બારડોલી : બહુચર્ચિત બનેલા સુરત જિલ્લાના કડોદરા GIDC પોલીસ મથકના આપત્તિજનક મેસેજ પ્રકરણમાં રેન્જના ડી.જી.પી.થી લઈ કડોદરાના ઇન્ચાર્જ અધિકારી ASP બિશાખા જૈને અંગત રસ દાખવી PSI એ.બી. મોરી વિરુદ્ધની ખાતાકીય તપાસમાં એક મહિલા પોલીસ કર્મચારી અને મહિલા GRD તેમજ એક પોલીસકર્મીના નિવેદન લેવડાવી રાતોરાત બંધ કવરમાં રિપોર્ટ મોકલાતા વિવાદાસ્પદ PSI મોરીને સસ્પેન્ડ કરી દેવામાં આવ્યા છે.આ પ્રકારની પ્રવૃત્તિ સામે મહિલા પોલીસ અધિકારીએ ગંભીરતા દાખવી જેને લઈ પોલીસ કર્મચારીઓનું મનોબળ મજબૂત થયું હોવાનું જણાય રહ્યું છે.
કડોદરા જીઆઇડીસી પોલીસ સ્ટેશનના વિવાદાસ્પદ પીએસઆઇ એ.બી.મોરીએ સોશ્યલ મીડિયાના માધ્યમથી પોલીસ સ્ટેશનમાં ફરજ બજાવતી મહિલા પોલીસ કર્મચારીને ગત 15મી એપ્રિલના રોજ આપત્તિજનક મેસેજ મોકલ્યો હોવાના પ્રકરણમાં વિવાદ વકરતા એક મહિલા જીઆરડી પણ સામે આવી પીએસઆઇ મોરીએ તેમને આપત્તિજનક મેસેજ કર્યા હોવાનો ખુલાસો કડોદરા પોલીસ મથકના ઇન્ચાર્જ આઇ.પી.એસ. ASP બિશાખા જૈનને કર્યો હતો.ત્યારબાદ વિવાદ વકરતા જ જિલ્લા પોલીસવડા હિતેશ જોયસરે આ પ્રકરણમાં રેન્જ આઈ.જી.નું ધ્યાન દોરી ખાતાકીય તપાસનો હુકમ કર્યો હતો.
મહિલા પોલીસ કર્મચારી અને જી.આર.ડી. ઉપરાંત અરજદારને પણ સતામણી કરી હોય જે ગંભીર બાબતને લઈ કડોદરા પોલીસ સ્ટેશનના ASP બિશાખા જૈન ગંભીર હતા અને તેમણે બે પાનાંનું વિગતવાર ગુપ્ત રિપોર્ટ જિલ્લા પોલીસ વડાને કર્યો હતો. સૂત્રોના જણાવ્યા અનુસાર આ રિપોર્ટમાં સુરત જિલ્લાની ફરજ દરમ્યાન પી.એસ.આઇ. મોરીએ કરેલા તમામ કારનામાના પાનાં ખુલ્લા કરી નાખ્યા હતા.બીજી તરફ બાબતની ગંભીરતાને લઈ તેમણે મહિલા પોલીસ કર્મચારી અને જી.આર.ડી.નું મનોબળ મજબૂત કર્યું હતું અને નીડરતાથી જે સત્ય હોય તે પોલીસ ચોપડે જણાવવા કહ્યું હતું.જેને પગલે શુક્રવારના રોજ ભાર્ગવ પંડ્યાએ નોંધેલા નિવેદનમાં આ બે મહિલા કર્મચારી તેમજ એક પોલીસ કર્મચારીએ પી.એસ.આઇ મોરીના કારનામા ખુલ્લા કરી દીધા હતા.સાથો સાથ જી.આર.ડી.એ પણ પી.એસ.આઇ. મોરીએ કરેલા મેસેજ અધિકારી સમક્ષ રજૂ કર્યા હતા.જેને પગલે DYSP ભાર્ગવ પંડ્યાએ તાત્કાલિક રિપોર્ટ તૈયાર કરી બંધ કવરમાં જિલ્લા પોલીસ વડાને મોકલી આપ્યા હતા.
જિલ્લા પોલીસ વડા પણ મોડીરાત સુધી કચેરીમાં હાજર રહી તાત્કાલિક અસરથી એ.બી.મોરીને સસ્પેન્ડ કર્યા હતા અને સસ્પેન્શનના ઓર્ડરની બજવણી માટે CPI ચૌધરીને આપતા મોડીરાત્રે વડોદરા જઈ સસ્પેન્શનનો ઓર્ડરની બજવણી કરી દીધી હતી. વિવાદાસ્પદ પીએસઆઇ મોરી સસ્પેન્ડ થતાં જ બિશાખા જૈને આ પ્રકરણમાં જે રીતે રસ દાખવ્યો તેનાથી પોલીસ કર્મચારીનું મનોબળ મજબૂત થયું હતું.
