નવી દિલ્હી : માર્કેટ સતત પાંચ સપ્તાહના ઘટાડા પછી ગત સપ્તાહે વધીને બંધ રહ્યું.ભારે વોલેટિલિટી વચ્ચે શુક્રવારે મોટા ઉછાળાને કારણે બજાર સાપ્તાહિક ધોરણે પોઝિટિવ બંધ રહ્યું.પરિણામની સિઝન હવે પૂરી થવામાં છે અને ચોમાસાના વર્તારા થઈ રહ્યા છે.આગામી સપ્તાહે એફ એન્ડ ઓની સિરીઝની એક્સપાયરી હોવાથી બજારમાં વોલેટિલિટી વધશે તેવી ધારણા છે.બજાર માટે હાલ સૌથી મોટુ પરિબળ વિદેશી સંસ્થાગત રોકાણકારો(એફઆઈઆઈ)ની વેચવાલી છે.ગત સપ્તાહે તેમણે ~11,401 કરોડની નેટ વેચવાલી કરી હતી,જ્યારે ડીઆઈઆઈએ ~9473 કરોડની નેટ ખરીદી કરી હતી.મે મહિનામાં એફઆઈઆઈએ ~44,102 કરોડની નેટ વેચવાલી કરી નાખી છે અને ડીઆઈઆઈએ ~36,208 કરોડની નેટ ખરીદી કરી છે.એફઆઈઆઈની ભારે વેચવાલીને પગલે ડોલર સામે રૂપિયો ખાસ્સો નબળો પડ્યો છે.ગત સપ્તાહે તેણે 77.92ની નવી ઐતિહાસિક નીચી સપાટી બતાવી હતી.ઈક્વિટીમાં એફઆઈઆઈની વેચવાલી આગળ વધશે તો રૂપિયામાં પણ વધુ ધોવાણ થશે.રશિયા-યુક્રેન યુદ્ધ અપેક્ષા કરતાં ઘણું લાંબું ચાલ્યું છે જેની કિંમત સમગ્ર વિશ્વએ ચૂકવવી પડી રહી છે.સપ્લાય ચેઈનની સમસ્યા આગળ વધી રહી છે અને મોંઘવારી સતત વધી રહી છે.ગ્રુપ-7 દેશોના નામામંત્રીઓએ ગત સપ્તાહે આ પડકારોની ચર્ચા કરી અને યુક્રેનને 19.8 અબજ ડોલરની આર્થિક મદદની જાહેરાત કરી દીધી છે.દરમિયાન ઈટાલીના વિદેશ મંત્રીએ કહ્યું છે કે યુદ્ધ સમાપ્ત થાય તે માટે તેમણે યુએનમાં શાંતિ પ્રસ્તાવ રજૂ કર્યો છે,જેમાં સ્થાનિક નાગરિકોને સલામત રીતે બહાર કાઢવા અને માનવીય સહાયની વાત કરવામાં આવી છે.આ જોતા યુદ્ધ અંગે અનિશ્ચિતતા હજી આગળ ધપશે તેમ જણાય છે.
જોકે સ્થાનિક સ્તર પર સરકારે મોંઘવારીની ચિંતા કરીને પેટ્રોલમાં એક જ ઝાટકે લિટરદીઠ~9.50નો અને ડીઝલમાં લિટરદીઠ~7નો ઘટાડો કરી દીધો છે,જે અત્યાર સુધીનો સૌથી મોટો ઘટાડો છે.તેને કારણે સામાન્ય નાગરિકોને મોટી રાહત થઈ છે.રિઝર્વ બેન્કની આગામી પોલિસી રિવ્યૂ બેઠક અગાઉ લેવાયેલા આ નિર્ણયથી ફુગાવા પર અંકુશની મોટી આશા ઊભી થઈ છે.આવા સંજોગોમાં આરબીઆઈ હવે વ્યાજના દર વધારવા પર બ્રેક મારી શકે છે.વળી,ગત સપ્તાહે ચીને આશ્ચર્યજનક રીતે વ્યાજના દરમાં ઘટાડો જાહેર કરીને ગ્રોથને જાળવવા પર ફોકસ કર્યું છે.પરિણામોની સિઝન અંતિમ તબક્કામાં છે જેમાં આગામી સપ્તાહે કુલ 1200થી વધુ કંપનીઓ માર્ચ ક્વાર્ટરના પરિણામ જાહેર કરશે.તેમાં કેટલીક અગ્રણી કંપનીઓમાં સેઈલ,મહિન્દ્રા એન્ડ મહિન્દ્રા,ઓએનજીસી,કોલ ઈન્ડિયા,બીઈએમએલ,ગેઈલ,અદાણી પોર્ટ્સ એન્ડ સેઝ, ગ્રાસિમ ઈન્ડસ્ટ્રીઝ,બાટા,ભારત ડાયનેમિક્સ,બેન્ક ઓફ ઈન્ડિયા,ગોદરેજ ઈન્ડસ્ટ્રીઝ,ઝી એન્ટરટેઈનમેન્ટ,જિન્દાલ સ્ટીલ,ઈન્ડિયા સિમેન્ટ્સ,વગેરેનો સમાવેશ છે.
