નવી દિલ્હી : સંપૂર્ણ રીતે ફિટ નહીં હોવાથી ભારતની મહિલા હોકી ટીમની સ્ટ્રાઈકર અને પૂર્વ કેપ્ટન રાની રામપાલને આગામી મહિને યોજાનાર એફઆઈએચ વર્લ્ડ કપમાં ભારતીય મહિલા હોકી ટીમમાં સ્થાન મળ્યું નથી.બુધવારે ગોલસકીપર સવિતા પૂનિયાના નેતૃત્વ સાથે 18 સભ્યોની ભારતીય મહિલા હોકી ટીમની જાહેરાત કરવામાં આવી હતી.ટોક્યો ઓલિમ્પિક 2020માં ભારતીય મહિલા હોકી ટીમ શાનદાર દેખાવ સાથે ચોથા ક્રમે રહી હતી.
પૂર્વ કેપ્ટન રાની રામપાલને પગના સ્નાયુ ખેંચાવાની સમસ્યા બાદ રિકવર થતા તેને તાજેતરમાં બેલ્જિયમ અને નેધરલેન્ડ સામે એફઆઈએચ પ્રો લીગ મેચમાં ટીમમાં લેવામાં આવી હતી.ટોક્યો ગેમ્સ બાદ તે ટીમમાંથી બહાર રહી હતી.ટીમનો હિસ્સો હોવા છતાં રાની પ્રો લીગના યુરોપીયન લેગમાં પ્રારંભની ચાર મેચમાં રમી ન હતી જેને લીધે તેની ફિટનેસ પર સવાલ ઉઠ્યા હતા અને આખરે તેણે વર્લ્ડ કપ ટીમમાં જગ્યા મેળવવાની તક ગુમાવી દીધી હતી.રાનીને બાકાત રાખવામાં આવી હોવા છતાં ભારતીય મહિલા હોકી ટીમમાં કોઈ એવું નામ નથી જે ચોંકાવી શકે.ભારતીય મહિલા ટીમમાં અનુભવી ખેલાડીઓને જ તક આપવામાં આવી છે.
રાની ઉપરાંત ડિફેન્ડર ઈશિકા ચૌધરી અને અક્ષતા અબાસો ઢેકાલે,મિડફિલ્ડર બલજીત કૌર તથા સ્ટ્રાઈકર સંગીતા કુમારી પણ વર્લ્ડ કપની બસ ચુકી ગયા છે.આ વર્ષે 1થી 17 જુલાઈ વચ્ચે નેધરલેન્ડ અને સ્પેન સંયુક્ત રીતે વર્લ્ડ કપની યજમાની કરશે.સવિતા પૂનિયા કેપ્ટન રહેશે જ્યારે દીપ ગ્રેસ એક્કા વાઈસ કેપ્ટન છે.ભારત સાથે પૂલ બીમાં ઈંગ્લેન્ડ,ન્યૂઝીલેન્ડ અને ચીન છે.ભારત પ્રથમ મેચ 3 જુલાઈએ ઈંગ્લેન્ડ સામે રમશે જેણે ટોક્યો ઓલિમ્પિકમાં ભારતીય મહિલા ટીમને બ્રોન્ઝ મેચમાં હરાવ્યું હતું.
