અમદાવાદ : અમદાવાદ શહેરમાં રથયાત્રાને ધ્યાનમાં લઈ પોલીસે તમામ વિસ્તારોમાં પેટ્રોલિંગ અને સઘન વાહન ચેકિંગની કામગીરી શરૂ કરી છે ત્યારે આ કવાયતો વચ્ચે ધોળાદિવસે એલિસ બ્રિજ વિસ્તારમાં રૂ.12.94 લાખની લૂંટ થઇ છે.ખાનગી કંપનીનો કર્મચારી આંગડિયા પેઢીમાંથી રૂ.12.94 લાખ લઇ હોસ્પિટલમાં આપવા જતો હતો ત્યારે એક્સિડન્ટના મુદ્દે યુવક સાથે ઝઘડો કરી લૂંટારા એક્ટિવાની ડેકી તોડી જાહેરમાં રૂપિયા લઇ પલાયન થઈ ગયા હતા.બનાવ સંદર્ભે એલિસ બ્રિજ પોલીસે લૂંટની ફરિયાદ નોંધી તપાસ શરૂ કરી છે.આ ઘટનાને લઇને ક્રાઈમ બ્રાન્ચ સહિતની એજન્સીઓ પણ સક્રિય બની છે.
કલોલ નજીક સઇજમાં રહેતો ધર્મેન્દ્ર માણેકભાઈ પટેલ ખાનગી કંપનીમાં ડિલિવરી બોય તરીકે ફરજ બજાવે છે.ધર્મેન્દ્ર સોમવારે બપોરે સીજી રોડ પરની આંગડિયા પેઢીમાંથી રૂ.12.94 લાખ લઈને નીકળ્યો હતો.તેણે રૂપિયા ભરેલી બેગ પોતાની એક્ટિવાની ડેકીમાં મૂકી હતી અને તે પૈસા એલિસ બ્રિજ ટાઉનહોલ નજીકની હોસ્પિટલમાં આપવાના હતા.મહેન્દ્ર એક્ટિવા પર હોસ્પિટલ તરફ જઈ રહ્યો હતો ત્યારે તેની પાછળ અન્ય એક યુવક પોતાનું સ્કૂટર લઈને આવતો હતો.ધર્મેન્દ્ર ગુજરાત કોલેજ આગળથી માદલપુર બીઆરટીએસ બસ સ્ટેન્ડ નજીક પહોંચ્યો ત્યારે પાછળ આવતા સ્કૂટર ચાલકે તેને અટકાવ્યો હતો અને કહ્યું હતું કે કેમ એક્સિડન્ટ કરીને ભાગે છે? હજુ ધર્મેન્દ્ર કંઈ સમજે તે પહેલાં જ અન્ય એક બાઈક પર બીજા બે યુવકો આવી ગયા હતા.
જેણે પણ ધર્મેન્દ્ર સાથે ઝઘડો કરી પેલા યુવકને સારવાર કરાવવાની વાત કરી હતી.જાહેરમાં તકરાર ચાલતી હતી ત્યારે જ મોટરસાયકલ પર આવેલા બે યુવકોએ ધર્મેન્દ્રના એક્ટિવાની ડેકી તોડી નાખી હતી અને તેમાંથી રૂપિયા ભરેલી બેગ કાઢી લીધી હતી.ધર્મેન્દ્ર વિરોધ કરે તે પહેલાં તેમણે તેના પર હુમલો કરી રૂપિયા ભરેલી બેગ ઝૂંટવી લીધી હતી અને બાઈક પર આવેલા યુવકો એલિસ બ્રિજ તરફ ભાગી ગયા હતા.તેની સાથે તકરાર કરનાર યુવક પોતાનું સ્કૂટર લઈને માદલપુર ગામ તરફ ભાગી ગયો હતો.બનાવ સંદર્ભે ધર્મેન્દ્રએ તેના શેઠ ભૂપેન્દ્ર પટેલને જાણ કરી હતી જેથી ભૂપેન્દ્રભાઇએ તેને આ બાબતે પોલીસ ફરિયાદ કરવાનું જણાવતા ધર્મેન્દ્ર એલિસ બ્રિજ પોલીસ મથકે પહોંચી ગયો હતો અને તેણે લૂંટ અંગેની ફરિયાદ નોંધાવી છે.
