અમદાવાદ : ગુજરાત યુનિ.સાથે જોડાયેલી કોમર્સ કોલેજોમાં પ્રવેશ માટે આવતીકાલ બુધવારથી ક્વીક રજિસ્ટ્રેશન પ્રક્રિયા શરૂ કરવામાં આવશે.બોર્ડ તરફથી વિદ્યાર્થીઓના માર્કસની સીડી મળ્યા બાદ સંપૂર્ણ રજિસ્ટ્રેશન પ્રક્રિયા શરૂ કરાશે.ગતવર્ષે જે એજન્સીના કારણે અનેક છબરડાઓ થયા હતા તેજ એજન્સીને ચાલુવર્ષે પણ કામગીરી સોંપવામાં આવી છે.આ ઉપરાંત પ્રવેશની સંપૂર્ણ વિગતો આપવા માટે યુનિ.માં કોઇ તંત્ર જ ઉપલબ્ધ ન હોય તેવી સ્થિતિ જોવા મળી રહી છે.
ધો.12 સામાન્ય પ્રવાહનું પરિણામ આવ્યા પહેલા યુનિ.દ્વારા પ્રવેશ પ્રક્રિયા કઇ એજન્સીને સોંપવી તેનો નિર્ણય કરવા માટે કમિટીની રચના કરી હતી.કઇ એજન્સીને કામગીરી આપવાની છે તેની કોઇ જાહેરાત હજુસુધી કરવામાં આવી નથી.આશ્ચર્યની વાત એ કે,પ્રવેશ સમિતિના સભ્યોને પણ પ્રવેશ પ્રક્રિયા કોને સોંપવામાં આવી છે તેની કોઇ જાણકારી નહોતી.આજે કેટલાય સભ્યોએ આ અંગે જાણકારી મેળવવા પ્રયાસ કર્યો ત્યારે ગતવર્ષે જે એજન્સીને કામગીરી સોંપવામાં આવી હતી તેના દ્વારા જ કાર્યવાહી કરવાની હોવાનું બહાર આવ્યું હતુ.મહત્ત્વની વાત એ કે યુનિ.માં હાલની સ્થિતિમાં પ્રવેશ પ્રક્રિયા કયારથી શરૂ થશે,કેવી રીતે શરૂ થશે તે અંગે વિસ્તૃત જાણકારી આપવા માટે કોઇ તંત્ર જ ઉપલબ્ધ નથી.પ્રવેશ સમિતિના સભ્યો કહે છે આવતીકાલથી કોમર્સ સહિતના કોર્સમાં પ્રવેશ માટે ક્વીક રજિસ્ટ્રેશન કરવાનું નક્કી કરવામાં આવ્યું છે.પ્રવેશ અંગેની માહિતી પુસ્તિકા વેબસાઇટ પર મુકી દેવામાં આવી છે.સભ્યો કહે છે પ્રવેશ પ્રક્રિયા કેવી રીતે થશે,કેટલા રાઉન્ડ થશે તે સહિતની કોઇ જાણકારી નથી,યુનિ.સત્તાધીશો કહેશે તે પ્રમાણે કાર્યવાહી કરવામાં આવશે.
યુનિ.દ્વારા કોઇપણ પ્રકારના જાહેરાત કે સૂચના વગર બારોબાર સાયન્સ કોલેજોમાં પ્રવેશ માટે રજસ્ટ્રેશનની પ્રક્રિયા શરૂ કરી દેવામાં આવી છે.યુનિ.દ્વારા દરેક ફેકલ્ટીના ડીનને પ્રવેશની જવાબદારી સોંપવામાં આવી છે.સાયન્સ ફેકલ્ટીના ડીનનો વારંવાર સંપર્ક કરવા છતાં તેઓ મળી શકયા નથી.પ્રવેશ સમિતિના અન્ય સભ્યો કહે છે છેલ્લા બે દિવસથી સાયન્સ કોલેજોમાં પ્રવેશ માટે ક્વીક રજિસ્ટ્રેશન શરૂ કરી દેવામાં આવ્યું છે.અત્યાર સુધીમા 1500થી વધારે વિદ્યાર્થીઓએ રજિસ્ટ્રેશન કરાવી લીધું છે.37 સાયન્સ કોલેજોની 14 હજાર બેઠકો માટે આ કાર્યવાહી શરૂ કરવામાં આવી છે.ચાલુ વર્ષે બે ખાનગી સાયન્સ કોલેજો બંધ થાય તેવી પણ શક્યતા છે.
