અમદાવાદ : રાજ્યમાં ભારે ઉકળાટ વચ્ચે સતત બીજા દિવસે વરસાદ નોંધાયો છે.સોમવારે 22 તાલુકામાં નોંધપાત્ર વરસાદ નોંધાયો છે. જેમાં સૌથી વધુ સૌરાષ્ટ્રમાં રાજકોટ અને ઉત્તર ગુજરાતમાં વિજયનગર, ધનસુરામાં ત્રણ-ત્રણ ઈંચ વરસાદ નોંધાયો છે.જો કે વરસાદ કેટલાક વિસ્તારમાં આફત બનીને આવ્યો હતો.કેમ કે વરસાદી વીજળી પડવાથી રાજ્યના જુદા જુદા વિસ્તારોમાં 6 લોકોનાં મોત થયા છે.ઉપરાંત કેટલાક પશુઓનાં પણ મોત થયા છે.
ઉત્તર ગુજરાતમાં સાબરકાંઠા,અરવલ્લી,બનાસકાંઠા અને પાટણ જિલ્લામાં મેઘમહેર જોવા મળી હતી.જેમાં સાબરકાંઠા જિલ્લાના વિજયનગર અને અરવલ્લીના ધનસુરામાં ૩-૩ ઇંચ વરસાદ વરસ્યો હતો જ્યારે મોડાસા અને તલોદમાં ૨-૨ ઇંચ વરસાદ નોંધાયો હતો.આ ઉપરાંત બાયડમાં ધામણી નદીમાં નવા નીર આવતાં નદીમાં આધેડ ડૂબતાં તેની શોધખોળ હાથ ધરાઈ હતી.જ્યારે પાટણમાં વીજળી પડતાં ખેતરમાં કામ કરી રહેલા કિશોર પર વીજળી પડતાં મોત નીપજ્યું હતું.મૃતકના પિતા પણ વીજળીના કારણે થોડીવાર માટે બેભાન થઈ ગયા હતા.કિશોરના મોતને લઈ પરિવારમાં શોક નું મોજું ફરી વળ્યું હતું.આ ઉપરાંત બનાસકાંઠાના દિયોદર પંથકમાં પણ વીજળીના કડાકા સાથે વરસાદ વરસ્યો હતો જેમાં ચાર પશુઓનાં વીજળી પડવાથી મોત નીપજ્યાં હતા.આ ઉપરાંત ડીસામાં વાવાઝોડાને કારણે જીવંત વીજવાયર પડતાં ચાર પશુઓ મોતને ભેટ્યાં હતાં.
સૌરાષ્ટ્રમાં સતત ત્રીજા દિવસે મેઘમહેર થઈ હતી.સૌથી વધુ રાજકોટ શહેરમાં ત્રણ ઈંચ વરસાદ નોંધાયો છે.જૂનાગઢ,જામનગરના કેટલાક વિસ્તાર સહિત કચ્છમાં પણ વરસાદ નોંધાયો હતો.કચ્છમાં કુલ 3 વ્યક્તિ પર વિજળી પડી જેમા ભચાઉ તાલુકાના ખારોઇ ગામે વિજળી પડતા 2 નાં મોત થયાં છે.આ ઉપરાંત રાપરના સુવઇ આસપાસના ગામોમાં 1 ઇંચથી વધુ વરસાદ પડ્યો છે.નખત્રાણાના કોટડા જદોડરમાં એકથી દોઢ ઇંચ વરસાદ પડ્યો છે.દેવભૂમી દ્વારકા જિલ્લામાં પણ વરસાદ નોંધાયો છે.અમરેલી બાબરા તાલુકાનાં વાવડા ગામે 45 મિનિટમાં 2 ઈચ જેટલો વરસાદ પડી ગયો હતો.દક્ષિણ ગુજરાતમાં પણ વરસાદ નોંધાયો છે.સુરત જિલ્લામાં વરસાદ પડ્યો હતો ઓલપાડ,સાયણ અને કીમ વિસ્તારમાં વરસાદ પડ્યો હતો.કોસંબા અને માંગરોળ તાલુકામાં પણ વરસાદ પડ્યો હતો.બારડોલી તાલુકામાં પણ વરસાદ પડ્યો હતો.
બારડોલી તાલુકાના ભામૈયા,મોરી,ખોજ,પારડી ગામોમાં પવન સાથે વરસાદ પડ્યો હતો.મધ્ય ગુજરાતમાં પણ નર્મદા સહિતના વિસ્તારમાં વરસાદ નોંધાયો હતો.ડેડીયાપાડાના કણજીમાં દેવનદીના કોઝવે પરથી પસાર થઇ રહેલી માતા અને પુત્રી પાણીના ધસમતા પ્રવાહમાં તણાઇ ગયાં હતાં.આ ઘટનામાં માતાનો બચાવ થયો છે જયારે પુત્રીનું મોત થયું હતું.તો બીજી બાજુ સાગબારાની એક મહિલાનું વીજળીપડવાથી મોતની ઘટના હજુ તાજી જ છે.તેવામાં નર્મદા જિલ્લાના તિલકવાડા તાલુકામાં વીજળી પડતા વધુ એક મહિલાનું મોત થયું છે.
