(પીટીઆઇ) નવી દિલ્હી, તા. ૧ : એપ્રિલમાં જીએસટી કલેક્શન અત્યાર સુધીનું સૌથી વધુ ૧.૬૮ લાખ કરોડ રૃપિયા રહ્યું છે તેમ નાણા મંત્રાલય દ્વારા જારી કરવામાં આવેલા આંકડામાં જણાવવામાં આવ્યું છે.ગયા વર્ષના એપ્રિલની સરખામણીમાં ચાલુ વર્ષના એપ્રિલ મહિનામાં જીએસટી ક્લેક્શન ૨૦ ટકા વધુ રહ્યું છે.ધંધાકીય પ્રવૃત્તિઓમાં રિકવરી થવાને કારણે એપ્રિલ મહિનામાં જીએસટી ક્લેક્શન વિક્રમજનક રહ્યું છે.એપ્રિલ મહિનામાં કુલ જીએસટીઆર-૩બી દ્વારા ૧.૦૬ કરોડ જીએસટી રિટર્ન ફાઇલ કરવામાં આવ્યા હતાં. જેમાંથી ૯૭ લાખ રિટર્ન માર્ચ, ૨૦૨૨ના છે.એપ્રિલ, ૨૦૨૧ની સરખામણીમાં એપ્રિલ, ૨૦૨૨માં જીએસટી ક્લેક્શન ૨૦ ટકા વધારે રહ્યું છે.એપ્રિલ, ૨૦૨૧માં જીએસટી ક્લેક્શન ૧.૪૦ લાખ કરોડ રૃપિયા રહ્યું હતું.
આ અગાઉનો સૌથી વધુ જીએસટી ક્લેકશન માર્ચ, ૨૦૨૨માં ૧.૪૨ લાખ કરોડ રૃપિયા નોંધવામાં આવ્યું હતું.નાણા મંત્રાલયે જણાવ્યું છે કે કુલ જીએસટી ક્લેકશન એપ્રિલમાં ૧.૬૮ લાખ કરોડ રૃપિયાના રેકોર્ડ સ્તરે પહોંચી ગયું છે.જે માર્ચ, ૨૦૨૨ના ૧.૪૨ લાખ કરોડ રૃપિયાથી લગભગ ૨૫,૦૦૦ કરોડ રૃપિયા વધારે છે.એપ્રિલમાં કુલ જીએસટી ક્લેક્શન ૧,૬૭,૫૪૦ કરોડ રૃપિયા રહ્યું છે.જેમાં સીજીએસટીનો હિસ્સો ૩૩,૧૫૯ કરોડ રૃપિયા, એસજીએસટનો હિસ્સો ૪૧,૭૯૩ કરોડ રૃપિયા, આઇજીએસટીનો હિસ્સો ૮૧,૯૩૯ રૃપિયા અને સેસનો હિસ્સો ૧૦,૬૪૯ કરોડ રૃપિયા રહ્યો છે.મંત્રાલયના જણાવ્યા અનુસાર એ વાતના સ્પષ્ટ સંકેત મળી રહ્યાં છે કે અનુપાલનના સ્તરમાં સુધારો થયો છે.ટેક્સ વહીવટી તંત્રે આ સંદર્ભમાં અનેક સુધારા કર્યા છે જેના સકારાત્મક પરિણામ જોવા મળી રહ્યાં છે.વિભાગે કરદાતાઓને પોતાનું રિટર્ન સમયસર ભરવા પ્રેરિત કરવાની સાથે અનુપાલનને પણ સરળ બનાવ્યું છે.
મંત્રાલયે જણાવ્યું છે કે સમીક્ષાધીન મહિનામાં વસ્તુઓની આયાતથી મળેલ આવક ગયા વર્ષના સમાન મહિનાથી ૩૦ ટકા વધારે રહી છે.જ્યારે ઘરેલુ લેવડદેવડ (સેવાઓની આયાત)થી આવક ૧૭ ટકા વધારે રહી હતી.માર્ચ, ૨૦૨૨માં કુલ ૭.૭ કરોડ ઇ વે બિલ કાઢવામાં આવ્યા હતાં.જે ફેબુ્રઆરીના ૬.૮ કરોડ કરત ૧૩ ટકા વધારે છે. આ આંકડાઓથી બિઝનેસ પ્રવૃત્તિઓમાં વૃદ્ધિના સંકેત મળી રહ્યાં છે.૨૦ એપ્રિલના રોજ સમગ્ર મહિનામાં સૌથી વધુ ૫૭,૮૪૭ કરોડ રૃપિયાનું જીએસટી ક્લેક્શન જમા કરાવવામાં આવ્યું હતું.
