૧૬૫થી વધુ પાથરણા વાળા અને લારી વાળાઓને પાસ આપી જગ્યા ફાળવવામાં આવી
નવગુજરાત સમય ,બારડોલી :
બારડોલી વહીવટી તંત્ર દ્વારા શહેરમાં અલગ અલગ વિસ્તારોમાં શાકભાજી માર્કેટનું વિભાજન કરી સ્થળની યાદી જાહેર કરવામાં આવી છે. ભીડ ઓછી કરવાના આશયથી રહેણાક વિસ્તારની નજીક બજાર લઈ જવાના પ્રયાસો કરવામાં આવ્યા છે. બારડોલી તાલુકા સેવા સદન, બારડોલી નગર પાલિકા અને બારડોલી પોલીસના સંયુક્ત સહયોગથી 13 જેટલા સ્થળોની યાદી જાહેર કરવામાં આવી છે જ્યાં શાકભાજીના સ્ટોલ લાગશે. જેથી આજુબાજુના રહીશો સરળતાથી શાકભાજી ખરીદી કરી શકે.
કોરોના વાઇરસને કારણે ભારત સરકાર દ્વારા સમગ્ર દેશમાં લોક ડાઉનની જાહેરાત કરવામાં આવી છે ત્યારે જીવન જરૂરી ચીજવસ્તુઓ માટે લોકોને મુશ્કેલી ન પડે તે માટે બારડોલીના વહીવટી તંત્ર દ્વારા સુચારું વ્યવસ્થા ગોઠવવામાં આવી રહી છે. શાકભાજી માર્કેટ માત્ર લીમડા ચોક વિસ્તાર પૂરતી મર્યાદિત ન રાખતા હવે પછી અલગ અલગ 13 જેટલા સ્થળો પર માર્કેટ લગાવવાની જાહેરાત કરવામાં આવી છે. જેનો શુક્રવારથી અમલ શરૂ કરી દેવામાં આવશે. પાલિકાની ટીમ દ્વારા માટે સ્થળોની સાફ સફાઈની કામગીરી પણ શરૂ કરી દેવામાં આવી છે. પાલિકા દ્વારા વર્ષોથી બંધ પડેલા જે.પી. શાકભાજી માર્કેટ અને ચંદ્રમણિ શાકભાજી માર્કેટને પણ ખુલ્લા કરી દેવામાં આવ્યા છે. શાસ્ત્રી રોડ, ગાંધી રોડ, સ્ટેશન રોડ, સુરત હાઇવે સહિતના વિસ્તારોમાં શાકભાજીની વ્યવસ્થા ઊભી કરવામાં આવનાર હોય એક જ જગ્યાએ ભેગા થવાની જગ્યાએ ભીડ વહેંચાય જવાથી લોકોને પણ સરળતા રહેશે. પાલિકા દ્વારા આ માટે ૧૬૫થી વધુ લારી અને પાથરણા વાળાઓને પાસ જારી કરવામાં આવ્યા છે. જેઓને અલગ અલગ અલગ વિસ્તારમાં જગ્યા ફાળવી દેવામાં આવી હોવાનું જાણવા મળે છે.
બારડોલી નગરપાલિકા દ્વારા જાહેર કરવામાં આવેલ સ્થળોની યાદી
સ્થળ સ્ટોલ સંખ્યા
જે.પી શાકભાજી માર્કેટ (જે.પી.નગર) ૧૦
ચંદ્રમણિ શોપિંગ સેન્ટર(શાસ્ત્રી રોડ) 0૬
બી.જે.પી કાર્યાલય નજીક( શિવાજી ચોક) ૧૦
જિલ્લા પંચાયતનો પ્લોટ (ઉપલી બજાર ) 0૫
રવિવાર બજાર (સુરત રોડ, વર્કશોપ ડેપો સામે) ૨૦
બી.એ.બી.એસ. હાઈસ્કૂલ (સરદાર ચોક) ૧૦
વામદોત હાઈસ્કૂલ (સર્વોદય નગર) ૧૦
ગાંધી હોસ્પિટલની સામે (ગાંધી રોડ) ૧૦
શિશુ મંદિર સ્કૂલ 0૫
લિનિયર બસ સ્ટેન્ડ 0૬
બસ ડેપો ૧૦
મૈસૂરિયા સમાજની વાડીની બાજુમાં ૧૦
અકસા નગર મેદાન (વોટરવર્કસની બાજુમાં) –
આ ઉપરાંત મુસીબતના સમયમાં ઘર બેઠા કરિયાણું કે ફૂડ પેકેટ્સ પહોંચાડનાર વેપારીઓ અને સેવાકીય સંસ્થાઓના નામની યાદી અને ફોન નંબર પર જાહેર કરવામાં આવ્યા છે. જેથી શહેરના લોકોને કોઈ મુશ્કેલી ન પડે અને સરળતાથી કોઈ પણ જાતની ભીડ વગર વસ્તુઓ મેળવી શકશે. બારડોલી શહેર અને ગ્રામ્ય વિસ્તારમાં ફૂફ પેકેટ ઘર બેઠા વિતરણ માટે કુંથનાથ જૈન યુવક મંડળ દ્વારા પણ સેવા શરૂ કરવામાં આવી છે. આ ઉપરાંત જસ્ટ હેલ્પ ચેરિટેબલ ટ્રસ્ટ નામની સંસ્થા રખડતા પશુ પંખીઓ માટે પણ કામ કરશે.
