અમદાવાદ : મ્યુનિ.શાસક ભાજપ અને તત્કાલીન કમિશનર સહિતનાં તંત્રને કફોડી સ્થિતિમાં મુકી દેનારા સને ૨૦૧૭-૧૮નાં રોડ કૌભાંડમાં સંડોવાયેલાં એક રોડ કોન્ટ્રાકટર મ્યુનિ.સામે આર્બીટ્રેશનમાં કેસ જીતી જતાં મ્યુનિ.વર્તુળોમાં ખળભળાટ મચી જવા પામ્યો છે. જોકે મ્યુનિ.એ ૮૫ કરોડ જેટલી માતબર રકમ ચૂકવવાને બદલે સિટી સિવિલ કોર્ટમાં અપીલ દાખલ કરી દીધી હોવાનુ જાણવા મળ્યુ છે.મ્યુનિ.સૂત્રોમાંથી પ્રાપ્ત વિગતો અનુસાર,સને ૨૦૧૭-૧૮નાં વર્ષમાં શહેરમાં ચોમાસાની મોસમમાં જ અનેક વિસ્તારનાં રોડ ધોવાઇ ગયા હતા અને વાટકા જેવા ખાડા પડી ગયા હતા.ખાડાખૈયાવાળા રસ્તાઓથી વાહનચાલકો અને રાહદારીઓ પણ ત્રાહિમામ પોકારી ઉઠ્યા હતા અને કેટલાક ટીખળીઓએ વિકાસ ગાંડો થયોનાં બેનરો લગાવ્યા હતા.
શહેરના મોટા ભાગનાં રોડ ધોવાઇ જઇ ખાડાખૈયાવાળા બની ગયા તેનાથી તત્કાલીન શાસક ભાજપ અને કમિશનર સહિતનાં અધિકારીઓને નીચાજોણુ થયુ હતુ,એટલુ જ નહિ ગાંધીનગરથી રોડ રિસરફેસ કરનારા કોન્ટ્રાકટરો અને અધિકારીઓ સહિત જે પણ જવાબદાર હોય તેની સામે આકરા પગલા લેવાનો આદેશ આવ્યો હતો.જેના પગલે મ્યુનિ.કમિશનરે રોડ કૌભાંડની વિજીલન્સ તપાસ અને નિવૃત્ત ન્યાયાધીશને તપાસ સોંપવાનો નિર્ણય લીધો હતો.આ ચકચારી પ્રકરણમાં પશ્ચિમ ઝોન અને નવા પશ્ચિમ ઝોનમાં રોડ રિસરફેસનાં કોન્ટ્રાક્ટ આકાશ ઇન્ફ્રા તથા જી.પી.ચૌધરી એમ બે કોન્ટ્રાકટરોને ૧૦-૮-૧૭થી ૯-૮-૨૦ સુધી બ્લેકલિસ્ટ કરવામાં આવ્યા હતા અને તેમનાં બિલ અટકાવીને અમુક રકમ વસુલ કરવાનો આદેશ કરાયો હતો.મ્યુનિ.તંત્રનાં આદેશથી નારાજ થયેલાં આકાશ ઇન્ફ્રા નામનાં કોન્ટ્રાકટરે આર્બીટ્રેશનમાં ૫૦ કલેમ કર્યા હતા.જેની કુલ રકમ વ્યાજ સાથે ૧૧૬ કરોડ ઉપર થવા જાય છે.
ગુજરાત હાઇકોર્ટ સમક્ષ થયેલી પીટીશનમાં હાઇકોર્ટે તા.૧૫-૨-૧૯નાં રોજ પૂર્વ ન્યાયાધીશ અંતાણીની સોલ આર્બીટ્રેટર તરીકે નિમણૂંક કરી હતી.તેમણે ઉપરોક્ત પીટીશનમાં જુદા જુદા ૫૧ ક્લેઇમ નક્કી કર્યા હતા.જોકે તા.૨૪-૮-૨૦માં નિવૃત્ત ન્યાયાધીશ અંતાણીનુ અવસાન થયાં બાદ રાજય સરકારનાં રોડ એન્ડ બિલ્ડીંગ વિભાગનાં નિવૃત્ત સેક્રેટરી એસ.આઇ.પટેલની સોલ આર્બીટ્રેટર તરીકે નિમણૂંક કરવામાં આવી હતી.આર્બીટ્રેટર સમક્ષ આકાશ ઇન્ફ્રા અને મ્યુનિ.ની રજૂઆતો પૂરી થયા બાદ અંતિમ એવોર્ડ આવ્યો હતો અને તેમાં આકાશ ઇન્ફ્રાને બ્લેકલિસ્ટ કરવાનાં મ્યુનિ.નાં નિર્ણયને ગેરવાજબી,કોન્ટ્રાક્ટની શરતોની વિરૂધ્ધ તથા કુદરતી ન્યાયનાં સિધ્ધાંતોનુ ઉલ્લંઘન કરનાર ગણાવવામાં આવ્યો હતો.જોકે મ્યુનિ.નાં ઉચ્ચ અધિકારીઓએ આકાશ ઇન્ફ્રાની તરફેણમાં આવેલાં આર્બીટ્રેશનનાં અંતિમ એવોર્ડ સામે સિટી સિવિલ કોર્ટમાં અપીલ દાખલ કરાવી દીધી હોવાનુ જાણવા મળ્યુ છે.
