સુરત : ત્રણ વર્ષ પહેલા ઓલપાડથી કારમાં સુરત આવતા પિયુષ તાલાનું માસમા ગામ પાસે આઇશર ટેમ્પોએ અડફટે લેતા મોત થયું હતું ત્રણેક વર્ષ પહેલાં ઓલપાડ-માસમા રોડ પર પાટણના આઈસર ટેમ્પો ચાલકે સર્જેલા અકસ્માતમાં મૃત્તક કાર ચાલક યુવાનના વિધવા વારસોની રૃ.90 લાખના અકસ્માત વળતરની માંગને આજે મોટર એક્સીડેન્ટ ક્લેઈમ ટ્રીબ્યુનલના ઓક્ઝીલરી જજ એડીશ્નલ સેશન્સ જજ અમિતાબેન વૈષ્ણવે અંશતઃ મંજુર કરી વાર્ષિક 9 ટકાના વ્યાજ સહિત કુલ રૃ.55.20 લાખ ચુકવવા ટેમ્પો ચાલક,માલિક તથા ધી ઓરિએન્ટલ ઈન્સ્યુરન્સ કંપનીને હુકમ કર્યો છે.
કતારગામ ખાતે લક્ષ્મીધામ સોસાયટીમાં રહેતા તથા કમિશન એજન્ટ તરીકે કામ કરતાં 34 વર્ષીય પિયુષ વિનુભાઈ તાળા ગઈ તા.3-1-19ના રોજ પોતાની સ્વીફ્ટ કાર ચલાવીને ઓલપાડથી સુરત પરત ફરી રહ્યા હતા.જે દરમિયાન ઓલપાડ-માસમા રોડ પર સાયનાઈડ ફેકટરી પાસે સિધ્ધપુર પાટણના ટ્રાન્સપોર્ટર દિનેશ રામજી ઠક્કરની માલિકીના આઈસર ટેમ્પોના ચાલક જીજ્ઞોશ કુમાર રોહિત કુમાર શુક્લાએ ડ્રાઈવીંગ પર કંટ્રોલ ગુમાવીને સ્વીફ્ટ કારને હડફેટે લેતા ગમખ્વાર અકસ્માત સર્જાયો હતો.જેમાં કાર ચાલક પિયુષ તાળાને માથા તથા શરીરના અન્ય વાઈટલ પાર્ટસ પર ગંભીર ઈજા થતાં તેમનું ઘટના સ્થળે જ મોત નિપજ્યું હતુ.કાર ઉપરાંત ટેમ્પો ચાલકે એક ઓટો રીક્ષાને પણ હડફેટે લીધી હતી.
આથી મૃત્તક કાર ચાલક યુવાન પિયુષ તાળાના વિધવા પત્ની કલ્પનાબેન,સગીર સંતાન માહેર,સાસુ-સસરા વર્ષાબેન તથા વિનુભાઈ વગેરેએ અનિલ નાયક મારફતે ટેમ્પો ચાલક,માલિક અને વીમા કંપની પાસેથી રૃ.90 લાખનું અકસ્માત વળતર વસુલ અપાવવા માંગ કરી હતી.જેની સુનાવણી બાદ ટ્રીબ્યુનલ જજે રેકર્ડ પરના પુરાવા,મૃત્તકની વય,વાર્ષિક 6.58 લાખની આવક અને ભવિષ્યની ખોટને ધ્યાને લઈ મૃત્તકના વારસોને ઉપરોક્ત વ્યાજ સહિત કુલ 55.20 લાખ અકસ્માત વળતર ચુકવવા સંયુક્ત તેમજ વિભક્ત રીતે જવાબદાર હોવાનો નિર્દેશ આપ્યો છે.
