અમદાવાદ : અમદાવાદ મ્યુનિ.માં સને ૨૦૧૭નાં વર્ષમાં પર્દાફાશ થયેલાં રોડ કૌભાંડમાં ડામરનાં કરોડોનાં બોગસ બિલ કૌભાંડનાં જવાબદારો પણ છાવરવામાં આવી રહ્યાં હોવાનો આક્ષેપ સાથે મ્યુનિ. વિરોધપક્ષ કોંગ્રેસે કમિશનરની કચેરી બહાર આક્રમક દેખાવ યોજીને સૂત્રોચ્ચાર કર્યાં હતા.મ્યુનિ.કોંગ્રેસપક્ષ નેતા શેહઝાદખાન પઠાણે જણાવ્યું હતું કે,સને ૨૦૧૭માં વરસાદ પડતાં જ અનેક વિસ્તારોનાં મોટાભાગનાં રોડ ધોવાઇ ગયા હતા અને ખાડા પડી ગયા હતા.તેનાં કારણે નાગરિકોમાં વિકાસ ગાંડો થયોનાં સૂત્રો વહેતા થતાં જ ભાજપે પોતાની પ્રતિષ્ઠા બચાવવા માટે તત્કાલિન કમિશનરને રોડ કૌભાંડમાં તપાસ કરવાની સૂચના આપી હતી.
તત્કાલિન કમિશનરે ૪૦૦ કરોડનાં ખર્ચે રિસરફેસ થયેલા રોડ ધોવાઇ ગયાનાં ચકચારી પ્રકરણમાં વિજિલન્સ તપાસની સાથે નિવૃત્ત ન્યાયાધીશને પણ તપાસ સોંપી હતી.પાંચ વર્ષનાં લાંબા સમયગાળા બાદ તપાસ પૂરી થયા બાદ વર્તમાન કમિશનર લોચન સેહરાએ જવાબદાર ઇજનેર અધિકારીઓ સામે આકરા પગલાં લેવાને બદલે ઇન્ક્રીમેન્ટ જેટલી રકમનાં દંડ ભરાવીને છોડી મુકીને તેમને બચાવી લીધા હોવાનું સ્પષ્ટ પુરવાર થઇ રહ્યું છે.
એટલું જ નહીં,ડામરનાં કરોડો રૂપિયાનાં બોગસ બિલો રજૂ કરનારા કોન્ટ્રાક્ટરો સામે તપાસનાં નામે ૯૦૦ ફાઇલોનું ચેકિંગ કરવામાં આવતાં ૩૯ જેટલાં ડુપ્લીકેટ બિલ મળી આવ્યા હતા,તે બાબતે વસ્ત્રાપુર, વાડજ અને કારંજ પોલીસ સ્ટેશનમાં ફરિયાદ નોંધાવીને મ્યુનિ.સત્તાધીશો આરામથી ઉંઘી ગયાં છે તેવો આક્ષેપ કરતાં મ્યુનિ.વિપક્ષ નેતાએ ઉમેર્યું હતું કે,પ્રજાનાં ટેક્સનાં નાણાંથી ભરાતી મ્યુનિ.તિજોરીને જંગી નુકસાન પહોંચાડાયું હોવા છતાં રોડ કૌભાંડમાં તમામને બચાવી લેવા બદલ વર્તમાન કમિશનરની સામે વિરોધ પ્રદર્શન યોજવામાં આવ્યું હતું અને તેમની કચેરી બહાર સૂત્રોચ્ચાર કરવામાં આવ્યો હતો.ત્યારબાદ કમિશનરને મળીને રોડ કૌભાંડમાં જે પણ જવાબદાર છે તે તમામ સામે દાખલારૂપ પગલા લેવાની માગણી કરવામાં આવી હતી
