બારડોલી : બારડોલી તાલુકામાંથી પસાર થતાં રાષ્ટ્રીય ધોરીમાર્ગ નંબર 53 પર આવેલા ગામોને સર્વિસ રોડની સુવિધા આપવામાં નહીં આવી હોય ખુદ સુરત જિલ્લા પંચાયતના પ્રમુખ ભાવેશ પટેલ દ્વારા NHAI ભરૂચના પ્રોજેકટ ડાયરેક્ટરના ઇજનેરો સાથે મિટિંગ કરી તાત્કાલિક ધોરણે રોડ બનાવવા સૂચનો કર્યા હતા.
સુરત જિલ્લામાંથી પસાર થતાં નેશનલ હાઇવે નંબર 53 પર આવેલા ગામડાઓ છેલ્લા ઘણા સમયથી સર્વિસ રોડની માગ કરી રહ્યા છે.કેટલાક ગામડાઓને હાઇવે પર કટ પણ આપવામાં આવ્યો ન હોય અવરજવરની ભારે હાલાકી વેઠવી પડી રહી છે.ગ્રામજનોની અનેક રજૂઆત બાદ પણ NHAI દ્વારા કોઈ કાર્યવાહી કરવામાં આવી ન હતી.દરમ્યાન આ મામલે હવે સુરત જિલ્લા પંચાયતના પ્રમુખ ભાવેશ પટેલ ખુદ મેદાનમાં આવ્યા છે.તેમણે બુધવારના રોજ NHAIના અધિકારીઓએ સાથે સર્વિસ રોડ બાબતે ચર્ચા કરી હતી.
ત્યારબાદ અધિકારીઓને સાથે રાખી સર્વિસ રોડની જરૂરિયાત વાળા વણેસા,નાંડીદા,ઉતારા-વધાવા,સેજવાડ અને ઉવા ગામની મુલાકાત લઈ સ્થળ નિરીક્ષણ કર્યું હતું અને લોકોને આવન જાવનમાં પડી રહેલ અડચણ બાબતે વાકેફ કર્યા હતા.તેમણે ઉપરોક્ત ગામોને તાત્કાલિક સર્વિસ રોડ બનાવી આપવામાં આવે તેવી સૂચના આપી હતી.
