જ્ઞાનવાપી કેસ જિલ્લા કોર્ટમાં ટ્રાન્સફર, શિવલિંગ વિસ્તાર ‘સીલ’ રહેશે

નવી દિલ્હી : તા.૨૦ સુપ્રીમ કોર્ટે શુક્રવારે હિન્દુ પક્ષ દ્વારા દાખલ કરાયેલો જ્ઞાનવાપી-શ્રૃંગાર ગૌરી પરિસર કેસ સિવિલ જજ પાસેથી જિલ્લા કોર્ટના સિનિયર જજને ટ્રાન્સફર કર્યો હતો અને કહ્યું કે,આ મુદ્દાની જટીલતા અને ગંભીરતાને ધ્યાનમાં રાખતાં ૨૫-૩૦ વર્ષનો અનુભવ ધરાવતા વરિષ્ઠ ન્યાયાધીશ આ કેસમાં સુનાવણી કરે તે વધુ સારી બાબત છે.આ સાથે સુપ્રીમ કોર્ટે એક મહત્વપૂર્ણ નિરીક્ષણમાં કહ્યું કે, ૧૯૯૧નો પ્લેસીસ ઓફ વરશિપ એક્ટ પૂજાના સ્થળનું ધાર્મિક ચરિત્ર નિશ્ચિત કરવામાં અવરોધરૂપ નથી બનતો.
ન્યાયાધીશો ડીવાય ચંદ્રચુડ,સૂર્ય કાંત અને પીએસ નરસિંહાની બેન્ચે જણાવ્યું હતું કે,જિલ્લા કોર્ટમાં જ્ઞાનવાપી કેસની મેઈન્ટેનેબિલિટીના કેસની પ્રાથમિક્તાથી સુનાવણી થવી જોઈએ અને તેમાં જિલ્લા ન્યાયાધીશ સક્ષમ છે.તેઓ ઘણા અનુભવી પણ છે.આ કેસમાં ચૂકાદો જિલ્લા અદાલત જ કરશે.અમે ટ્રાયલ કોર્ટની કાર્યવાહીને રોકી શકીએ નહીં.શાંતિ જાળવી રાખવા માટે બંધારણમાં એક માળખુ બનાવાયું છે.
બેન્ચે કહ્યું કે,આ જટિલ સામાજિક સમસ્યાઓ છે.તેમાં મનુષ્ય દ્વારા કરાયેલું કોઈપણ સમાધાન સચોટ હોઈ શકે નહીં.અમારો આદેશ શાંતિ વ્યવસ્થા જળવાઈ રહે તેના પર આધારિત હતો.આ કામ વચગાળાના આદેશથી થઈ શકે છે.આ સાથે સુપ્રીમ કોર્ટે કમિશનરનો રિપોર્ટ લીક થવા અંગે ચેતવણી આપતા કહ્યું કે એક વખત કોર્ટ સમક્ષ રિપોર્ટ આવી ગયા પછી સિલેક્ટિવ રીતે તે લીક થઈ શકે નહીં.આ સરવે રિપોર્ટ માત્ર ન્યાયાધીશ જ ખોલી શકે છે.
સુનાવણી દરમિયાન મુસ્લિમ પક્ષે ૧૯૯૧ના’પ્લેસીસ ઓફ વરશિપ એક્ટ’નો પણ ઉલ્લેખ કર્યો અને કહ્યું કે તેના હેઠળ જ્ઞાનવાપીનો સરવેનો આદેશ ખોટો હતો.આ સંદર્ભમાં સુપ્રીમે આ જ કાયદાની કલમ ૩નો ઉલ્લેખ કર્યો અને કહ્યું કે સરવેના આદેશમાં કોઈ ખામી નથી.બેન્ચના વરિષ્ઠ સભ્ય જસ્ટિસ ડીવાય ચંદ્રચૂડે કહ્યું કે,ધાર્મિક સ્થળોનું ચરિત્ર નિશ્ચિત કરવાનું કામ પણ અમારું છે.મંદિર અને મસ્જિદના મિશ્રણવાળું હાઈબ્રિડ કેરેક્ટર હોય તો તે સ્થળનું ચરિત્ર નિશ્ચિત કરવા માટે તપાસ થઈ શકે છે.સુપ્રીમ કોર્ટની આ ટીપ્પણીથી સ્પષ્ટ થઈ ગયું કે,૧૯૯૧નો પ્લેસીસ ઓફ વર્શિપ એક્ટ આ કેસમાં અવરોધરૂપ નથી.આ સાથે સુપ્રીમ કોર્ટે એ પણ સ્પષ્ટ કરી દીધું કે આ સંપૂર્ણ કેસમાં ચૂકાદો નીચલી કોર્ટ જ કરશે.
સુપ્રીમ કોર્ટે સુનાવણી દરમિયાન મુસ્લિમો માટે વજુની વૈકલ્પિક વ્યવસ્થા કરવા અને’શિવલિંગ’મળ્યું હોવાના સ્થળના વચગાળાના આદેશ જળવાઈ રહેશે.સુપ્રીમે કહ્યું કે,આ આદેશ આગામી ૮ સપ્તાહ એટલે કે ૧૭મી જુલાઈ સુધી ચાલુ રહેશે.દરમિયાન જ્ઞાનવાપી મસ્જિદમાં શુક્રવારની નમાઝ માટે મોટી સંખ્યામાં મુસ્લિમો એકત્ર થતાં વાતાવરણ તણાવપૂર્ણ થઈ ગયું હતું.જોકે,ચાંપતા પોલીસ બંદોબસ્ત તેમજ સ્થાનિક તંત્રની સમજાવટને પગલે મુસ્લિમોએ શાંતિપૂર્વક રીતે નમાઝ અદા કરી હતી અને જેમને મસ્જિદમાં પ્રવેશ ન મળ્યો તેઓ પણ શાંતિપૂર્ણ રીતે પાછા ફરી ગયા હતા.