંગ બિઝનેસમાં પણ ૨૫ ટકાનો વધારો થયો છે.
૨૦૧૫ પછી પ્રથમ વખત એમેઝોનને ત્રિમાસિક પરિણામોમાં ખોટ નોંધાવી
